KOMONG'U 16 - Bukuit Ne Tilil

Kebae piigap Israel Mana

¹ Ki inam anyun pandanywa kong'eetyee Elim, ak ki it tuiyet komugul ne po piigap Israel surkwen ne po Sin ne mi kwenutap Elim ak Sinai. Ki it olooto eng' peetuutap taman ak muut ne po arawetap aeng' kobooch ye kingo mong' eng' emetap Misiri.

² Ki ing'unyng'ung'ji tuiyet komugul ne po piigap Israel Musa ak Aron eng' surkwen.

³ Ki leenji `piigap Israel icheek, “Kita kaigai kebegu eng' eutap Kamuktaindet ne Toroor eng' emetap Misiri ye ki kitebee ole neegitee tereenigap panyeek ye ki kiamisyei kot kebiyong'se, ago ki omoong'wech kebwa surkwenini si obare rubeet tuiyoni komugul.”

⁴ Ki leenji `Kamuktaindet ne Toroor Musa anyun, “Aroong'wok amitwogik che punu kipsengwet. Pendi piik peetuut age tugul koyumi che yamei peetuut si kobiit atyem icheek anai ngo muuchi koosup ng'atuutyennyu.

⁵ Eng' peetuut ne po lo, ye chobei icheek amitwogichooto che kaip kobwa ko, konyilee aeng' eng' che po kotugul.”

⁶ Ki leenji `Musa ak `Aron piigap Israel tugul, “Onae koskoleny ole ki imutwak Kamuktaindet ne Toroor omang'une emetap Misiri,

⁷ ak ogeer karon telunatetap Kamuktaindet ne Toroor amu kasei ineendet kang'unyng'unyeng'wong' ne ong'unyng'ung'jini Kamuktaindet ne Toroor. Acheek anyun ko king'o si ong'unyng'ung'jech?”

⁸ Ki le Musa, “Koonok anyun Kamuktaindet ne Toroor panyeek oam koskoleny, ak koonok karon magatiinik oam obiye amu kasei Kamuktaindet ne Toroor kang'unyng'unyeng'wong' ne ong'unyng'ung'jini ineendet. Acheek ko king'o? Ma acheek che ong'unyng'ung'jini ago ong'unyng'ung'jini Kamuktaindet ne Toroor.”

⁹ Ki leenji `Musa Aron, “Ileenji tuiyet komugul ne po piigap Israel, ‘Obwa oriikyi Kamuktaindet ne Toroor amu kogogas kang'unyng'unyeng'wong'.’ ”

¹⁰ Ak ye kita kong'alaaljin `Aron tuiyet komugul ne po piigap Israel, kitabendo kotokyigei surkwen ak ki took eng' pooldet liilindap Kamuktaindet ne Toroor.

¹¹ Ki ng'alaalji `Kamuktaindet ne Toroor Musa koleenji,

¹² “Kaagas kang'unyng'unyetap piigap Israel. Mwachi ileenji, ‘Oame panyeek koskoleny ak oam obiye magatiinik karon si onai ole aa Kamuktaindet ne Toroor Kamuktaindeng'wong'.’ ”

¹³ Ki pwa taok koskoleny konyi nganaseet ak ki ibut rewoot karon koyiem nganaseet.

¹⁴ Ye kingo togosta rewoot ne koga ibut, kotook eng' surkwen tuguuk che mengeechen che tertereen komi ng'wony che uu chepkoset.

¹⁵ Ye kingo keer piigap Israel tuguuchooto, koteebegei icheegei, kole, “Nee tuguuchuuto?” Amu ki ma nai tuguuchooto. Ak ki leenji Musa, “Amitwogik chuuto che kagoonok Kamuktaindet ne Toroor oam.

¹⁶ Niito kiit ne kong'at Kamuktaindet ne Toroor kole, ‘Ingoyum chii tugul che yamei koam. Yamei chii tugul che po kerebet ne kiguure omer; ingoipchi chii age tugul che yamei koitetap piikyik che mi koonnyi.’ ”

¹⁷ Ki yai ko uu nooto piigap Israel ak ki iyum alak che chaang', koyum alage che ng'ering'.

¹⁸ Ye kingo ker eng' kerebet, koma siirto che po ineendet ne kagaiyum che chaang', ak ki ma ng'ering'itu che po ineendet ne kagaiyum che ng'ering'. Ki iyum chii tugul che yamei koam.

¹⁹ Ki leenji `Musa icheek, “Amat kotuuch chii agoi koeech.”

²⁰ Ago ki ma kas iit alage eng' icheek kiit ne kimwachin Musa. Ki ituuch kotep kot koeech ak ki am kuutik ak ki pulyo. Ki nereekyi anyun `Musa pichooto.

²¹ Ki iyumi karonet age tugul che yamei koam chii tugul ak kingo ng'wanit asiis kochootyo.

²² Ki iyum eng' peetuut ne po lo che tee che cham koyumi konyil aeng': kereboonik aeng' chii tugul. Ak ki pa pounik tugul che po tuiyet komwachi Musa.

²³ Ki leenji `Musa icheek, “Nooto ko kiit ne ki mwa Kamuktaindet ne Toroor kole: ‘mutai ko kamuung'et, sabato ne itabaanat eng' Kamuktaindet ne Toroor. Obeel che omache obeel, ak oyoi che omache oyoi ak ogonorchigei che kang'et kobunji mutai.’ ”

²⁴ Ki konor kobunji mutai ko uu ye ki mwachi Musa, ak ki ma pulyo ama ki nyoorchi kuutik.

²⁵ Ki le Musa, “Oam chooto rani; amu sabato ne po Kamuktaindet ne Toroor rani, monyoorchini rani emet.

²⁶ Oyumi eng' peetuusyek lo; ago eng' peetuutap tisap ko sabato, ma piitu eng' peetuunooto.”

²⁷ Ki pa alage eng' peetuutap tisap koleen koyumat, ago ma nyoor.

²⁸ Ki leenji `Kamuktaindet ne Toroor Musa, “Oeesyoi osup ng'atuutikyuk ak kayomisutikyuk kot kotyanit?

²⁹ Onai ole kagoonok anee Kamuktaindet ne Toroor sabato; eng' nooto anyun agoonok amitwogik eng' peetuutap lo che yamei peetuusyek aeng'; ingotebee chii tugul oldanyi, amat kwo ui eng' peetuutap tisap.”

³⁰ Ki imuuny anyun piik eng' peetuutap tisap.

³¹ Ki kuure kootap Israel amitwogichooto Mana: ki kergei tuguuchooto ak peek che mubere che leelach ak ki chamu magatiinik che mengeechen che ki kikwanda kumyat.

³² Ki le Musa, “Niito kiit ne kong'at Kamuktaindet ne Toroor kole, Kinyiit kerebet agenge tuguuchooto, kegonorchi ibinwekwok che piitu let si kobiit kogeer amitwogichooto che ki abaenak eng' surkwen ye ki among'wok omang'une emetap Misiri.”

³³ Ki leenji `Musa Aron, “Inemu tereet ne ming'in, inyiit mana che yamei kerebet agenge ak igonor eng' taitap Kamuktaindet ne Toroor, kegonorchi ibinwek che piitu let.”

³⁴ Ki igonor anyun Aron eng' taitap paornateet kole keriip ko uu ye ki ng'at `Kamuktaindet ne Toroor Musa.

³⁵ Ki am piigap Israel mana kenyiisyek artam agoi koit emet ne menyei piik. Ki am mana agoi koit kiwotosyegap emetap Kanaan.

³⁶ Kerebonooto kigeree mana ne kiguure omer ko aechin ak kebebertap taman ne po epah.