KOMONG'U 32 - Bukuit Ne Tilil

Kanamwetap moita ne ki kitaanye thahabu

¹ Ye kingo keer piik kole kagogagei Musa eng' tulweet ama choorgei, kotuiyechi ole mi Aron ak koleenji, “Ng'eet yaiywech kanamonik che pendi kondoi eng' acheek, amu ma kingen kiit ne kinyoor Musa-iniito, chiichooto ki imutwech kemang'une emetap Misiri.”

² Koleenji `Aron pichooto, “Ocherunee munaogap thahabu osotikwok, weeriikwok ak tiibiikwok che tinyei eng' itiik ak oibwa.”

³ Ki icher piik tugul anyun munaok tugul che po thahabu che ki mi itiikwak ak koipchi Aron.

⁴ Kitaach tuguuchooto kobunu eunekwak. Yeityo kobeel kochotyo ak kochop eng' karnet ne kiboisyee kotany kanamwet ne po moita. Ak ki mwa piik eng' poiboiyet kole, “Kanamoniguk chu, inyee Israel, che ki imutun imang'une emetap Misiri!”

⁵ Ye kingo keer Aron poiboiyennywa, koteech kaptisisyet eng' taitap kanamwonooto ak komwaita kole, “Egu igoorto ne oo mutai eng' Kamuktaindet ne Toroor.”

⁶ Ki ng'eetyo karon miising' eng' peetuut ne ki isubi peetuunooto ak kogoito kagoochinoik che kibeelei. Ki ip kagoochinoigap kaalyeet, ak ki tep ng'wony piik koamis, koeeiso ak kong'eetyo kourerenso.

⁷ Ki ng'alaalji `Kamuktaindet ne Toroor Musa koleenji, “Ui, choortegei; amu kagong'emgei piiguk che ki imutu komang'une emetap Misiri.

⁸ Kagosip komasta kometo ooreet ne kiga ang'atyi. Kagoyachigei kanamwet ne po moita ne ki kitaany, ak kogutung'ji, ak kagoeng'ji tiseiywot, ak koleen, ‘Kanamoniguk chu, inyee Israel, che ki imutun imang'une emetap Misiri.’ ”

⁹ Ki testai Kamuktaindet ne Toroor kong'alaalji Musa ak koleenji, “Koageer ale, uueen kaat pichu.

¹⁰ Pagaakta anyun, si kolaany parak nereegekyuk agobo icheek ak awong'u pichuuto. Yeityo ayain inyee iegu pororyet ne oo.”

¹¹ Ki igaigai `Musa Kamuktaindet ne Toroor Kamuktaindennyi, koleenji, “Ee, Kamuktaindet ne Toroor, amu nee si kolalyo nereegeguk agobo piiguk che ki imutu komang'une emetap Misiri eng' kimnateet ne oo ak eng' euut ne kiim?

¹² Amu nee si komwa tuun Misiriik kole, ‘Kiga imutyin icheek yaityet kole si kobar eng' tuloonook, ak kowong' kobetyo eng' ng'wony?’ Ketite nereegeguk che laldos ak iwal kii ya koistoegei piiguk.

¹³ Ibwaat Abraham, Isak, ak Israel, otwogiguk che ki iyasyechi inyegei, ileenji, ‘Abaroi iyoteng'wong' kotenit kecheigap kipsengwet ak agoochini iyoteng'wong' emoni komugul ne ki amwaiwok ak kobunji icheek koigeny.’ ”

¹⁴ Ki wol anyun `Kamuktaindet ne Toroor kabwaatutikyik agobo yaityonooto ki kamwa kole yachin piikyik.

¹⁵ Ki weigei Musa kochoortagei eng' tulweet, koibe eunnyi koik aeng' che lebeleen che po paornateet. Ki siraatiin koichooto komoswek tuwai, amu kiga kisir tai ak patai.

¹⁶ Ki poisyetap Kamuktaindet koichooto ak siruutichooto ko ki siruutigap Kamuktaindet che ki kagisir kewai eng' koichooto.

¹⁷ Ye kingo kas Joshua polatetap piik koboldos, koleenji Musa, “Mi polatetap pooryeet nganaseet.”

¹⁸ Ago ki le Musa, “Ma po kutinooto icheeget che poldos amu kagoterteeris ama po che poldos amu kagiterter, ago po polatonooto agase icheeget che tyendos.”

¹⁹ Ye kingo riik nganaseet ak kogeer kanamwetap moita ak ureryet, konereech miising' Musa. Ki wiirta anyun koichooto ki tinyei eng' eunekyik, kotui eng' tulweet keel.

²⁰ Ki nam kanamwonooto po moita ne kiga kotany, ak kobeel eng' ma, yeityo kong'a kotambululitu ak koseerchi peek parak ak kobirchi piigap Israel koe.

²¹ Ki leenji `Musa Aron, “Nee ne kiyaun pichu kot iipchi icheek tengegi oo tee ni?”

²² Kowol Aron kole, “Amat konereech miising' kiptaiyandennyu, ingen inyee pichu ile ki kotokyigei yaityet.

²³ Amu ki leenjo, ‘Yaiywech kanamonik, che pendi kondoenech, amu Musa-iniito, chiito ne ki imutwech kemang'une emetap Misiri koma kingen kiit ne kinyoor.’

²⁴ Ara ki aleenji icheek, ‘Ingocher chii age tugul thahabu che tinyei, ak kogoono.’ Ki awirchi ma, ak ki mong' moi.”

²⁵ Ye kingo keer Musa kole kabistoe piik, amu ki igoochi `Aron icheek kobistoe si koek che kireenyei eng' kwenutap puunikwak,

²⁶ kotonon anyun eng' ormariichetap nganaseet ak kole, “Ingonyo age tugul ole ami ne mi komostap Kamuktaindet ne Toroor.” Ak ki pwanji ineendet tugul che po ooreetap Lawi.

²⁷ Yeityo koleenji `ineendet icheek, “Kamwa ko uu ni Kamuktaindet ne Toroor, Kamuktaindetap Israel kole, ‘Ingorat chii age tugul rotwennyi po chok ak ingwo chii tugul komosi ak komosi kobun kwenutap kurgeet age agoi kurgeet age, eng' nganaseet komugul, ak kobar chii tugul ne tupcho, chorwennyi ak chiitap kokwennyi.’ ”

²⁸ Ki yai weeriigap Lawi ko uu ng'olyootap Musa. Ki pek piik peetuunooto che itei eliphuusyek somok.

²⁹ Ak ki le Musa, “Kaotabaanjigei Kamuktaindet ne Toroor rani chii tugul ne ma namegei ak weeriinnyi anan ne tupcho, si kogoonok ineendet perurto rani.”

³⁰ Eng' peetuut ne ki isubi, koleenji `Musa piik, “Ki oyai tengekto ne oo. Katogoste anyun nguno awe ole mi Kamuktaindet ne Toroor, tamangap ayai kagaigaet agobo tengektong'wong'.”

³¹ Kiweekyigei `Musa Kamuktaindet ne Toroor ak koleenji, “Pwo! Ki yai pichu tengekto ne oo miising', ak ki koyachigei kanamwet ne po thahabu.

³² Ago ngot icham, nguno, inyochigaat tengektonywa. Ngo ma uu nooto, asoomin ale iistaa eng' bukuing'ung' ne ki isir.”

³³ Ago ki leenji `Kamuktaindet ne Toroor Musa, “Aistoi eng' bukuinnyu age tugul ne ki koyaiywo tengekto.

³⁴ Ui anyun nguno, indochi piik koba kot koit ole ki amwaun. Keero, indoun malaikaiyandennyu. Agot nganda uu nooto, ko eng' peetuut ne arwookyini, arwookyini amu tengektonywa.”

³⁵ Ki pir anyun `Kamuktaindet ne Toroor piik amu ki ilas kanamwetap moita ne ki yai Aron.