KOMONG'U 17 - Bukuit Ne Tilil

Peek che ki mang'une rwandet

¹ Ki inam panda anyun tuiyet komugul ne po piigap Israel kong'eetyee surkwen ne po Sin, ko uu ye king'atei Kamuktaindet ne Toroor. Eng' let ko ki it Rephidim ak komuung'so, nganda ki ma komi peek olooto che eei piik.

² Amu nooto, ko ki polyo piik kobolji Musa koleenji, “Inagech peek kee.” Ak ki leenji `Musa icheek, “Amu nee si oboljo? Amu nee si otyem Kamuktaindet ne Toroor?”

³ Ki am piik melelda eng' olooto, ak ki ing'unyng'ung'ji `icheek Musa ak koleenji, “Kilya si imutwech acheek, lagokyok ak akwotisyekyok kemang'une Misiri ak inyoo ibarenech melelda?”

⁴ Ki riirchi `Musa Kamuktaindet ne Toroor koleenji, “Alyonji pichu? Neegit kolacha!”

⁵ Ak ki wolji `Kamuktaindet ne Toroor Musa koleenji, “Ui indoe piik ak imut poisyegap Israel alak. Ip kiroktong'ung' ne ki ikwere aineet.

⁶ Atonone taing'ung' eng' yooto po rwandet eng' Horeb. Ikwere rwandanooto komang'une peek si kobiit koe piik.” Ki yai anyun Musa ko uu nooto eng' taitap poisyegap Israel.

⁷ Ak ki kuure yooto Masa ak Meriba, amu polatetap `piigap Israel che ki tyem Kamuktaindet ne Toroor koleen, “Tos iman mi Kamuktaindet ne Toroor kobootech?”

Koboregei Israel ak Amelek eng' Rephidim.

⁸ Ki pwa anyun Amelek nyoo kobaregei ak Israel eng' Rephidim.

⁹ Ki leenji `Musa Joshua, “Lewenwech piik, ak obe obargei ak Amelek. Awendi atononi mutai eng' tulweet parak, atinye eng' eunyu kirokto ne po Kamuktaindet.”

¹⁰ Ki yai anyun Joshua ko uu ye kiga komwachi Musa ak ki wo kobargei ak Amelek. Ki togosta anyun Musa tulweet parak kobooto Aron ak Hur.

¹¹ Ki yaak ko uu ni: ye kingo namji Musa parak eunnyi koterteeris Israel, ak ye kingo tu koterteeris Amelek.

¹² Kingo ng'etyo anyun eunegap Musa, konam Aron ak Hur koita kondechi kotebee ineendet, yeityo konam eunekyik kotononso; ki nam age eutap tai, konam age murot kaataam konamji parak. Kitononso eunegap Musa agoi kororokto asiis.

¹³ Ki iterteer anyun `Joshua Amelek ak piikyik eng' rotwetap chok.

¹⁴ Ki leenji `Kamuktaindet ne Toroor Musa, “Sirchi ng'aleechu bukuit si koek ne kibwaatee, somanji Joshua kogas, amu abuuktoi kabwaatetap Amelek kobet eng' kurereetap kipsengwet.

¹⁵ Ki teech Musa kaptisisyet, ak koguure yooto Kamuktaindet ne Toroor ne iterteerwa.”

¹⁶ Ak ki le, “Kagoyosyo Kamuktaindet ne Toroor koyai lugeet ak Amelek eng' ibinwek tugul.”