KOMONG'U 25 - Bukuit Ne Tilil

Konunoigap kootap Kamuktaindet

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel koibwa konunoik. Iname konunoichooto kobun chii age tugul ne ichirchirchin muguleldanyi kogoon konunoikyuk.”

³ Chu konunoik che itaache eng' icheek: thahabu, fedha ak sugunonik,

⁴ angook che buluu, che arusen ne piriir ak che piriireen, katanit ne karaaran ak che kiyae koroorigap ng'oroorek;

⁵ ak magatogap mengichik che ki kisal kobiriritu, kobooto magatogap mengichigap peek ak keetiik che uu chebitoik,

⁶ mwaitap kiit ne ikweng'sei, tuguuk che ng'uu ne anyiny che po mwaita ne kiilegei, che po nyamdutik che kibeelei,

⁷ koik che kiguure soam, koik che kitetyin ephod ak ngoryeet age ne kilaakyin tegeet.

⁸ Ko uu nooto kora, ko ingoteekwo ole-tiliil si ameny kwenunnywa.

⁹ Oyai ole teptoi emaitap Kamuktaindet ak ole teptoi tuguuk tugul che kindoi oriit ko uu ye aboorun.

¹⁰ Ingoyai piigap Israel moinget eng' keetiigap chebitoik, ne koindonyi ko sendimita pogol ak taman. Tebeesindanyi ko sendimita tamanwogik lo ak lo. Ingoek kooindap tononennyi sendimita tamanwogik lo ak lo.

¹¹ Iliige thahabu che tiliileen oriit ak parak ak itegele tegeleiywotap thahabu iyieme paragunnyi tugul.

¹² Itang'ji peteinik ang'wan che po thahabu ak inde peteinichooto luuita age tugul ne po moinget ole po keel. Indoi aeng' komosta age, inde aeng' komosta age.

¹³ Iyae keetiik che kiname che po chebitoik ak iliige thahabu.

¹⁴ Yeityo irookte keetichooto peteinik che mi tabanwegap moinget si koek che kitandane moingonooto.

¹⁵ Tebee keetichooto peteinigap moinget, ama kicheru eng' yooto.

¹⁶ Ak inde `paornateet ne agoonin moingonooto oriit.

¹⁷ Yeityo iyai kerwennyi ne po rireenet ne po thahabu che tiliileen; ne koindonyi ko sendimita pogol agenge ak taman ak tebeesindanyi ko tamanwogik lo ak lo.

¹⁸ Iyae kora kerubisyek aeng' eng' thahabu che kitaanyi eng' tabanwek aeng' che po kerwetap rireenet.

¹⁹ Yai kerubit age kotebee tabanda age ak inde age kotabon komosta age. Kinamdos kerwet ne po rireenet ak kerubit eng' tabanda age tugul.

²⁰ Itoorchingei togoochigap kerubisyek ak ko koegitu kebebaikwak koba parak, si kouure kebebaikwak kerwetap rireenet ak kotoorchigei togoochikwak, ko keerei kerwetap rireenet.

²¹ Inde kerwanooto po rireenet paragutap moinget ak inde moinget oriit paornateet ne tuun agoonin.

²² Yeityo ketuiye ak inyee eng' olooto ak keng'alaal kobooten ko katebee kerwanooto po rireenet parak, ami kwenutap kerubisyek aeng' che mi paragutap moingetap paornateet ak amwaun tuguuk tugul che ang'atiin agobo piigap Israel.

Magatiinik che itabaanatiin

²³ Iyae meset eng' keetiigap chebitoik. Koindonyi ko sendimita sosom ak sisiit, tebeesindanyi ko sendimita artam ak ang'wan ak ko sendimita tamanwogik lo ak lo kooindap tononennyi.

²⁴ Iliige thahabu che tiliileen ak itegele tegeleiywotap thahabu iyieme paragunnyi tugul.

²⁵ Chop tegeleiywot ne sendimita tamanwogik lo ak lo tebeesindanyi koyiem kioto ak iyai tegeleiywotap thahabu koyiem tabanwekyik tugul kotegel.

²⁶ Yachi peteinik ang'wan che po thahabu ak inde peteinichooto luukwek ang'wan, ole mi keelyekyik ang'wanu.

²⁷ Ingoriikyi peteinichooto tegeleiywot koek che chutei keetiik che ki ibe meset.

²⁸ Yai keetiik che po chebitoik ak iliige thahabu si kobiit keibe meset.

²⁹ Itaany thahabu che tiliileen iyai koek taabookyik, kechigosyekyik, kigombokyik ak tageiywekyik che kiroong'jine tuguuk.

³⁰ Inde magatiinik che itabaanatiin meset kotebee tainnyu kotugul.

Keldap tait.

³¹ Ak iyai keldap tait eng' thahabu che tiliileen. Iyae thahabu che kitaanyi keloto, kelunnyi ak toloitanyi; kigombokyik, mulonokyik, ak taaptokyik ak kiropchindos chooto tugul koek kiy agenge.

³² Sachei anyun mooriik koek lo eng' toloita nooto; sachei mooriik somogu eng' komosta age ne po keloto ak sachei mooriik somogu ko uu nooto eng' komosin.

³³ Tinyei temeet ne po komosta age kigombok somok che ki kiyai koigei taaptook che kiguure almond ak mulwet ak taapteet. Kotinyei ko uu nooto temeet ne po komosta nin age kigombok somok che ki kiyai koigei taptochooto kiguure almond ak mulwet ak taapteet. Kergeitu anyun eng' mooriik tugul lo che sage keloto komugul.

³⁴ Ak miitei ole po toloita ineendet kigombok ang'wan che ki kiyai kogergeit ak taaptogap almond kobooto mulonokyik ak tapokyik.

³⁵ Eng' ye kisage mooriik aeng'u, komi keel yooto mulwet ne ki kituiye koek kiy agenge. Mitoti anyun ko uu nooto eng' olda age tugul ole kisage mooriik tugul ko lo eng' keldap tait.

³⁶ Namegei mulonokwak ak mooriikwak koek kiy agenge. Kitang'e kioto komugul thahabu che tiliileen.

³⁷ Yeityo iyai taisyekyik tisap ak inam si kobiit kokweny ole mi.

³⁸ Yae kora thahabu che tiliileen kanameiywondennyi ak taabookyik che mengeechen.

³⁹ Iyae tainooto ak tuguuchuuto tugul thahabu che tiliileen che po keruutik sosom ak muut.

⁴⁰ Riip si iyai tugul ko uu kergeindenywa ne ki kiboorun eng' tulweet.