LUKA 10 - Bukuit Ne Tilil

Koyooktoi `Jeso kasubik tamanwogik tisap ak aeng'

¹ Kingo pata tuguuchu kolewen Kiptaiyat piik alak tamanwogik tisap ak icheek, ak koyookto kobee aeng' kole, kondoe ineendet koba nganaseet age tugul ak komosta age tugul ole tuun punooti.

² Ago ki leenji icheek, Oo kesisyet ago ng'ering' kesik: nooto anyun osoom Kiptaiyat ne po kesisyet, si kobiit koyookyi kesik kesisyennyi.

³ Oba: ogeero kaayooktok ko uu aaregap keechiirek eng' kwenutap suik.

⁴ Amoip lolet, anan suberet, anan kweonik: amogat chii eng' ooreet.

⁵ Ak koot age tugul ne omong'jini, omwa ole, Ingotep kaalyeet eng' kooi.

⁶ Ak ngo miitei weeriitap kaalyeet yooto, kotebee kalyeng'wong' ineendet: ak ngo ma mi, koweekyinogei okweek.

⁷ Ak otebee koyooto anyun, ak tuguuk che koonok, oam ak oee: amu nyoljin kiboityot melektanyi. Amoitote kooriik.

⁸ Ak nganaseet age tugul ne omong'jini, ak kotaachak, oam tuguuk che kindoi taing'wong';

⁹ ak osoop che myandos eng' olooto, ak oleenji icheek, Kagorikyok laitornatetap Kamuktaindet.

¹⁰ Ago nganaseet age tugul ne omong'jini, ama taachok, omande obe ortinwekyik ak omwa ole,

¹¹ kagibukyok temburyek che po nganaseng'wong', che kanam keelyekyok; ago onai ni, ole, kagoriik laitornatetap Kamuktaindet.

¹² Ago amwaiwok ale, Tuun kaigaitu Sodom eng' peetuunooto, kosiir nganasanooto.

Nganasook ngelelik

¹³ “Pwo! Wee Korazin! Pwo! Wee Bethsaida! Amu nda kiga kiyai eng' Tyro ak Sidon poisyonik che po kamuktaet ko uu che kogiyai eng' okweek, ta kiga kosik keny, ak kotebee oreek kolaachi kuniok.

¹⁴ Ago tuun kaigaitu Tyro ak Sidon eng' kirwooget, kosiirok.

¹⁵ Ak inyee Kapernaum, Tos tuun kitoroorin iwe kipsengwet? Kiwiirchinin ng'wony kot iit ye mi che ki kobek.

¹⁶ “Ineendet ne kasook kogasa agane; ak ineendet ne eesyook koeesyoo agane; ak ineendet ne eesyoo koeesyoi ineendet ne ki iyookwo.”

Poiboiyetap piik tamanwogik tisap

¹⁷ Ki week anyun pichooto tamanwogik tisabu eng' poiboiyet, ak komwa kole, “Kiptaiyat, agot oik kogaseech iit eng' kaineng'ung'.”

¹⁸ Ak ki leenji, “Ki ageer Setani kochoorugei eng' kipsengwet ko uu kalyeleet.

¹⁹ Ogeero, kaagoonok kamuget si kobiit otyech erenook ak melmelwek, ak oterter kimnateet tugul ne po puunyoot; ak ma mi kiy ne imuuchi kong'emak.

²⁰ Ago amoboiboitu amu ng'olyoondoni, amu kasok iit oik; ago oboiboitu amu siraatiin kainaikwok eng' kipsengwet.”

Poiboiyetap Jeso

²¹ Eng' sainooto kobaibait Jeso eng' Kabuuset ne Tiliil, ak kole, “Aweegun kongoi, ee Abba, Kiptaiyat ne po kipsengwet ak ng'wony, amu ki iung'e tuguuchu che utaatiin ak che ng'oomeen, ak ki ing'aang'ji manyurunik: ee, Abba; amu ki chamak ko uu nooto eng' taing'ung'.

²² “Ki kogoono tuguuk tugul Abba: ak ma mi chii ne ingen Weeriit kole ng'oo, kobatee Kwanda; ama nai chii Kwanda kole ng'oo, kobatee Weeriit, ak chii age tugul ne chamei Weeriit, kong'aang'jin.”

²³ Ak kiweleljigei kasubik, ak koleenji eng' ung'oot, “Iberuurotin koonyek che keerei tuguuk che ogeere:

²⁴ amu amwaiwok ale, kimachei maotik che chaang' ak laitorinik kogeer tuguuk che ogeere, ago ki ma keer; ak kimachei kogas tuguuk che ogase, ago ki ma kas.”

Kalewenet agobo Samarindet ne myee

²⁵ Ogeero, ki tonon ng'amotyot age ne po ng'atuutik koyoom ineendet, kole, “Kaneetindoni, ayai nee si tuun anyooru saboondap koigeny?”

²⁶ Ak ki leenji, “Ki kisir nee eng' Ng'atuutik? Isomandoi ano?”

²⁷ Ak ki wolji ineendet koleenji, “Cham Kiptaiyat Kamuktaindet ne Toroor neng'ung' eng' muguleldang'ung' komugul, ak eng' saboondang'ung' komugul, ak eng' kimnateng'ung' komugul, ak eng' ng'omnateng'ung' komugul; ak icham chiitap kokweng'ung' ko uu ye ichamdoige.”

²⁸ Ak ki leenji, “Kewolu komyee: yai ko uu nooto, si isap.”

²⁹ Ago ye kimachei komyeeitkei, koleenji Jeso, “Ng'oo chiitap kokwennyu?”

³⁰ Kowolji Jeso koleenji, “Kichoortaegei chiito age Jerusalem kwo Jeriko; ak kotuiyo ak rebiik, che kirebe ngoroik ak kobir, ak koba, kobagaakta ko neegit kome.

³¹ Ak kichoortaegei tisiindet age oranooto; ak kingo keer ineendet korop taban.

³² Ak ye kingo it Lawindet yooto, ak kogeer, korop taban agine ko uu nooto.

³³ Ago ye kita kowendi Samarindet age eng' pandanyi, koit ye mi chiichooto: ak ye kingo keer ineendet, koriiree,

³⁴ kwo ole mi ineendet, koratyi ole kagibir, ak kosachinot mwaita ak divaik; ak kiganapchi chiichooto sigiryennyi, ak komut kwo kootap toek, ak koriip ineendet.

³⁵ Ak mutai konem dinarisyek aeng', kogoochi chiitap ko po koot, ak koleenji, ‘Riip ineendet; ak tuguuk alak tugul che inyae che siirei chu, kotuun kaweege, anyo ayaagun.’

³⁶ Eng' chuuto somok, ileen ng'oo ne ki ek chiitap kokwennyi eng' chiichooto kituiye rebiik?”

³⁷ Ak ki le, “Ineendet ne kirireegei chiichooto.” Ak ki leenji Jeso, “Ui, iyai ko uu nooto.”

Marta ak Maria

³⁸ Ak ye kita komi pandanywa, komong'ji anyun nganaseet age: ak kitaach eng' koonnyi kobogoryot age ne keguure Marta.

³⁹ Ak ki tinyei chepkamet ne kiguure Maria, ne kitebyei eng' ole po keelyegap Kiptaiyat, kogasei ng'olyoondennyi.

⁴⁰ Ago ki iimgei Marta eng' poisyonik che chaang'; ak konyonji ineendet ak koleenji, “Kiptaiyat, meiti kiy ak kabagaakta tupchennyu abois aneege? Mwachi anyun kotoreta.”

⁴¹ Ago ki wolji Kiptaiyat koleenji, “Marta, Marta, igereeri met ak iimige agobo tuguuk che chaang':

⁴² ago kiit agenge ne kemachei: amu kagolewen Maria kebeberta ne myee, ne ma kirebe.”