LUKA 16 - Bukuit Ne Tilil

Riibindet ne ki ma ko po imanda

¹ Ak ki leenji ineendet kasubikyik kogeny, ki mi chii anum ne ki mogoryo, ne ki tinyei riibindet ne kitononjin koonnyi; ak ki kimwaita chiichooto eng' tainnyi keele, iserseri tuguugap mogoryondonooto.

² Ak kiguur ineendet koleenji, “Nee ni agase agobo inyee? Koonu koitetap riipseng'ung'; amu ma iegu riibindet kogeny.”

³ Ak ki le riibindonooto eng' muguleldanyi, Ayae nee anyun, amu kagoistaa kiptaiyandennyu eng' poisyet? Ama tinye kimnateet ne abatisye; ak ngale, Asoomso, alilani.

⁴ Kaanai kiit ne ayae, si ye kageona eng' poisyet, kotaacha eng' kooriikwak.

⁵ Ak kingo kuur age tugul eng' pesenigap kiptaiyandennyi, koleenji ne po tai, Ki ibesen ata tuguugap kiptaiyandennyu?

⁶ Kole, Tereenik pogol che po mwanik. Ak ki leenji, Nam kartasing'ung', ak itep ng'wony si isir konom, ichokyi.

⁷ Yeityo koleenji age, Ki ibesen ata inyee? Kole, Tereenik pogol che po nganuuk. Koleenji, Nam kartasing'ung', si isir tamanwogik sisiit.

⁸ Ak ki ichoi kiptaiyandennyi otwogindonooto ki ma ko po imanda amu kayai eng' ng'ulaatyet: amu ng'ulaatiin weeriigap ng'wonyuni eng' ibindanywa kosiir weeriigap lapkeiyet.

⁹ Ak amwaiwok ale, Oyachigei choronok eng' ooreetap mogornatosyek che ma po imanda; si ye tuun igeskei, ko tuun kotaachak eng' kooriik che po koigeny.

¹⁰ Ineendet ne kiyani eng' che ng'ering', kiyani agine eng' che chaang': ak ineendet ne ma kiyani eng' che ng'ering' koma kiyani agot eng' che chaang'.

¹¹ Uu nooto anyun, ngo ki ma oegu che kiyani eng' mogornatosyek che ma po imanda, ko ng'oo ne tos iyanak eng' mogornatosyek che po imanda?

¹² Ak ngo ki mata oegu che kiyani eng' tuguugap chiito age, ko tos ng'oo anyun ne koonok tuguuk che chekwok?

¹³ Ma mi otwogindet ne imuuchi koot kiptainik aeng': amu tos wech age, ak kocham age; anan konamgei ak age, kosas age. Momuuchi oot Kamuktaindet ak mogornateet.

Kateunaik alak

¹⁴ Ak ki kas Pharisaik tuguuchuuto tugul. Ki chamei silingisyek icheeget, ak kororechi ineendet.

¹⁵ Ak ki leenji, “Okweget che omyeeitige eng' taitap piik; ago ingen Kamuktaindet mugulelwekwok: amu kiit ne itoroori piik ko wegot miising' eng' taitap Kamuktaindet.”

¹⁶ Ki tebi Ng'atuutyetap Musa ak kaneetisyosyegap maotik agoi koit Johana: kobooch peetuunooto keamdoi logoiywek che myach che po laitornatetap Kamuktaindet, ak komong'jin chii tugul eng' kimnateet.

¹⁷ Ago nyumnyum kosiirto kipsengwet ak ng'wony, kosiir kobut siruutyet agenge ne po Ng'atuutik.

¹⁸ Age tugul ne oonei osotyonnyi, ak kotun age, ko kabaigei: ak chiito ne ituni ineendet ne ki koon manong'otyot ko kabaigei.

Mogoryot ak Lazaro

¹⁹ Ak ki mi chii anum ne ki mogoryo ne ki ilaachi ngoroik che arusen ne piriir, ak che po katanit ne karaaran, ak kibaibai peetuut age tugul, ak kotalbisi:

²⁰ ak ki mi kibanania ne ki kiguure Lazaro ne ki kimogoni eng' kurgennyi, ak ki nyiitaat mook poortanyi,

²¹ ak kimachei kebae tuguuk che ibutos eng' meesetap mogoryondonooto; ee, ki pwa agot sesenik ak komel mookyik.

²² Ak kime kibananiandanooto peetuut age, komut ineendet malaikaisyek konde tegetap Abraham: ak kime agine mogoryondonooto, ak ki kitup.

²³ Ak ye ki mi ye mi che ki kobek konyal parak, komi nyalilda ne oo, kogeer Abraham komi ole loo, komi Lazaro tegeennyi.

²⁴ Ak ki ite kole, “Abba Abraham, rireena, ak iyoogu Lazaro, koting'e peek walitap mornennyi, si kotiswa ng'elyeptanyu, amu ami ng'wanindo miising' eng' mai lalei.”

²⁵ Ago ki le Abraham, “Weeri, ibwaat ile kingo ta isabe ko ki inyooru tuguuguk che myach, ki uu nooto Lazaro, kinyooru tuguuk che yaach: ago nguno kigoigoi ineendet eng' yu, ago inyee, imi ng'wanindo ne oo.

²⁶ Ak ne siirei chu tugul, ko ki kinde chemng'eisut ne oo ne ioitoseech acheek ak okweek, si che machei kolong' olo omi koma imuuchi, ak che machei kolong' ole ki mi koma imuuchi.”

²⁷ Ak ki le, “Asaain anyun, abba, ale, iyookte ineendet kwo ye mi abba;

²⁸ amu atinye che kitupche muut; kwo koteechi icheek, si ma pwa ole mi nyalilda ne oo.”

²⁹ Ak ki leenji Abraham, “Tinyei icheek Musa ak maotik; ingogas icheek.”

³⁰ Ago ki le, “Achicha, abba Abraham: ago ngot kwo chii ole mi icheek ne punei ye mi che ki kobek, kosigu.”

³¹ Ak ki leenji, “Ngot koma kas Musa ak maotik, koesyoi koyan agot chiito ne ng'eetei eng' che ki kobek.”