KOMONG'U 15 - Bukuit Ne Tilil

Tyendap Musa

¹ Ki tyen tyeni Musa kobooto piigap Israel kotyenji Kamuktaindet ne Toroor kole, “Atyenjini Kamuktaindet ne Toroor amu ki ibelis eng' kabelisyet ne toroor miising'. Ki wiirchi araraita paraisiit kobooto chiito ne kibunei.

² Kamuktaindet ne Toroor ko kimnateennyu ak tyendanyu, ak yetunennyu. Niito Kamuktaindennyu ak alasu ineendet; Ineendet ko Kamuktaindet ne po abba, atoroori ineendet.

³ Kamuktaindet ne Toroor ineendet ko ne po lugeet. Kainennyi ko Kamuktaindet ne Toroor.

⁴ Ki wiirchi araraita kariisyegap Pharaoh kobooto lugeennyi. Ki imaluuch Araraita ne Piriir kiptainikyik che ki lewen.

⁵ Ki tuch icheek rirosyek ak kirorokta koba rirosyek ko uu koita.

⁶ Eung'ung' ne po tai, ee Kamuktaindet ne Toroor, ko konyitot eng' kimnateet, Eung'ung' ne po tai, ee Kamuktaindet ne Toroor, ko nyinyiri puunik kotonatonagis.

⁷ Iluuli icheek che ng'eetyinin eng' ooindap telunateng'ung'. Iyooktoi nereegeguk; peelei icheek kowong'kei ko uu mobeek.

⁸ Ki iyumgei peek amu kimnateetap kabuuset ne po seruneguk; kitononso peek kotooten; kinamgei peek kouegitu eng' araraita kween.

⁹ Ki le puunyoot, Asubi, aname ak apchei che kagiluul, ak kobiyong'e magennyu icheek. Ang'usu rotwennyu po chok, ak kobar eunnyu icheek.

¹⁰ Ki iusyi eng' usooneng'ung', ak ki tuch `araraita icheek. Kirorokyi peek che kiimeen oriit ko uu ngosyelait.

¹¹ Ee Kamuktaindet ne Toroor, tos ngoro ne uu inyee eng' kamuktaik? Tos ng'oo ne uu inyee, ne konyitot eng' tiliilindo, ne kiywei eng' kalasunet, ne yaei kwang'utik?

¹² Ki ichuul eung'ung' ne po tai ak kilugui `ng'wony icheek.

¹³ Ki indochi inyee eng' rireeneng'ung' piik che ki ityaach komanda; ki indochi icheek eng' kimnateng'ung' koba oldang'ung' ne tiliil.

¹⁴ Ki kas pororyosyek alage, ak kibotanso; kinyoor ng'wanindo che menyei Philistia.

¹⁵ Ki tang'any anyun kirwoogik che po Edom; potandos che kiimeen che po Moabik; kachootyo tugul che menyei Kanaan.

¹⁶ Kanam icheek kamuiset ak kaiyweisyet; eng' etunatetap eung'ung', ko siisyo ko uu koita; agoi kolanda piiguk, ee Kamuktaindet ne Toroor, agoi kolanda piik che ki ial.

¹⁷ Imutu icheek komong' ak inde icheek kominogis eng' tulweetap poroteng'ung', komosta ne ki ichopchigei si imeny, ee Kamuktaindet ne Toroor, Ole-Tiliil, ee Kamuktaindet, ne ki kogimit eung'ung'.

¹⁸ Laitorani Kamuktaindet ne Toroor koigeny ak koigeny.”

¹⁹ Kingo pa paraisisyek che po Pharaoh nyanjet kobooto kariisyekyik ak piikyik che ketei paraisisyek ko ki iweech Kamuktaindet ne Toroor peegap nyanjet kogeny kotuch icheek; ago kibun piigap Israel emet ne yaamaat eng' kwenutap nyanjet.

Tyendap Miriam

²⁰ Ki nam anyun Miriam kwondo ne maotyoo, chepkametap Aron, sugutit ne ming'in eng' eunnyi ak ki isup `ineendet kwonyiik tugul che ki ibei sugutisyek che mengeechen kotyenoti.

²¹ Ki wolji Miriam koleenji, “Otyenji Kamuktaindet ne Toroor amu ki ibelis eng' kabelisyet ne toroor miising'; ki kiwiirchi nyanjet paraisiit kobooto ne ki laanyei.”

²² Ki indochi `Musa Yahudik koba eng' Araraita ne Piriir ak ki it surkwen ne po Sur. Ki pa pandap peetuusyek somok eng' surkwen ak ki ma nyoor peek.

Ki anyinyi peek che ng'woneen

²³ Kingo it Marah, koma komuuch koe peegap Marah amu king'woneen. Ki kiguure anyun kainennyi Marah amu nooto.

²⁴ Ki ing'unyng'ung'ji `piik Musa, koleenji, “Ki ee nee?”

²⁵ Ki riirchi `Musa Kamuktaindet ne Toroor ak ki iboorchi `Kamuktaindet ne Toroor ineendet keetit. Ki nam keetoto yeityo kowiirchi peek ak ki anyinyitu. Kichopchi `Kamuktaindet ne Toroor icheek eng' olooto ng'atuutyet ak kirwooget kotyeme icheeget:

²⁶ ak ki le, “Ngot igas iman kutitap Kamuktaindet ne Toroor Kamuktaindeng'ung', iyai ne po iman eng' tainnyi, iepchji iit ng'atuutikyik ak isup katigonutikyik tugul, koma koonin myan age tugul ne ki agoochi Misiriik, amu anee ko aa Kamuktaindet ne Toroor ne asaabin.”

²⁷ Ki it anyun icheek ole kiguure Elim, ole ki mi kong'igap peek tamanu ak aeng' ak tiironigap sosik tamanwogik tisap; ak ki imuung'ee icheek ole neegitee peechooto.