KOMONG'U 39 - Bukuit Ne Tilil

Ngoroigap tiseinateet

¹ Ki yai pichooto ngoroik che ki kisal kogororonitu eng' tuguuk che buluu, che arusen ne piriir ak eng' che piriireen, si keboisyee eng' ole-tiliil. Kinapchi `icheek Aron ngoroik che itabaanatiin ko uu ye kiga ng'at `Kamuktaindet ne Toroor Musa.

² Ki yai Ephod ne po thahabu, eng' rangiik che buluu, che arusen ne piriir, che piriireen ak eng' katanit ne karaaran ne ki kileet.

³ Ki itaany thahabu koterteeritu yeityo korar koigei tapsinok, si kobiit kochuljulot eng' che buluu, eng' che arusen ne piriir, eng' che piriireen ak eng' katanit ne karaaran, nooto poisyetap laindet ne ng'oom.

⁴ Kinapchi kioto kebeberwegap tigigoik, che ki kiropchin koek agenge. Ki kituiyo eng' luukwekyik aeng'.

⁵ Ole kiga kiyaita pireneet, kogiu ole ki kiyaita ephod keyae thahabu, che buluu, che arusen ne piriir, che piriireen ak che po katanit ne karaaran ne ki kileet ko uu ye kiga ng'at `Kamuktaindet ne Toroor Musa.

⁶ Ki wai koik che kiguure soam, che ki kindeat thahabu che ki kitogul, si konam. Ki kisirchi koichooto kainaigap piigap Israel kogergeit ak waet ne po ng'ookset.

⁷ Ki inde koichooto ephod ole po tigigoik, koek koigap kabwaatet agobo piigap Israel; ko uu ye kiga ng'at `Kamuktaindet ne Toroor Musa.

⁸ Ki yai ngoryeetap tegeet, poisyetap musogindet ne ng'oom, ko uu poisyetap ephod, eng' thahabu ak eng' che buluu, eng' che arusen ne piriir, eng' che piriireen ak katanit ne karaaran ne ki kileet.

⁹ Ki aechin tebeesindo ak koindo ak ki kiliich ngoryonooto po tegeet koek aeng'. Ki ek koindonyi ak tebeesindannyi olo po sendimita tiptem ak aeng' eng' tiptem ak aeng' ko kagiliich.

¹⁰ Kitetyi kioto ortinwek ang'wan che po koik che po kamanuut. Ki inde ooreet ne po tai sardio, topasio ak bareqet.

¹¹ Konde ooreet ne po aeng', sumaragdo, sapphire ak yaholom.

¹² Eng' ooreet ne po somok ko ki inde, huakinto, sebu ak ametusto.

¹³ Ooreet ne po ang'wan ko ki inde, berulo, soam ak jasipi. Ki kiroogot koichooto kelongonigap thahabu che ki kitogul.

¹⁴ Kite koichooto kainaigap piigap Israel. Ki taman ak aeng', ko uu kainaikwak, ko uu waetap ng'ookset. Ki kisirchi koita age tugul kainennyi, kobee ortinwek taman ak aeng' che po piigap Israel.

¹⁵ Kinapchi ngoryonooto po tegeet sirimwek che uu rogoonik che po thahabu che tiliileen, che ki kilet.

¹⁶ Kitagul thahabu koek morik aeng', ak ki yai peteinik aeng' che po thahabu ak konde peteinichooto tabanwegap luukwek aeng' che po ngoryonooto po tegeet.

¹⁷ Ki irookto sirimwechooto aeng' po thahabu che ki kilet peteinichooto aeng' che mi tabanwegap luukwek aeng', che po ngoryonooto po tegeet.

¹⁸ Ki nam komoswechuun alak aeng' che po sirimwechooto aeng' ki kilet ak korooch kelongonik aeng' che ki kitagul, yeityo kotuiyo ak ephod eng' komostap tigigoik ole tabanu tai.

¹⁹ Ki yai peteinik aeng' che po thahabu ak konapchi ngoryonooto po tegeet ole po luukwek aeng', eng' tabanwekyik che tabanu komostap oriit eng' ephod keel.

²⁰ Ki yai peteinik aeng' che po thahabu ak konapchi tuguuchooto tigigoigap ephod eng' ole po keel, ole tabanu tai eng' ole neegitee ye ki kituiye, eng' paragutap pirenonooto po ephod, ne ki kinap eng' ng'omnateet.

²¹ Ki igiich icheek ngoryeetap tegeet eng' peteinikyik, koratyin ak peteinigap ephod, korate rogoet ne buluu, si kotebee paragutap pireneet ne ki kila eng' ng'omnateet, si ma peesyo ngoryeetap tegeet ak ephod; ko uu ye kiga ng'at `Kamuktaindet ne Toroor Musa.

²² Kinap ngoryeet ne kiroochegei, ne po ephod, ne ki kisal konyalilit ne ais tugul, ne poisyetap laindet,

²³ ak kinap ngoryonooto kween ole chutei metit, ko uu ye kichobei ngoryeet ne po lugeet ak ki kigurman kong'ata si ma kereer.

²⁴ Kinapchi ngoryonooto tabandap keel logoek che buluu, che arusen ne piriir, che piriireen ak che po katanit ne ki kila.

²⁵ Ki itaany cheptingilook che po thahabu che tiliileen, ak ki ing'olate cheptingilochooto logoek, koyiem kelutap ngoryeet,

²⁶ ye ki inde cheptingilyet, ko ki inde logoiyat korupkei ak kirubatkei ko uu nooto agoi, eng' tabandap ngoryeet komugul, si keboisyee; ko uu ye kiga ng'at `Kamuktaindet ne Toroor Musa.

²⁷ Kinap ngoroik che kooen che po katanit ne karaaran che ki kila kobunji Aron ak weeriikyik,

²⁸ ak chepkulet ne po katanit ne karaaran, chepkuloik che myachen che mengeechen che po katanit ne karaaran, sulwalisyek che po katanit ne karaaran ne ki kileet,

²⁹ ak pireneet ne po katanit ne karaaran ne ki kileet, ne po che buluu, che arusen ne piriir ak che piriireen, nooto poisyetap nabiindet ne ng'oom; ko uu ye kiga ng'at `Kamuktaindet ne Toroor Musa.

³⁰ Ki itaany naaryeet ne tiliil, eng' thahabu che korooron ak ki sirchi siruutik kogergeit ak waet ne po ng'ookset kole, “Tiliil eng' Kamuktaindet ne Toroor.”

³¹ Kiratyi rogoet ne buluu, kotebee chepkulet ole po togoch, ko uu ye kiga ng'at `Kamuktaindet ne Toroor Musa.

Kogesugei poisyet

³² Ki igeskei anyun poisyonik tugul che po kootap emait ne kituiyechin. Ak ki yai piigap Israel ko uu tugul che ki ng'at `Kamuktaindet ne Toroor Musa.

³³ Yeityo koipchi `icheek emaitap Kamuktaindet Musa, ne Emait, ak tuguukyik tugul ak kariikyik che kiname angook, pagoinikyik, rateiywekyik, lumeiywekyik, kong'iikwak che tononie,

³⁴ emaitap magatogap mengichik, che ki kisal kobiriritu, emait ne po magatogap mengichigap peek ak angeet ne kioiye koot oriit,

³⁵ moingetap paornateet, keetiikyik che ki ibe, ak kerwetap rireenet,

³⁶ meset ak tuguukyik tugul ak magatiinik che itabaanatiin,

³⁷ keeldo ne tiliil ne po tait kobooto taisyekyik, agot taisyek che kitetei komyee ak tuguukyik tugul, ak mwanigap kiit ne ikweng'sei,

³⁸ kapkorosutap thahabu, mwaita ne ki ilse, nyamdutik che kibeelei che ng'uu ne anyiny, ak angeet ne kisonginine kurgeetap Emait,

³⁹ kaptisisyetap sugunwet, karnennyi ne ki kireger eng' sugunonik, keetiikyik che ki ibe ak tuguukyik tugul, taabeet ne kiuunse ak ng'echerennyi,

⁴⁰ angook che songinindos che po serumut ak lumeiywekyik ak kong'iikwak che tononi, angeet ne po kurgeetap seremut, rogoonikyik, tigongenikyik ak tuguuk tugul che po poisyetap emaitap Kamuktaindet, che po emait ne kituiyechin,

⁴¹ ak ngoroik che ki kisal kogororonitu si keboisyee eng' ole-tiliil, ngoroik che itabaanatiin che po tisiindet Aron ak ngoroigap weeriikyik, si kobiit kobois eng' tisiisyet.

⁴² Ki yai anyun piigap Israel poisyet tugul ne ki ng'at `Kamuktaindet ne Toroor Musa.

⁴³ Kigeerot Musa poisyonichooto tugul, ak ki keer kole kiga koyai kogees anyun pichooto ko uu ye ki kang'at Kamuktaindet ne Toroor. Ara ki iberuur anyun `Musa icheek.