KOMONG'U 38 - Bukuit Ne Tilil

Kaptisisyet ole kibeelee tiseiywek.

¹ Ki yai kaptisisyet ole kibeelee tiseiywot eng' keetiigap chebitoik. Ki achin koindonyi ak tebeesindannyi ko mitainik aeng' ak robo eng' mitainik aeng' ak robo ak tononennyi kogimitait agenge ak robo.

² Ki yai kosikyi kuinoik eng' luukwekyik ang'wan, ki kitaany kuinoikyik konamgei ak kioto, ak ki iliige sugunwet.

³ Ki itaany tuguuk tugul che po kaptisisyet, tereenik, kechigok che eecheen, taabook che mengeechen, kariik che kirutunee panyeek ak taabook che ki ibe maat. Ki itaany tuguukyik tugul eng' sugunwet.

⁴ Ki yachi kaptisyet sugunonik che kiregeri, eng' kapkelyenutap mireiywot ne yiemei kaptisisyet keel, si komuurmuur kioto.

⁵ Ki itang'ji peteinik ang'wan luukwek ang'wan che po kioto po sugunwet ne ki kireger, si kirooch keetiik che ki ibe.

⁶ Ki yai keetichooto eng' chebitoik ak koliige sugunwet.

⁷ Ki irooch keetichooto peteinik oriit che mi komoswegap kaptisisyet si kobiit ketandane. Ki yai kioto koek moinget oriit.

⁸ Ki itaany taabeet ne po sugunwet, ak kiyae sugunwet ng'echerennyi ne tebee, kobun kioisyek che ki keeregei kwonyiik che kiboisyei eng' kurgeetap emait ne kituiyechin.

⁹ Ne rubei, ko ki yai seremut ne ng'ootaat ne ki po katanit ne karaaran ne ki kileet. Angook che tabanu murot tai ko ki mitainik artam ak ang'wan koindo,

¹⁰ ki tiptem lumeiywekwak ak ki tiptem kong'iikwak che po sugunonik che tononie. Ki po fedha ireusyegap lumeiywek kobooto rateiywekwak che kituiye.

¹¹ Ki mi angook murot kaataam che yamei mitainik artam ak ang'wan ak lumeiywekwak tiptem ak kong'iikwak che tononie tiptem che po sugunonik. Ki po fedha ireusyek che po lumeiywek kobooto rateiywekwak che kituiye.

¹² Eng' komosta ne tokyingei cherongo, ko ki mi angook che yamei mitainik tiptem ak aeng', lumeiywekwak taman ak kong'iikwak che tononie taman. Ki po fedha ireusyegap lumeiywek kobooto rateiywekwak che kituiye.

¹³ Kitabanu komostap kong'asiis angook che yamei mitainik tiptem ak aeng'.

¹⁴ Ki mitainik lo ak kebeberyat angook che po kurgeet komosta age ak ki tinyei lumeiywekwak somok, ak kong'iikwak somok,

¹⁵ ak ki iliige nooto komosta ne po aeng'. Ki mi kurgeet ne po seremut komosi ak komosi angook che yamei mitainik lo ak kebeberyat, lumeiywekwak somok ak kong'iikwak somok.

¹⁶ Angook tugul che kiyiemei seremut ko ki po katanit ne karaaran ne ki kileet.

¹⁷ Ki po sugung'iik che kitononie lumeiywek, ak ki po fedha ireusyek che po lumeiywek kobooto rateiywekwak che kituiye. Ki tuge fedha metowegap lumeiywechooto. Rateiywek che ki kituiyote lumeiywek tugul che po seremut ko ki po fedha.

¹⁸ Ki nap nabiindet konde lelesta angeet ne po kurgeetap seremunooto ng'ootaat eng' che buluu, eng' che arusen ne piriir, eng' che piriireen ak eng' katanit ne karaaran ne ki kileet. Ki ek koindonyi mitainik sogool ak ki po mitainik aeng' tononennyi ak tebeesindanyi ko uu angoogap seremut.

¹⁹ Ki po sugunonik lumeiywekwak ang'wanu ak kong'iikwak ang'wan che tononie. Ki po fedha ireusyekwak ak ki kituge fedha metowegap lumeiywekwak ak rateiywekwak che kiga kituiyote.

²⁰ Ki po sugunonik tigongenik tugul che po emaitap Kamuktaindet ak tigongenik tugul che yiemei seremut.

²¹ Koitetap tuguuk che po emaitap Kamuktaindet anyun chu, agot kootap paornateet ko uu ye ki kiit ko uu ng'atuutyetap Musa, kobunji poisyetap Lawiik eng' eutap Ithamar, weeriitap Aron tisiindet.

²² Ak ki yai Bezalel, weeriitap Uri, weeriitap Hur, ne po ooreetap Judah tuguuk tugul che ki ng'at `Kamuktaindet ne Toroor Musa.

²³ Ki mi ak ineendet Aholiab weeriitap Aisamak, ne po ooreetap Dan, musogindet, laindet ne ng'oom, ak ko nabiindet ne nabei koindoi lelesta, eng' che buluu, eng' che arusen ne piriir, eng' che piriireen ak eng' katanit ne karaaran.

²⁴ Ki ek thahabu tugul che ki kiboisyee eng' poisyet tugul ne po ole-tiliil, agot thahabu che po kagoochinet, keruutik pogol sisiit ak tamanwogik tisap ak tisap ak kramuisyek pogol somok, chooto ko uu eng' kereetap tuguugap ole-tiliil.

²⁵ Fedhaisyegap icheeget che ki kiit che po tuiyet, ko ki yamei keruutik eliphuusyek somok ak taman ak tisap ak kramuisyek pogol tisap ak konom, chooto ko uu eng' kereetap tuguugap ole-tiliil.

²⁶ Ki kon chii tugul beka, ko uu kereetap tuguugap ole-tiliil, eng' chii age tugul ne ki siirtoi kowendi ole mi che kagiit eng' murenik tugul, che po kenyiisyek tiptem ak koba tai; murenik eliphuusyek pogol lo ak somok ak pogol muut ak konom.

²⁷ Keruutik eliphuusyek somok che po fedha ko ki kitaanyi kobwa kong'iik che uu kelongonik che po ole-tiliil ak kong'iik pogol che tononie lumeiywegap angeet ne ki kioiye koot, yamegei konda agenge ak keruutik sosom.

²⁸ Ki itaany keruutik taman ak tisap ak kramuisyek tamanwogik tisap ak muut koek ireusyek che po lumeiywek ak kotuge fedha metowekwak ak koyachi rateiywek che ki kituiyote.

²⁹ Kiyamei keruutik eliphuusyek aeng' pogol agenge ak tiptem ak ang'wan che po sugunwet ne po kagoochinet.

³⁰ Ki itaany chuuto Bezalel koek kong'iik che po kurgeet che tononie lumeiywegap emait ne kituiyechin, kaptisisyet ne ki kitang'e sugunwet, karnennyi ne ki kireger eng' sugunonik, tuguuk tugul che po kaptisisyet,

³¹ kong'iik che tononie lumeiywegap seremut, tigongenik tugul che po koot ak tigongenik tugul che yiemei seremut.