KOMONG'U 13 - Bukuit Ne Tilil

Katabaanetap Taiywek.

¹ Ki leenji `Kamuktaindet ne Toroor Musa,

² “Itabaanwa kiboretook tugul. Punjino age tugul ne yaatei iyoteet eng' piigap Israel, eng' piik ak eng' che po tai eng' tyong'ik.”

³ Yeityo koleenji `Musa piik, “Obwaat anyun peetuuni ki omang'une Misiri kootap otwoknateet. Amu ki imoong'wok Kamuktaindet ne Toroor eng' kimnateetap eunnyi omang'une olooto. Eng' peetuuni anyun koma ki amei magatiinik che kaginde mermereek.

⁴ Omandoi rani eng' arawetap Abib.

⁵ Ye kagomutak Kamuktaindet ne Toroor oit emetap Kanaanik, Hitik, Amorik, Hibik ak ne po Jebusik; emet ne ki iyasyechi `ineendet kwanisyeguk kole tuun koonok emet ne nyiitaat cheego ak komi kumyat eng' chaang'indo. Amu nooto anyun, kanyoolu oriip ak oyai igoorita eng' kenyiit age tugul eng' arawaniito.

⁶ Oame magatiinik che ma kinde mermereek eng' peetuusyek tisap ak koek igoortap Kamuktaindet ne Toroor peetuutap tisap.

⁷ Ki amei eng' peetuusyechooto tugul tisap magatiinik che ma kinde mermereek. Amat kenyoorchi chii magatiinik che ki kinde mermereek ak amat kobiitune emeng'ung' komugul mermereek.

⁸ Tuun anyun imwachini weeriing'ung' eng' peetuunooto ileenjini, ‘Ayae niito amu kiit ne ki yaiywo Kamuktaindet ne Toroor ye ki among'u eng' Misiri.’

⁹ Ak tuun egu nooto kaboorunet eng' eung'ung' ak koek kabwaatet ne mi kwenutap konyeguk si kobiit kotebee ng'atuutigap Kamuktaindet ne Toroor kuting'ung'. Amu ki imoong'wok Kamuktaindet ne Toroor omang'une Misiri eng' euut ne kiim.

¹⁰ Ara anyun oyai igoori eng' peetuunnyi ne ki king'atyi eng' kenyiit age tugul.

¹¹ “Ye tuun iitak Kamuktaindet ne Toroor emetap Kanaanik ko uu ye ki iyasyeun ak kwanisyeguk kole koonok,

¹² itabaan anyun kobunji Kamuktaindet ne Toroor tugul che yaatei iyoteet. Ak che po tai tyong'ik ko punjin Kamuktaindet ne Toroor.

¹³ Ityachi ne twatei sigiryet, ityage aarwetap keechiir, ago ngo metyach iirye kaatinyi. Ityachi taita age tugul eng' weeriiguk.

¹⁴ Ye tuun teebenen weeriing'ung' eng' peetuusyek che pwoonei, koleenjin, ‘Amu nee si keyai ko uu niito?’ Ileenji anyun, ‘Ki imoong'wech Kamuktaindet ne Toroor eng' Misiri eng' kootap otwoknateet, eng' euut ne kiim.

¹⁵ Ak ye kingo etenech Pharaoh keebe, kobar anyun `Kamuktaindet ne Toroor taita age tugul eng' emetap Misiri, che po piik ak che kitwatei tyong'ik. Ara anyun aeng'jini Kamuktaindet ne Toroor tugul che yaatei iyoteet, che kiruugik. Ago atyachi weeriikyuk tugul che yaatei iyoteet.’

¹⁶ Egu niito kaboorunet eng' eung'ung' ak koek ratuutik che kirate anook eng' turyetap togeng'ung'. Amu ki imutwech Kamuktaindet ne Toroor eng' euut ne kiim kemang'une Misiri.”

Toloitap pooldet ak maat.

¹⁷ Kingo kagounda `Pharaoh piik koba, koma indochi `Kamuktaindet icheek kobun ooreet ne punei emetap Philistik, nganda ki neegit. Amu ki le Kamuktaindet, “Si ma iyweis piik ye keer lugeet, ak komach koweekyigei Misiri.”

¹⁸ Ago ki indochinot `Kamuktaindet piik kobun surkwen ne tokyingei Araraita ne Piriir. Ki togosta anyun piigap Israel komanda eng' emetap Misiri ko kagolaach kariik.

¹⁹ Ki ip `Musa kawegap Joseph. Amu kiga kogimgim `ineendet piigap Israel koyasyo koleenji, “Ye tuun kanyonjok Kamuktaindet ne Toroor iman kosarwok, oip kawekyuk obendi otogostoi eng' oli.”

²⁰ Ki inam anyun pandanywa kong'eetyee Sukoth, ak ki pa komuung'e Etam eng' ole poochin surkwen.

²¹ Ki indoe icheek `Kamuktaindet ne Toroor eng' toloitap pooldet peet, ak kondochi icheek kemoi eng' toloitap maat, kokweng'ji; si kobiit komuuch koba peet ak kemoi.

²² Ki ma isto ineendet eng' taitap piik toloitap pooldet peet, ama isto toloata po maat kemoi.