LUKA 1 - Bukuit Ne Tilil

¹ Amu ki konde eunekwak che chaang' kotet ng'aleek agobo tuguuchooto ki kosulda eng' kwenunnyo,

² ko uu ye ki mwaiwech paorinik che ki keer kobooch taunet ak icheek che ki amdoi ng'olyoot.

³ Ko uu ye ki achigil tuguuk tugul kobooch taunet, ko ki abwaat ale myee atetuun eng' sireet, ee inyee Theophilus ne ii tagunoot;

⁴ si kobiit inai eng' iman ng'aleechooto ki kineetin.

Mwaet agobo sigeetap Johana

⁵ Eng' peetuusyegap laitornatetap Herod eng' Judea ko ki mi tisiindet age ne ki kiguure Zekariah, ne po riipseetap Abijah: ak ki tinyei osotyot ne kisalu kap-Aaron, ak ki kiguure kainennyi Elizabeth.

⁶ Ak ki po iman icheek tuwai eng' taitap Kamuktaindet, ak kibendotee ng'atuutik tugul ak karureiywek che po Kiptaiyat, ama tinyei leluut.

⁷ Ak ki ma kotinyei lakwa, amu ki soon Elizabeth, ak kiga koosegitu tuwai.

⁸ Ak ye kita koyaei tisiisyet eng' taitap Kamuktaindet, ko uu teteetap riipsennyi,

⁹ ko uu piteetap tisiisyet, ko ki kilewen ineendet kwo hekaluutap Kiptaiyat kobeel nyamdutik.

¹⁰ Ak ki mi saang' tuiyet komugul ne po piik, kosaaei eng' sait ne kibeelee nyamdutik.

¹¹ Ak ki mong'ji malakaiyatap Kiptaiyat kotonone komostap tai ne po kapkorosuut ne kibeelee nyamdutik.

¹² Ak kingo keer Zekariah ineendet koaragen ak koiyweis.

¹³ Ago ki leenji malaikaiyat ineendet, Mearagen Zekariah: amu kogegasun soomeng'ung', ak ta kosigun osotyondeng'ung' Elizabeth weeriit, ak iguure kainennyi Johana.

¹⁴ Inyooru poiboiyet ak kagasetapkei; ak poiboitu piik che chaang' eng' sigennyi.

¹⁵ Amu tuun egu ne oo eng' taitap Kiptaiyat, ama eei divai anan maiyo che ng'woneen; ago kinyiiti Kabuuset ne Tiliil, kobooch komi moetap kamet.

¹⁶ Ak koweekyi `piigap Israel che chaang' Kamuktaindennywa.

¹⁷ Ak kowendot eng' tainnyi eng' muguleldo ak kimnateetap Elijah, si koweech mugulelwek che po kwanisyek kotokyigei lagok, ak kowelel ngelelik si kobendat eng' utaatyetap che po iman; si kochopchi Kiptaiyat piik che chobootiin.

¹⁸ Ak ki leenji `Zekariah malaikaiyat, “Anae nee ng'olyoondoniito? Amu koaositu, ak ki kotar kenyiisyek che chaang' osotyondennyu.”

¹⁹ Ak ki wolji `malaikaiyat koleenji, “Aa Gabriel, ne atononi eng' taitap Kamuktaindet; kagiyokwo ang'alaalun, ak aibun logoiywechu myachen.

²⁰ Keero, namoksein kuut, ak memuuchi ing'alaal agoi tuun peetuut ne yaaksei ng'aleechu, amu ma iyan ng'aleekyuk che tuun isuldoi eng' peetuusyekwak.”

²¹ Ak ki igen `piik Zekariah kot kokwong'yo, amu ki igagei eng' Hekaluut.

²² Ak ye kingo mong' saang', koma komuuchi kong'alaal, ak ki nai icheek kole, kagogeer kaboorunet ne po kwong'eet eng' Hekaluut. Ki ng'alaaljine pichooto euut ak ki tep konamat kuut.

²³ Ak ye kingo keskei peetuusyegap otisyennyi, kwo kaa.

²⁴ Ak ye kingo pata peetuusyechooto komanach osotyonnyi Elizabeth ak kiunygei arawek muut, yeityo komwa kole,

²⁵ “Koyaiywo ko uu niito Kiptaiyat eng' peetuusyek che ki ibwaata, si koistoena sasisyet ne ting'eno piik.”

Mwaet agobo sigeetap Jeso

²⁶ Ki iyookto `Kamuktaindet malaikaiyat Gabriel eng' arawetap lo kwo nganaseet ne po Galilaya, ne kiguure Nazareth,

²⁷ kwo ole mi chepto pergeiya ne kiga kebwatererchi muren age ne kiguure Joseph, ne po kootap Daudi; ak ki kiguure pergeiyandanooto Maria.

²⁸ Ak ki nyo ole mi chebooto, ak koleenji, “Chamge, inyee ne ii chamat miising', mi Kiptaiyat kobooten.”

²⁹ Ago ki iimgei miising' ineendet eng' mwaonooto, ak ki ibwaat kole tos egu nee kagatyoni.

³⁰ Ak ki leenji malaikaiyat ineendet, “Meiywei, Maria: amu kainyooru chameet eng' Kamuktaindet.

³¹ Ak keero, imanachi, ak isich weeriit, ak tuun iguure kainennyi Jeso.

³² Egu ne oo ineendet ak tuun kiguuree Weeriitap Ineendet Ne Toroor Miising'; ak kogoochin `Kiptaiyat Kamuktaindet ng'echereetap laitornatet ne po kwandanyi Daudi:

³³ ak tuun laitorane kootap Jakobo koigeny; punjin laitornatennyi koigeny.”

³⁴ Ak ki leenji `Maria malaikaiyat, “Egundoi ano ng'olyoondoni, amu mangen muren?”

³⁵ Ak ki wolji malaikaiyat koleenji, “Nyonjinin Kabuuset ne Tiliil ak kouurin kamuktaetap Ineendet Ne Toroor Miising'; nooto anyun kiguure ne tiliil, Weeriitap Kamuktaindet, ineendet ne tuun kisichei.

³⁶ Ak keero, managaat agine Elizabeth tupcheng'ung', tuun sichei weeriit eng' osindanyi: ne po lo arawani eng' ineendet ne ki kiguure soon.

³⁷ Amu ma mi ng'olyoo ne punu Kamuktaindet ne ma kiim.”

³⁸ Ak ki le Maria, “Keero, aa chepto ne otwogindetap Kiptaiyat; ingeyaiywo ko uu ng'olyoondeng'ung'.” Ak ki wo malaikaiyat kobagaakta ineendet.

Korutochin `Maria Elisabeth

³⁹ Ki ng'eet anyun Maria eng' peetuusyechooto kwo kochaakta emetap tuloonook, agoi nganaseetap Judah;

⁴⁰ ak ki wo agoi kootap Zekariah ak kogat Elizabeth.

⁴¹ Ak ye kingo kas Elizabeth kagateetap Maria, kotoromben lakweet eng' moennyi; ki nyi anyun `Kabuuset ne Tiliil Elizabeth;

⁴² ak komwa eng' kutit ne oo, kole, “Ii iberuurot inyee eng' kobogorisyek, ak iberuurot ineendet ne isiche.

⁴³ Ak katepto ano kot anyooru niito, kot konyoonjo kametap Kiptaiyandennyu?

⁴⁴ Keero, ye ka ngo it iitiikyuk kutitap kagateng'ung', kotoromben lakweet eng' moennyu eng' poiboiyet.

⁴⁵ Ak paibai kobogoryondonooto iyani; amu tuun isuldoi tuguuk che ki kemwachi ineendet che punu Kiptaiyat.”

Tyendap Maria

⁴⁶ Ak ki le Maria, “Itoroori saboondanyu Kiptaiyat,

⁴⁷ Ak kagobaibait saboondanyu eng' Kamuktaindet Yetindennyu,

⁴⁸ amu kagogeer nyeraatyetap otwogindennyi. Ogeero, kobooch ra koguureno ibinwek tugul ne paibai,

⁴⁹ amu kagoyaiywo ineendet ne po kamuktaet tuguuk che eecheen; ak tiliil kainennyi.

⁵⁰ Tebyei rireenennyi eng' ibinda agoi ibinda eng' icheeget che konyiti ineendet.

⁵¹ Ki koboor kimnateet eng' eunnyi; ak kigoiyesta che menotik eng' kabwaatutigap mugulelwekwak.

⁵² Kagochoor pounik eng' ng'echerokwak, ak kagoeet che nyerootiin.

⁵³ Kagobae che amei rubeet tuguuk che myachen, ak kagoon mogoreek koba puch.

⁵⁴ Kagotoret otwogindennyi Israel, si kobwaat rireenetapkei,

⁵⁵ ko uu ye ki ng'alaalji kwanisyekyok, eng' Abraham ak iyotennyi agoi koigeny.”

⁵⁶ Ak ki tebi Maria ak Elizabeth neegit arawek somok; yeityo koweek kwo kaa.

Sigetap Johana

⁵⁷ Ki it anyun peetuut ne sigisye Elizabeth; kosich weeriit.

⁵⁸ Ak kogas piigap kokwennyi ak piigap ooreennyi kole kagoboorchi Kiptaiyat rireenennyi kwonyooto; ak kiboiboitu tugul.

⁵⁹ Ak kingo it peetuut ne po sisiit, kobwa icheek koyatita lakweet; kimachei koguure Zekariah, kemwaitae kainetap kwandanyi.

⁶⁰ Ak ki wol kamet kole, “Achicha; kiguure Johana.”

⁶¹ Ak ki leenji icheek ineendet, Ma mi chii eng' oreng'wong' ne keguure kainanooto.

⁶² Ki ng'alaaljine icheek euut kwanitap lakweet, koteebe kainet ne machei ketoochi.

⁶³ Kosoom kiit ne kisirei, ak kisir kole, “Johana kainennyi.” Ak ki kwong'yo tugul.

⁶⁴ Koyaatak anyun kutinnyi sainooto, ak kotyagak ng'elyeptanyi, ak kitwek kolas Kamuktaindet.

⁶⁵ Ak ki nyoonji kaiyweisyet tugul che ki menyei komoswekwak; ak ki kimwaita ng'aleechuuto tugul koyom emetap tuloonook ne po Judea.

⁶⁶ Ak kigonoree mugulelwekwak ng'aleechooto icheek tugul che ki kas, kole, “Tuun egu nee anyun lakwani?” Amu ki mi kobooto ineendet eutap Kiptaiyat.

Maonatetap Zekariah

⁶⁷ Ki nyi anyun Kabuuset ne Tiliil kwandanyi Zekariah, ak ki maoten, kole:

⁶⁸ “Iberuurot Kiptaiyat, Kamuktaindet ne po Israel; amu kagorutoochi piikyik ak koyachi katyaget icheek,

⁶⁹ Kagong'eetwech kuinetap yetunet eng' kootap Daudi kiboityondennyi

⁷⁰ Ko uu ye ki mwa eng' kutusweegap maotikyik che tiliileen che ki mi kobooch ko kagitoi ng'wony,

⁷¹ si kosarwech eng' puunikyok ak eng' eunegap tugul che wechech.

⁷² Si koriiree kwanisyekyok, ak kobwaat kayomisennyi ne tiliil;

⁷³ kayosyet ne ki iyasyechi kwandanyo Abraham, kole koonech

⁷⁴ si kobiit kogoonech, ko kagosarwech eng' eunegap puunikyok, keboisyechi ineendet ama eng' kaiyweisyet,

⁷⁵ eng' tiliilindo ak eng' imanda eng' tainnyi eng' peetuusyekyok tugul.

⁷⁶ Ee lakwani, kigurenen maotyotap Ineendet Ne Toroor Miising'; amu iwendi eng' taitap Kiptaiyat indoi, si kobiit ichop ortinwekyik,

⁷⁷ si igoochi piikyik naet ne po yetunet eng' nyoetap kaat ne po tengekwogikwak,

⁷⁸ amu muguleldo ne rireegei ne po Kamuktaindet nenyo, si kochorchech lapkeiyet ne punu parak,

⁷⁹ si koluuchi icheeget che tebyei eng' mesundeito ak che mi urwetap meet; si kondochi keelyekyok kot koit ooreetap kaalyeet.”

⁸⁰ Ak ki ner lakwanooto, ak kotesak kogimit eng' saboondo, ak ki meng'ooti surkwen agoi peetuut ne ki iboorchigei Israel.