LUKA 14 - Bukuit Ne Tilil

Kosoobi `Jeso chii ne lolosenot poorto

¹ Ak ye kingwo kootap age eng' pounik che po Pharisaik eng' peetuutap sabato, si koamis, koriibot icheek ineendet.

² Ak ogeero, ki mi chii tainnyi ne ki lolosenot poorto.

³ Ak ki wolji Jeso ng'amotigap ng'atuutik ak Pharisaik, koleenji, Tos chamdaat eng' ng'atuutik kisoop chii eng' peetuutap sabato, anan achicha?

⁴ Ago ki siisyo. Ak ki nam ineendet ak kosoop, ak kounda kwo.

⁵ Ak koleenji icheeget, Ng'oo eng' okweek ne tinyei sigiryet anan eito ne kagobutyi keriinget, ama sutu sainooto amu peetuutap sabato?

⁶ Ak ki mata komuuch anyun kowolji ineendet kogeny agobo tuguuchuuto.

Koneeti Jeso agobo kaming'inetapkei

⁷ Ak ki mwachi kalewenet che kiga kiguur, ye kingo keer ole lewendoi ng'echerok che po tai; koleenji icheek,

⁸ Ye kaguurchin chii age tugul igoortap katunisyet, ko metebee ng'echereet ne po tai; amu abeere kagiguur age ne konyitot kosiirin,

⁹ si ye nyo ineendet ne kaguurok okweek tuwai, komwaun kole, istochigei chiichi; itau anyun iwe ole po let eng' kalilanet.

¹⁰ Ago ye kiguurin, itebee olo po let; ak ye nyo anyun ne kaguurin, komuuchi koleenjin, Chorwani, ui oliin po tai: inyooru anyun teegisto eng' che oamisyei tugul.

¹¹ Amu age tugul ne itoroorigei kiming'ini; ak ineendet ne iming'inegei kitoroori.

¹² Ki mwachi anyun chiichooto kiga kuurso agine, koleenji, “Ye ichop amitwogik che po peet anan che po koskoleny, ko mat iguur choronoguk, anan che otupche, anan tilyonutiguk, anan mogoreek che po kokwet; abeere tos kuurin ak icheek, ak koweegun cheguuk.

¹³ Ago ye ichop igoorto, iguur kibananook, ak che po mugungon, ak che ing'waldos, ak che koryotiin:

¹⁴ si kiberuurin; amu ma tinyei icheeget che weegun: amu tuun kiweegun eng' ng'eetyeetap che po iman.”

Kalewenet agobo igoorto ne oo

¹⁵ Ak kingo kas tuguuchuuto chiito age ne ki mi kobooto ineendet eng' amisyet, koleenji, “Paibai ineendet ne tuun amisyei eng' pounatetap Kamuktaindet.”

¹⁶ Ago ki leenji, “Ki chop chiito age amitwogik che chaang' che po koskoleny; ak koguur piik che chaang':

¹⁷ ak ki iyookto otwogindennyi eng' saitap amitwogik, koguur che kiga kemwachi, koleenji, ‘Obwa; amu kagochobogis tuguuk tugul.’

¹⁸ Ak kotoi tugul eng' mageet agenge komwa kiit ne karaany. Ki leenji chiito ne po tai, ‘Kaal mbareet, kanyolja awo ageer: asoomin ale nyoiywo kaat.’

¹⁹ Kole age, ‘Kaal eiik taman che po chogit, kawe atyem icheek: asoomin ale nyoiywo kaat.’

²⁰ Kole age, ‘Kaatunisye, nooto anyun ma muuchi anyo.’

²¹ Konyo anyun otwogindonooto, ak kotetyi kiptaiyandennyi ng'aleechuuto tugul. Konereech anyun chiitap ko po koot, ak koleenji otwogindennyi, ‘Ui chaakte ortinwek che eecheen ak che mengeechen che po nganaseet, ak imutu yu kibananook, ak che po mugungon ak che koryotiin ak che ing'waldos.’

²² Ak ki le otwogindonooto, ‘Kiptaiyat, kagoyaak kiit ne kageng'at, ago ta komi poroindo.’

²³ Koleenji anyun kiptaiyat otwogindennyi, ‘Ui ortinwek che eecheen ak kiwotosyegap mbareenik, ak ichiich kobwa ko, si konyi koonnyu.

²⁴ Amu amwaiwok ale, ma mi agot agenge eng' che kiga kemwachi ne chamchami amitwogikyuk.’ ”

Chii ne kasubiin

²⁵ Ak ye kingo ta kobendi inee ak tuiyosyek che chaang', kowelelgei ak koleenji,

²⁶ “Ngo nyoonjo chii, ama wech kwanda, ak kamet, ak osotyonnyi, ak lagokyik, ak weeriik che tupcho, ak chepkametinik, ee ak saboondanyi agine, koma imuuchi koek kasubindennyu.

²⁷ Ak chii age tugul ne ma ibei kimurtoiyondennyi, ak kosubwo, koma imuuchi koek kasubindennyu.

²⁸ Amu ng'oo eng' okweek, ne machei koteech koot ne kooi, ama toi kotep ng'wony korook ak koiit tuguuk, ngo tinyei che yamei kogesune koot?

²⁹ Si ma ye kagotonon lumeiywot, ak koma komuuch kogees, kotoi kochurachur ineendet tugul che keerei,

³⁰ kole, ‘Ki toi chiichi koteekso ago ma imuuch kogees.’

³¹ “Anan ng'oo laitoryat ne wendi kobaregei ak laitoryat age, ama tep ng'wony korook ak korar ole teptoi, ngo tos imuuchi ineendet ak piik eliphuusyek taman kotuiyo ak ne setyin ineendet ak piik eliphuusyek tiptem?

³² Anan, ye ta komi age ole loo, koyookto ng'olyoot, si koteep agobo kaalyeet.

³³ Nooto anyun, chii age tugul eng' okweek ne ma pagaaktoi tuguukyik tugul, koma imuuchi koek kasubindennyu.

Muunyuk

³⁴ “Myachen muunyuk: ago ngo kagogeskei anyinyindanyi, kota ki anyinyee nee?

³⁵ Ma kotilei kiy eng' emet anan eng' kapng'atat: kilaktoi. Ineendet ne tinyei iitiik che kastoe, kogas.”