KOMONG'U 30 - Bukuit Ne Tilil

Kaptisisyetap Nyamdutik che kibeelei

¹ “Iyae anyun kaptisisyet ole kibeelee nyamdutik iyae keetiigap chebitoik.

² Ingoek koindonyi ak tebeesindanyi sendimita artam ak muut. Aechindos koindo ak tebeesindo. Koindap tononennyi ko egu sendimita tamanwogik sogool. Namegei kapkorosuut ak kuinoikyik koegu kiit agenge.

³ Iliige thahabu che tiliileen paragunnyi ak komoswekyik tugul ak kuinoikyik. Yeityo itaany tegeleiywotap thahabu iyieme.

⁴ Itaany peteinik aeng' che po thahabu ak inde tuguuchooto koobeesyo tegeleiywot keel eng' tegeet ne po komosi ak ne po komosin, iyachi komoswek tuwai si koek ole kiroochi keetiik che ki ibe.

⁵ Yae keetichooto ki ibe keetiigap chebitoik ak iliige thahabu.

⁶ Indoi kaptisisyonooto taitap angeet ne ioitos koot, ye neegitee moingetap paornateet ne miitei taitap kerwet ne po rireenet ne mi paragutap paornateet ole kituiyechini ak inyee.

⁷ Peelei Aron nyamdutik che po tuguuk che ng'uu ne anyiny eng' olooto eng' karonet age tugul ye chobei taisyek,

⁸ ak peelei ineendet ye inaami taisyek koskoleny, koek nyamdutyet ne kibeelei eng' taitap Kamuktaindet ne Toroor eng' ibinwekwok tugul.

⁹ Amobeele olooto nyamdutik che teer anan tiseiywek che kibeelei anan che po peek. Amoroong'ji yooto kagoochinoik alak tugul che kiee.

¹⁰ Ingoyai Aron kagaigaet eng' kuinoigap kaptisisyonooto konyil agenge eng' kenyiit age tugul. Yaei kagaigaet eng' korotiigap kagoochinetap tengekto ne po kagaigaet konyil agenge eng' kenyiit age tugul eng' ibinwekwok tugul. Nooto ne tiliil miising' eng' taitap Kamuktaindet ne Toroor.”

¹¹ Ki ng'alaalji `Kamuktaindet ne Toroor Musa koleenji,

¹² “Ye iit piigap Israel ko uu eng' koiitennywa, ko eng' yooto anyun kogoochi chii tugul `Kamuktaindet ne Toroor kiit ne ityage saboondanyi si ma piit koroito eng' kwenunnywa ye iiti icheek.

¹³ Chu che koonu icheek: koonu chii age tugul kebebertap chepkondok ko uu chepkondogap ole-tiliil, ye siirtoi kowendi ole mi che kagiit. Egu kebebertap fedhaisyechooto kagoochinet ne punjin Kamuktaindet ne Toroor.

¹⁴ Igoochin chii age tugul Kamuktaindet ne Toroor kagoochinet, ne siirtoi kowendi ole mi che kagiit, che po kenyiisyek tiptem ak che siirei chooto.

¹⁵ Ingogon che kergei mogoryot kibananiat, koonu tugul kebebertap chepkondok, ye igoochin Kamuktaindet ne Toroor kagoochinet si oyai kagaigaet ne po saboonwekwok.

¹⁶ Taach fedha che po kagaigaet eng' piigap Israel ak igoite kobunji poisyetap emaitap tuiyet. Si koek nooto kabwaatet agobo piigap Israel eng' taitap Kamuktaindet ne Toroor si koyai kagaigaet agobo saboonwekwok.”

¹⁷ Ki ng'alaalji `Kamuktaindet ne Toroor Musa koleenji,

¹⁸ “Yai karait agine ne po sugunwet ak iyae sugunwet ng'echerennyi si kiuunse. Inde kwenutap Emait ne kituiyechin ak kaptisisyet ak iroong'ji peek.

¹⁹ Si koune Aron ak weeriikyik eunekwak ak keelyekwak.

²⁰ Iunegei icheek ye mandoi emait ne kituiyechin si ma pek anan ye riikyin kaptisisyet si kobois ye peelei kagoochinet ne kigoochin Kamuktaindet ne Toroor kobunei maat.

²¹ Iuni anyun eunekwak ak keelyekwak si ma pek, ak koek ng'atuutyet ne po agoi eng' icheek, eng' ineendet ak eng' iyotennyi eng' ibinwekwak tugul.”

²² Ki ng'alaalji `Kamuktaindet ne Toroor Musa kogeny koleenji,

²³ “Inemunote tuguuk che myachen kosiir, tuguuk che uu igomoik, keruutik lo ne po kumyat, keruutik somok ne po kinamon che anyiny, keruutik somok ne po kalamus che anyiny,

²⁴ ak keruutik lo che po kasia, ko uu che po ole-tiliil ak litaisyek ang'wan ne po mwaitap mseituni.

²⁵ Yeityo ichop tuguuchooto koburugogis koek mwaita ne tiliil ne ki iilse ne ng'uu ne anyiny ne poisyetap ng'amotyot ne puruchi tuguuk che ng'uu ne anyiny. Egu mwaita ne tiliil ne ki iilse.

²⁶ Iil emait ne kituiyechin eng' mwaita ak moinget ne po paornateet,

²⁷ ak meset ak tuguukyik tugul, keldap tait ak tuguukyik, kaptisisyet ne kibeelee nyamdutik,

²⁸ ak kaptisisyet ne kibeelee tiseiywot ak tuguukyik tugul ak taabeet ak kelunnyi.

²⁹ Itabaan anyun tuguuchooto si kotiliiliitu miising', ak kanyool kotiliilit age tugul ne twaei tuguuchooto.

³⁰ Iil Aron ak weeriikyik, ianyiny, si koboisyeiwo eng' tisiisyet.

³¹ Ak ing'alaalji piigap Israel ileenji, ‘Egu mwai eng' anee ne tiliil ne ki ilse eng' ibinwekwok tugul.

³² Ma kiroong'jin poortap chii age tugul mwai, amoyai mwai age ne uu niito. Amu tiliil niito ak egu ne tiliil eng' okweek.

³³ Chii age tugul ne puruchi mwai age tugul koigei niito anan chii age tugul ne iilee mwaiita toondet, king'etoi chiichooto eng' piikyik.’ ”

³⁴ Ki leenji `Kamuktaindet ne Toroor Musa, “Inemunote tuguuk che ng'uu ne anyiny, natab, shekelet, kelbena; tuguuk che ng'uu ne anyiny kobooto tuguuk che nyamdut che tiliileen: ingoaechin tugul eng' karagendoet agenge.

³⁵ Iyae eng' chooto nyamdutik, tuguuk che ng'uu ne anyiny, ne poisyetap ng'omnateet ne puruchi tuguuk che ng'uu ne anyiny che kitestoi muunyuk che tiliileen che ki kitabaan.

³⁶ Yeityo itui alak eng' chooto komengegitu ak inde chooto taitap paornateet eng' emait ne kituiyechin, ole kituiyechini ak inyee. Egu ne tiliil miising' eng' okweek.

³⁷ Amat oyachigei nyamdutik alak tugul che kergei ak chuuto. Egu ne tiliil eng' inyee ne po Kamuktaindet ne Toroor.

³⁸ Ngo yai chii age tugul alak che uu chooto kole kogas ng'uunennyi, king'etoi chiichooto eng' piikyik.”