KOMONG'U 26 - Bukuit Ne Tilil

Tuguuk che mi kootap tuiyet

¹ Ne siirei nooto anyun, ko teech emaitap Kamuktaindet iteeche angook taman che ki kinabee katanit ne karaaran ne ki kileet eng' che buluu. Ngo lelesan anyun angoonochooto nabiindet ne ng'oom kochooronji kerubisyek.

² Koindap angeet age tugul ko mitainik taman ak aeng' ak tebeesindo ko mitainik aeng'. Aechindos angoochooto tugul.

³ Kiropchindos angook muut ak keropchin angook alak muut ak icheek.

⁴ Napchi pelelutik che buluu eng' tabandap angeet age eng' ole kurmanat ak eng' ole kagituiyechi. Iyae ko uu nooto eng' tabandap angeet age ne tabanu parak eng' ole kagituiye ne po aeng'.

⁵ Napchi angeet age pelelutik konom ak inapchi pelelutik konom eng' tabandap angeet ne po aeng' eng' ole kagituiyechi; tokyindos pelelutik tugul.

⁶ Iyae kariik konom che po thahabu che kiname angook si ituiye angook karichooto si koek agenge emaitap Kamuktaindet.

⁷ Nap angook taman ak agenge inabe koroorigap ng'oroorek koek emait ne kituge emaitap Kamuktaindet.

⁸ Koindap angeet age tugul ko mitaitinik taman ak somok ak mitainik aeng' tebeesindap age tugul. Aechindos anyun angoonochooto tugul tamanu ak agenge.

⁹ Ituiye angook muut koek agenge ak ituiye alak lo koek agenge ak icheek yeityo iliich anganooto po lo eng' ole kimandoe eng' emait.

¹⁰ Yeityo iyachi pelelutik konom eng' tabandap angeet age ne tabanu parak eng' ole kituiyechin ak iyachi pelelutik konom eng' tabandap angeet ne po aeng' eng' ole kituiyechin.

¹¹ Ne rupei iyai kariik konom che po sugunonik ak irooch karichooto pelelutik si ituiye emait koek agenge.

¹² Kebeberta ne kang'etune ngetunenigap angoogap emait, kosonginine patetap emaitap Kamuktaindet.

¹³ Ko kebeberwek che ng'etune komoswek tuwai eng' kooindap angoogap emait, ko ingosongininso eng' komosi ak komosi si kobiit kotuch emaitap Kamuktaindet.

¹⁴ Inabe muiywegap mengichigap keechiirek che ki kisal kobiriritu si ketuge emait ak inap muiywegap mengichigap peek kotabon parak.

¹⁵ Iyae pagoinik che tonondos che po keetiigap chebitoik kobunji emaitap Kamuktaindet.

¹⁶ Iyae koek mitainik sisiit kooindap pagoiyot, tebeesindap pagoiyot age tugul ko sendimita tamanwogik lo ak lo.

¹⁷ Iyae pagoiyot age tugul konyoor ng'elyebwek aeng' che ki ituiyogei; yai ko uu nooto eng' pagoinik tugul che po emaitap Kamuktaindet.

¹⁸ Yai pagoinigap emaitap Kamuktaindet che itei tiptem ak inde ole tokyingei murot tai,

¹⁹ ak ibarbar fedha isikyi kong'iik artam si koobeesyo kapkelyenutap pagoinichooto tiptem, chutei ng'elyebwek aeng'u che po pagoiyot agenge kong'iik aeng' che mi kapkelyen. Chutei ko uu nooto ng'elyebwek aeng'u che po pagoiyot age kong'iik aeng' che mi kapkelyen,

²⁰ ak che po komosta age ne po koot ole tokyingei murot kaataam, inde pagoinik tiptem,

²¹ ak kong'iikwak artam che po fedha, kong'iik aeng' eng' kapkelyenutap pagoiyot age tugul.

²² Yai anyun pagoinik lo kobunji koot patai ole tokyingei cherongo.

²³ Yeityo iyai pagoinik aeng' kobunji luukwek che po ko che mi patai.

²⁴ Terchindos aeng' kobooch ng'wony agoi parak ago kituiye tugul peteiyot eng' parak. Kiyaei ko uu nooto eng' tuwai kindoi luukwek aeng'.

²⁵ Egu chooto anyun pagoinik sisiit ak kong'iikwak che po fedha taman ak lo: kong'iik aeng' eng' kapkelyenutap pagoiyot agenge ak kong'iik aeng' eng' kapkelyenutap pagoiyot age.

²⁶ Ak iyai eng' chebitoik keetiik che uu rateiywek; iyae muut che po pagoinik che po komosta agenge ne po emaitap Kamuktaindet,

²⁷ ak rateiywek muut che po pagoinik che po komosta age ne po emaitap Kamuktaindet ak rateiywek muut che po pagoinik che po komosta age ne po emaitap Kamuktaindet ne mi patai ole tokyingei cherongo.

²⁸ Ingobochit tabanda age agoi tabanda age rateiywot ne po kween ne muroksei ne mi kwenutap pagoinichooto.

²⁹ Iliige thahabu pagoinik ak iyai peteinikwak che po thahabu koek chooto ole kirooktoi rateiywek ak iliige rateiywechooto thahabu.

³⁰ Ingotonon anyun koyooto ko uu ye ki king'at ak kiboorun eng' tulweet.

³¹ Iyae angeet ne ki kioiye emaitap Kamuktaindet ne buluu ak ne aruus ne piriir, ne piriir ak katanit ne karaaran ne ki kileet. Kinapchin anganooto kerubisyek che poisyetap laindet ne ng'oom.

³² Isonginine lumeiywek ang'wan che po keetiigap chebitoik che kiliige thahabu; po thahabu ireusyekwak ak tonone lumeiywechooto kong'iik ang'wan che po fedha che ki kibal.

³³ Isonginine anganooto kapkelyenutap kariik che kiname angook ak iibu moinget ne po paornateet inde koot ne po oriit ne tilate angeet, si kopcheiywok anganooto ole-tiliil ak ole-tiliil miising'.

³⁴ Inde kerwet ne po rireenet moinget ne po paornateet eng' ole-tiliil miising'.

³⁵ Inde meset koot ne sip kemong'jin, angeet ne ki kioiye koot ak inde keldap tait kotoorchin ak meset eng' komostap murot tai eng' koot. Yeityo inde meset ole tokyingei murot kaataam.

³⁶ Nap angeet ne kigeree kurgeetap emait. Inabe ngoryoniito ne buluu, ne aruus ne piriir, ne piriir, ak katanit ne karaaran ne ki kileet, poisyetap chiito ne nabei kondai lelesta.

³⁷ Yeityo iyachi ngoryonooto lumeiywek muut che po keetiigap chebitoik ak iliige thahabu ak punjin thahabu ireusyekwak. Itang'ji eng' sugunwet kong'iik muut che kilolonda.