KOMONG'U 22 - Bukuit Ne Tilil

Ng'atuutik agobo riipseetap tuguuk

¹ “Ngo choor chii tany anan keechiir ak koeeny anan koalda, kogoonu tuuga muut kogeere tanyata anan ko keechiirek ang'wan kogeere keechiiryonooto.

² Ngenam choorindet kobutisyei komachei kochoorso ak kebar, koma mi tengektap korotiik eng' ineendet ne kabarei.

³ Ago ngebar ineendet ko kagochor asiis, komiitei tengektap korotiik eng' ineendet ne kabarei. Nyoljin choorindonooto kogeer che yamei, ngo ma tinyei kiy kealdoi ineendet amu choorsennyi.

⁴ Ngenyoorchi eunnyi kioto kachoor kota kosabei, ngo tany anan ngo sigiryo anan ngo keechiir, kogeeri konyil aeng'.

⁵ “Ngo yage chiito tennyi mbareetap chiito age anan ko mbareet ne po sabibuk, kogeerchin chiitap ko po mbareet tuguukyik che myachen che po mbareennyi, ak logoegap keetikyik che korooron.

⁶ “Ngo lal maat ak konam ng'ootweet si kobeel peek che mi mbar anan ko peek che iyumotiin anan kobeel mbareet, kogeeri iman chiito ne kainaami maat aseenet ne kagon maata.

⁷ “Ngo koochi chii age tugul chiitap kokwennyi chepkondok anan tuguuk kogonorchi ak kechoor eng' kootap chiichooto, ak ngenam choorindet, kogeeri choorindonooto konyil aeng'.

⁸ Ago ngo ma ki nam choorindet, konyonei anyun chiitap ko po koot taitap Kamuktaindet si kobiit kotook ngo ki nam tuguugap chiitap kokwennyi.

⁹ “Ngot komi tiyet age tugul agobo kiy age tugul; ngo ne po tany anan sigiryo anan keechiir anan ne po ingor anan kiy age tugul ne ki pet ak komaiytos piik aeng'u koleen age tugul, ‘Ineni,’ keibu anyun ng'aleekwak kobwa taitap kirwoogik. Ineendet ne mwaei kirwoogik kole tinyei leluut, kogeerchin chiitap kokwennyi konyil aeng'.

¹⁰ “Ngomanaakyi chii age tugul chiitap kokwennyi sigiryet anan eito anan keechiir anan tany age tugul, ak ngo me anan ngo myan anan ngekweri ama keer chii,

¹¹ kotebee kayosyetap Kamuktaindet ne Toroor kwenutap pichooto tuwai, si koboor iman kole ma choor tuguugap chiitap kokwennyi; ak koyan agine chiitap ko po, ak ma kigeeri kiy.

¹² Ago ngot ko ki kichoor iman, kogeerchin chiitap ko po che yamei.

¹³ Ngot ko ki nam tyony kotonaton, ingoip anyun tanyata nyoo koek paornateet. Ma koonu kiy kogeere nooto ki kibar.

¹⁴ “Ngosoom chii chiitap kokwennyi kiy koboisyee, ak ngo ng'emak anan ngo me ama mi chiitap ko po, kogeere age iman.

¹⁵ Ago ngo ki mi chiitap ko po, koma kigeeri. Ngo ki kikweri kobois si kigoito melekto, ko yamegei ak melekto kityo.

Ng'atuutik agobo atebeet.

¹⁶ “Ngo kaigai `chii pergeiyat ne tomo keyachi koito ak koruiyo ak ineendet, ko kogandoi tuguuk si kobiit kotun.

¹⁷ Ngo eesyo kwandap pergeiyandanooto eng' kimnateet, kogoitoi tuguuk che aechin ak che kigandoe pergeinik.

¹⁸ “Amemete poonindet kosap.

¹⁹ “Kibarei age tugul ne ruitos ak tyony.

²⁰ “Chii age tugul ne eeng'jin tiseiywot kamuktain age tugul ne ma Kamuktaindet ne Toroor, keng'emei kiwong'u.

²¹ “Ameyachi ne ya too anan inyaliil. Amu ki oo toek ak okweek eng' emetap Misiri.

²² Ameus kwony age tugul ne kagosiirtoe manong'otyonnyi anan lakwa ne ma tinyei sigiik.

²³ Ngius icheek eng' kiy age tugul ak koriircho, agasyini iman riirekwak,

²⁴ ak kolaany parak nereegekyuk ak abarenak rotwetap chok, si koek mosoogik osotikwok ak koek ponoon lagokwok.

²⁵ “Ngi pesenji piikyuk robiinik, che kibananook che mi kobooten, komat iyaach amemage icheek keljinet.

²⁶ Nginame pesendo ngoryeetap chiitap kokweng'ung', iweekyini kotom kororokto asiista,

²⁷ amu nooto kityo ngoryeet ne tugegei. Tos tugegei nee koruei? Ngo riircho agasyini amu atinye rireenet.

²⁸ “Amat isas Kamuktaindet. Amat ichup pounindetap piiguk.

²⁹ “Amegagei si igoitoi kobun chaang'indap tuguuguk ak eng' che kieei. Igoono taitang'ung' ne weeriit.

³⁰ Yai ko uu nooto eng' tuguuk ak icheek ak eng' keechiireguk. Igoochi kotebi ak kamet peetuusyek tisap ak igoono eng' peetuut ne po sisiit.

³¹ Oegu piigap tiliilindo eng' anee. Eng' nooto anyun, ko amoam panyeek alak tugul che kabar tyong'in eng' timiin. Owiirchini sesenik.”