LUKA 18 - Bukuit Ne Tilil

Kirwoogindet ak mosoget

¹ Ki mwachi anyun kalewenet kole, Kanyool kosa peetuusyek tugul, amat chorirenso;

² koleenji, “Ki miitei nganaseet age kirwoogindo ne ki ma koywei Kamuktaindet, ak ki ma koiti chii:

³ ak ki mi mosoget age nganasanooto; ne kinyonei ole mi kotugul, koleen, ‘Ibesyeiwo kirwooget ne po iman eng' punyondennyu.’

⁴ Ak ki eesyo eng' peetuusyek alak: ago eng' let, komwa eng' oriitinnyi kole, ‘Agot ngo ma ywei Kamuktaindet, amaiiti chii;

⁵ ago amu inyalila mosogani, abesyechini anyun, si ma konyonei kotugul koiima.’ ”

⁶ Ak ki le Kiptaiyat, “Ogas kiit ne ki mwa kirwoogindet ne ma po imanda.

⁷ Tos ma yachin Kamuktaindet imanda che lewenotin, che riirchin ineendet peet ak kemoi, ak muitoi ineendet eng' icheek?

⁸ Amwaiwok ale, yachin ineendet icheek imanda kochokyin. Ago ye tuun nyo Weeriitap chii, ko tos nyooru kayaneet eng' ng'wony?”

Kalewenet agobo Pharisaindet ak taagindetap aisuruut

⁹ Ak ki mwachi kogeny kalewenoni alak che ki imang'ugei kole, ki po imanda, ak kosasei piik tugul,

¹⁰ koleenji, “Ki togosta piik aeng'u Hekaluut koba kosa; Pharisaindet age, ko taagindetap aisuruut age.

¹¹ Ki tonon Pharisaindet kosa kong'alaal ineegei kole, ‘Kamuktaindet, amwaun kongoi, amu ma ki kergei ak piik alak, che rebiik, che ma po iman, che ibegei, anan taagindoni po aisuruut.

¹² Arugutige konyil aeng' eng' wigiit; agoitoi kebeberta ne po taman eng' tuguuk tugul che anyooru.’

¹³ Ago ki tonon taagindetap aisuruut eng' ye loo, ak ma cham agot konyal kipsengwet, ago kiluch tegeennyi, kole, ‘Kamuktaindet, rireena, aa kiptengekyo.’

¹⁴ Amwaiwok ale, kichoortagei chiichooto koonnyi ko kagoek ne po imanda kosiir nin age: amu chii age tugul ne itoroorigei kiming'ini; ak age tugul ne iming'inigei ko tuun kitoroori.”

Koberuuri kong kong `Jeso lagok che mengech

¹⁵ Ak ki imutyi `piik ineendet manyurunik, si kobiit kotwa icheek: ago ye kingo keer kasubik, koger kong'.

¹⁶ Ago kiguur Jeso icheek kobwonji, ak koleenji, “Ochamji lagok che mengech kobwanjo, amat oete: amu po che uu chu laitornatetap Kamuktaindet.

¹⁷ Amwaiwok iman ale, Age tugul ne mataachei laitornatetap Kamuktaindet ko uu lakweet ne ming'in, koma koi mong'ji olooto matiny.”

Kong'alaaljin kong `Jeso chii ne ki mogoryo

¹⁸ Ak ki teebe ineendet pounindet age, kole, “Kaneetindoni myee, ayai nee si kobiit anyoor saboondap koigeny?”

¹⁹ Ak ki leenji Jeso, “Amu nee si iguureno ne myee? Ma mi ne myee, kobatee agenge, nooto ko Kamuktaindet.

²⁰ Ingen ng'atuutik: ‘Amoipkei, Amerumisye, Amechoorse, Amebaoryan lembech, teech kwandang'ung' ak kamenng'ung'.’ ”

²¹ Ak ki le, “Ki ariip tuguuchuuto tugul kobooch ko aa neran.”

²² Ak ye kingo kas Jeso, koleenji, “Ta ko rartaat kiit agenge eng' inyee: alde tugul che itinye, ak ipchechi kibananook, si inyooru konorwet eng' kipsengwet: ak inyoo, isubwo.”

²³ Ago ye kingo kas ineendet tuguuchu, koaragen miising'; amu ki mogoryo kot.

²⁴ Ak kingo keer `Jeso ineendet, komwa kole, “Pichii ne tya eng' che tinyei mogornatosyek komong'ji laitornatetap Kamuktaindet!

²⁵ Amu nyumnyum eng' tambeesyet kochut kondap sindanut, kosiir komong'ji mogoryot laitornatetap Kamuktaindet.”

²⁶ Ki mwa anyun che ki kasei, kole, “Ng'oo anyun ne kesaru?”

²⁷ Ki le, “Tuguuk che ma imugaksei eng' piik komugaksei eng' Kamuktaindet.”

²⁸ Kole Petero, “Keero, kigebagaakte tuguukyok, ak kisubun!”

²⁹ Ak ki leenji icheek, Amwaiwok iman ale, Ma mi chii ne ki pagaakta koot, anan osotyot, anan che tupcho, anan sigiik, anan lagok, agobo laitornatetap Kamuktaindet,

³⁰ ne ma nyooru che chaang' kosiir eng' peetuusyechu, ak saboondap koigeny eng' peetuusyek che tuun pwoonei.

Sip komwaei Jeso ne po somok agobo meennyi

³¹ Ak ki imut taman ak aeng' kobwa ole mi, ak koleenji, “Ogeero, kitogostoi Jerusalem, ak kosulda tuguuk tugul che kisir maotik agobo Weeriitap chii.

³² Amu kindoi ineendet eunegap Pororyosyek, si kechurachur, ak kiteweer, ak kesing'ilji:

³³ ak kobire kipchoritiit, ak kobar: ak kong'eet kogeny eng' peetuutap somok.”

³⁴ Ak ki ma iguiyo icheeget tuguuchuuto, agot agenge; ak kiung'ak mwaoniito eng' icheek, ak ki ma ibesyo tuguuk che kiga kimwa.

Kosoobi `Jeso chii ne ki koraat

³⁵ Ak kingo riikyi Jeriko, ko kitebyei ng'wony kipkoratya eng' ooreet taban kosoomsei:

³⁶ ak kingo kas kosiirtoi tuiyet, koteep kole, “Nee chu?”

³⁷ Ak ki mwachi icheek ineendet koleenji, “Jeso ne po Nazareth ne siirtoi.”

³⁸ Ak kiwaach, kole, “Jeso, Weeriitap Daudi, rireena.”

³⁹ Ak ki kergong' ineendet anyun che ki indoi, kole kosiis: ago kites kowaach miising' kole, “Weeriitap Daudi, rireena.”

⁴⁰ Ak ki tonon Jeso, ak kong'at kimut ineendet kwo ole mi: ak ye kiga riik, koteebe ineendet,

⁴¹ kole, “Imache ayaun nee?” Ak ki le, “Kiptaiyat, amache ageerto.”

⁴² Ak ki leenji Jeso, “Keerte: kagosaabin kayaneng'ung'.”

⁴³ Ki keerto anyun koma tyanit, ak koosup ineendet, kolasunoti Kamuktaindet: ak kingo keer tuiyet komugul, kogonyit Kamuktaindet.