LUKA 15 - Bukuit Ne Tilil

Kaneetisyetap keechiiryet ne ki pet

¹ Ak kiriikyi ineendet taagigap aisuruut tugul ak kiptengeginik si kobiit kogas ineendet.

² Ak ki ing'unyng'ung'so Pharisaik ak siriik, kole, “Taachei chiichi kiptengeginik, ak koamisyei tugul.”

³ Ak ki mwachi icheek kalewenoni, koleenji,

⁴ Ng'oo chii eng' okweek, ne tinyei keechiirek pogol, ak ngo pet agenge eng' chooto, ko tos ma pagaaktoi chooto tamanwogik sogool ak sogool eng' surkwen, ak kwo kocheeng'at nooto kabet, agoi konyoor?

⁵ Ak ye kigonyoor, konde tigikyennyi, ak kobaibait.

⁶ Ak ye kagoit kaa, koguur choronokyik kobooto piigap kokwennyi koyumgei, ak koleenji, “Ongeboiboitu tugul, amu kaanyooru keechiiryennyu ne koga pet.”

⁷ Amwaiwok ale, egu ko uu nooto tuun agine poiboiyet eng' kipsengwet agobo kiptengekyot agenge ne kasik, ne siirei piik che po iman tamanwogik sogool ak sogool, che ma mage kiy siguunet.

Fedhaiyat ne ki pet

⁸ Ng'oo kobogoryot ne tinyei fedhaisyek taman, ak ngo pet fedhaiyat agenge, kotos ma inaami tait ak kobuch koot, ak kocheeng' miising' agoi konyoor?

⁹ Ak ye kagonyoor, koguur anyun choronokyik kobooto piigap kokwennyi koyumgei ak kole, “Ongeboiboitu tugul, amu kaanyooru fedhaiyandennyu ne koga kobet.”

¹⁰ Uu nooto anyun, amwaiwok ale, mi poiboiyet eng' taitap malaikaisyegap Kamuktaindet eng' kiptengekyot agenge ne kasik.

Chii ak Weeriikyik aeng'

¹¹ Ak ki mwa kole, “Ki mi chii anum ne ki tinyei weeriik aeng'.

¹² Ki leenji weeriit ne ming'in kwandanyi, Abba, koono tuguuk che ka tatun punjino. Ak kipchechi icheek tuguukyik.

¹³ Ak kingo pata peetuusyek che matya koyum weerooto ming'in tuguukyik tugul, ak kwo emet ne loo; kwo koserser eng' olooto tuguukyik eng' atepto ne ya.

¹⁴ Ak kingo kagogesta tugul, konyo rubeet ne oo emonooto; kotoi anyun kobanan.

¹⁵ Ak ki wo kogakta chiito age ne po emonooto; ak ki iyookto kwo koyaga toorook eng' mbareet.

¹⁶ Ak kimachei miising' kole kobiyo meteteek che ki amei toorook: amu ma igoochi chii kiy.

¹⁷ Ak kingo pwaat, komwa kole, ‘Tya otwogik che po abba che tinyei amitwogik che yamei kot kosiir, ago anee, ko kabara rubo eng' yu!

¹⁸ Ang'eete ak awe kap Abba aleenji, Abba, ki achalwogenji kipsengwet ak ki achalwogen eng' taing'ung':

¹⁹ ma ko nyoljino kota keguureno weeriing'ung': ingaek ko uu age eng' otwogiguk.’

²⁰ Ki ng'eet anyun kwo kapkwandanyi. Ago, ye kita komi ole loo, kogeer ineendet kwandanyi, ak koriiree ineendet, ak kilabat kwo kosuup kaatit, ak kong'utut.

²¹ “Ak ki leenji weeriit, Abba, ki achalwogenji kipsengwet, ak ki achalwogen eng' taing'ung': ma ko nyoljino kota keguureno weeriing'ung'.

²² Ago ki leenji kwanda otwogikyik, Oibu ochogune ngoryeet ne karaaran ne siirei tugul, ak olaakyi; ak ondechi peteiyot mornennyi, ak olaakyi kweonik:

²³ ak ogetu moita ne neraat, ak oeny, si keam, ak keboiboitu:

²⁴ amu weeriinnyu ni, ne kiga kome, ago kagosap kogeny; kiga kobet, ak kagobiit. Ki toi anyun koboiboitu.

²⁵ “Ak ki mi weeriinnyi ne oo mbar: ak kingo riik ye neegit koot, kogas cheetap tyendo ak ureryet.

²⁶ Ak kiguur age eng' otwogik, ak koteebe kole, nee tuguuchu.

²⁷ Ak ki leenji, ‘Kagoit ng'eetap kamenng'ung'; ak kagoeng'ji kwandang'ung' moita ne neraat, amu kagotaach ineendet kochamegei.’

²⁸ Ago kinereech, ak ki eesyo kwo ko: ak ki mong' saang' kwandanyi, kogaigai.

²⁹ Ago ki wolji kwandanyi koleenji, Keero, ki aootin eng' kenyisyechu chaang', ama abut ng'atuutyeng'ung': ak ki ma igoono arwa, si keboiboitu ak choronokyuk:

³⁰ ago ye ka ngo nyo weeriitang'ung'et, ne kigoam tuguuguk ak chepkugonik, ieng'ji anyun moita ne neraat.

³¹ Ak ki leenji, ‘Weeri, kimi tuwai kotugul, ak tuguukyuk tugul ko cheguuk.

³² Ago kanyoolu keboiboitu ak kigaske: amu kiga kome weeri otupche, ago kagosap kogeny; kiga kobet, ago kagobiit.’ ”