LUKA 17 - Bukuit Ne Tilil

Kaneetisyet agobo kanagutik

¹ Ki leenji kasubikyik anyun, “Pwoonei kanagutik matiny: ago pwo! Eng' chiichooto punu!

² Kita kaigai eng' ineendet kirooch kaatinnyi koitap pai ne oo ak kewiirchi araraita, kosiir ye inachi age eng' chu mengech.

³ Oriipkei: ngo chiliilun ne otupche, iger kong'; ak ngo sik, inyochi kaat.

⁴ Ak ngo chalwogenjin konyil tisap eng' peetuut agenge, ak ngo week ole imi konyil tisap koleen, Kaasigu; inyochi kaat.”

Kaneetisyet agobo kayaneet

⁵ Ak ki leenji che kiyooktoi Kiptaiyat, Teswech kayanennyo.

⁶ Ak ki le Kiptaiyat, Ndotinye kayaneet ne uu keswootap karadali, ko ye omwachi mogoywoni, oleenji, Kitutin, ak keminin eng' araraita; kogasook iit.

Otwogindet ak poisyennyi

⁷ Ago mi ng'oo eng' okweek ne tinyei otwogindet ne ibatisyei anan ne iyagi keechiirek, ne leenjin ye kait kobunu mbar, “Nyoo tebi ng'wony iamisye?”

⁸ Tos ma kaigai koleenji ineendet, Chobwa tuguuk che aame, kermenge ak iboisyeiwo, agoi aamisye ak aeeise; si yeityo iamisye ak ieeise aginye?

⁹ Tos weekyin otwogindonooto kongoi amu kayai tuguuk che kagaging'at?

¹⁰ Uu nooto tuun ak okweek, ye kaoyai tuguuk tugul che kaging'atak, omwa ole, Ki otwogik che ma tilei kiy; kageyai che kanyooljinech keyai.

Kisoobi piik taman ak aeng' che amei mogondosaik

¹¹ Ak ye ki mi ooreet kowendi Jerusalem, kobun kwenutap Samaria ak Galilaya.

¹² Ak kingo mong'ji nganaseet age, kotuiyo ak murenik taman che ki tinyei mogondosaik, che kitonondos eng' ole loo:

¹³ ak kiwaach kole, “Jeso Kiptaiyat, rirenech.”

¹⁴ Ak kingo keer icheek, koleenji, “Oba oboorchigei tisiik.” Ak ye kingap kaba, kotiliiliitu.

¹⁵ Ak kingo keer age eng' icheek kole kagosap, koweek, kolasunonu Kamuktaindet eng' kutit ne oo;

¹⁶ ak ki ibutyi keelyekyik koweekyi kongoi; ak ki Samarindet chiichooto.

¹⁷ Ak ki wol Jeso kole, “Kama kitiliil taman? Ago mi ano chugai sogoolu?

¹⁸ Tos ma piit agot agenge ne kaweek kogoochi kalasunet Kamuktaindet, kobatee toondoni?

¹⁹ Ak koleenji ineendet, Ng'eet, si iwe: kagosaabin kayaneng'ung'.”

Nyonunet ne po laitornatetap Kamuktaindet

²⁰ Ak kingo teebee Pharisaik kole “Nyoonei au laitornatetap Kamuktaindet”, kowolji icheek koleenji, “Ma nyoonei laitornatetap Kamuktaindet kegeeronu:

²¹ ama kimwaei keele, Ogeero, mi oli! Anan mi oliin! Amu, ogeero, mi laitornatetap Kamuktaindet kwenung'wong'.”

²² Ak ki leenji kasubikyik, Tuun pwoonei peetuusyek, che tuun omache ogeer peetuut agenge ne po Weeriitap chii, ak mogeere.

²³ Ak tuun leenjinok, Ogeero, mi oliin! Ogeero, mi oli! Amat obe, anan osup icheek:

²⁴ amu uu kalyeleet, ne ilyelune komosta age eng' kipsengwet, ak kooluu agoi komosta age ne po kipsengwet; tuun uu nooto Weeriitap chii agine eng' peetuunnyi.

²⁵ Ago kanyool konyalil eng' tuguuk che chaang' ak koeesyo ineendet ibini.

²⁶ Ak ko uu ole ki piitunda eng' peetuusyegap Noah, ko tuun uu nooto eng' peetuusyegap Weeriitap chii.

²⁷ Ki amisyei, kieisei, kiitunisyei, ak ki igoitoi kitun, agoi peetuut ne ki wo Noah moinget oriit, ak ki nyo maraneet, ak kobar tugul.

²⁸ Uu nooto agine, ole ki piitunda peetuusyegap Lot; ki amisyei, kieisei, ki alisyei, ki aldaisyei, ki koolsei, ak kiteeksei;

²⁹ ago eng' peetuut ne kimanda Lot eng' Sodom koroobon maat ak koik che laldos che ki punu kipsengwet, ak kobar tugul:

³⁰ uu nooto eng' peetuut ne kibooru Weeriitap chii.

³¹ Eng' peetuunooto, ko mat kochoorgei ineendet ne mi koot parak, koip tuguukyik che mi ko; amat koweek agine ineendet ne mi mbar.

³² Obwaat osotyotap Lot.

³³ Age tugul ne cheeng'ei kosar saboondanyi kobeeti: ak age tugul ne ibeeti saboondanyi koriibei.

³⁴ Amwaiwok ale, Tuun ruitos piik aeng'u eng' itoogut agenge eng' kemounooto; kimuti age, kebagaakta age.

³⁵ Tuun ng'oisei kobogorisyek aeng'u kibagenge; kimuti age, kebagaakta age.

³⁶ Tuun mi piik aeng'u mbar: kimuti age, kebagaakta age.

³⁷ Ak ki wolji ineendet koleenji, “Ano, Kiptaiyat?” Ak ki leenji, Ole mi muusto, koyumjingei olooto motong'wek ak icheek.