KOMONG'U 4 - Bukuit Ne Tilil

Kotaachei Musa Kamuktaet ne oo kobun Kamuktaindet ne Toroor.

¹ Ki wolji anyun Musa koleenji, “Ma iyana anan kogas iit kutinnyu pichooto? Amu mwaei koleen, ‘Ma iboorungei Kamuktaindet ne Toroor.’ ”

² koteebee Kamuktaindet ne Toroor koleenji, “Nee no itinye eng' euut?” Kowol kole; “Kirokto.”

³ Koleenji Kamuktaindet, “Wirchi ng'wony.” Ak kingo wiirchi ng'wony kowalak koek ereneet, ak ki mwee Musa.

⁴ Ak ki leenji `Kamuktaindet ne Toroor Musa; “Iyogoite eung'ung', ak inam katutyennyi.” Ki iyogoito eunnyi anyun Musa, ak konam, ak kiwalak koek kirokto eng' eunnyi.

⁵ “Si kobiit koyan icheek kole, ki iboorungei Kamuktaindet ne po Toroornatet, ne po kwanisyekwok Kamuktaindetap Abraham, Kamuktaindetap Isak ak Kamuktaindetap Jakobo.”

⁶ Ak ki leenji Kamuktaindet ne Toroor kogeny, “Irooch euut tegeng'ung'.” Kingo rooch eunnyi tegeet ak kocher, ogeero, ki tinyei eunnyi mogondosaik, ak kiwalak koleelit ko uu teluji.

⁷ Koleenji Kamuktaindet; “Ketite euut irookte tegeng'ung'.” Ki iweech Musa euut korookto tegeennyi ak ye kingo nem, ko kagomyeeit ko uu yegai.

⁸ “Ngo ma kasin, anan ngo ma iyan kaboorunet ne po tai, komuuchi koyan kaboorunet ne po let.

⁹ Ago, ngo ma iyan kaboorunoichuuto aeng', anan ngo ma kas kuting'ung', isilu anyun peek eng' aineet ak iroong'ji ng'wony ole yaamaat. Walaksei peechooto kerame aineet koegu korotiik eng' emet ne yaamaat.”

¹⁰ Ago ki leenji `Musa Kamuktaindet ne Toroor, “Ee, Kiptaiyannyu, mangen ang'alaal kobooch keny agoi raini ing'alaalwo, amu nyigiis ng'eleptanyu ak ko ua kuut.”

¹¹ Ak kiteebe `Kamuktaindet ne Toroor ineendet koleenji; “Ng'oo ne kiyaei kutitap chii? Anan ne yaei chii konamak kuut, anan kotimak, anan si kogeerto, anan kogor? Tos ma anee Kamuktaindet ne Toroor?

¹² Ara anyun, tau panda ui, ami kobooten eng' ng'alaaleng'ung', ak aneetiin che kanyool imwa.”

¹³ Ago ki le Musa, “Ee, Kamuktaindet, asaain ale, iyookte chii age ne imache iyookte.”

¹⁴ Ki koromitu nereegegap Kamuktaindet ne Toroor eng' Musa, ak ki leenji, “Tos ma mi ng'eetap komet Aron lawindet? Angen ale imuuchi kong'alaal komyee. Nyoonei ineendet agine kotorogun, ak ye kerin ineendet koboiboitu eng' muguleldanyi.

¹⁵ Ing'alaaljini ineendet ak imwachi ng'aleek che mwaei. Ami anee kobooten eng' ng'alaaleng'ung', ak eng' ng'alaalennyi, ak aneetaak ne kanyool oyai.

¹⁶ Egu ineendet kuting'ung', ng'alaalindet ne ng'alaaljin piik, ak iigei inyee kamuktaindet eng' ineendet.

¹⁷ Ara anyun, ibote inyee kirogi eng' eung'ung' si koek ne iyae kaboorunoik.”

¹⁸ Kingo pata koweek Musa kwo kap `Jethro; kapyugoinnyi ak koleenji, “Kaigai chamwo awo, aweekyigei ole mi piikyuk eng' Misiri, ageer ngo ta kosaptos.” Ak ki leenji Jethro Musa, “Ui eng' kaalyeet.”

¹⁹ Kingo ta komiitei Musa oliin po Midian kong'alaalji Kamuktaindet ne Toroor koleenji, “Ui, ketitegei Misiri amu ki kobek piik tugul che ki cheeng'ei kobarin.”

²⁰ Ki imut Musa osotyonnyi ak weeriikyik ak kolaany sigiryet, yeityo konaam panda koweek kwo emetap Misiri. Ak ki ip anyun Musa kirokto ne po Kamuktaindet eng' eunnyi.

²¹ Ki leenji `Kamuktaindet ne Toroor Musa; “Ye igetitegei Misiri, iriip ak iyai eng' taitap Pharaoh kwang'utik tugul cho koagoonin kimnateet iyai. Ago auuiiti muguleldanyi, si ma igoochi piik koba.

²² Ileenjini Pharaoh, ‘Kamwa ko uu ni Kamuktaindet ne Toroor, Weeriinnyu Israel ak ko taitanyu,

²³ ak kaamwaun aleenjin, Igoochi weeriinnyu kwo, si kobiit koboisyeiwo. Ago amu kaiete kwo, abare anyun taitang'ung'.’ ”

²⁴ Ye kita komi kootap toek eng' ooreet kowendi, kotuiye `Kamuktaindet ne Toroor Musa ak kimach kobar ineendet.

²⁵ Ki nam anyun Ziporah koita ne ng'atip, koyatitae weeriinnyi ak koting'e iriryot keelyegap Musa. Yeityo kole, “Iman ii manong'otyondennyu ne po korotiik.”

²⁶ Ki pagaakta `Kamuktaindet ne Toroor ineendet. Ak ki le osotyondonooto, “Ii manong'otyot ne po korotiik, amu kamuratanet.”

²⁷ Ki leenji `Kamuktaindet ne Toroor Aron, “Ui, torookte Musa eng' surkwen.” Ki wo anyun, ak kituiyechi tulweetap Kamuktaindet ak kitorooch ineendet.

²⁸ Ak ki mwachi `Musa Aron ng'aleek tugul che po Kamuktaindet ne Toroor che kiga koyooktoe, ak kaboorunoik tugul che kiga koyomisyi.

²⁹ Yetyo koba Musa ak Aron koyum poisyek tugul che po piigap Israel.

³⁰ Ki mwa anyun Aron ng'aleek tugul che kiga komwachi `Kamuktaindet ne Toroor Musa, ak ki yai kaboorunoik eng' taitap piik tugul,

³¹ ak ki iyan piik. Ak ye kingo kas kole kagonyonji `Kamuktaindet ne Toroor piigap Israel, ak kogogeer nyalilwogikwak, kong'uruukso kosa anyun.