KOMONG'U 12 - Bukuit Ne Tilil

Igoortap Paska.

¹ Ki ng'alaalji `Kamuktaindet ne Toroor Musa ak Aron eng' emetap Misiri, koleenji,

² “Egu eng' okweek arawani taunetap arawek ak koek arawet ne po tai eng' kenyiit.

³ Omwachi tuiyet komugul ne po Israel oleenji eng' peetuutap taman ne po arawani, konam chii age tugul eng' koot age tugul aarwet ko uu ole tee kooriigap kwanisyekwak.

⁴ Ngo ng'ering' piik eng' kapchii ne ma imuuchi koam arwanooto, konyolu anyun koyomogei ak chiitap kokwennyi ko uu koitetap piik. Yeityo kolewen aarwet koiityin chii age tugul che tee che imuuchi koam.

⁵ Egu arweng'wong' mengit ne libwoop ne ma siirei kenyiit agenge. Oleweni arwanooto eng' keechiirek anan ko ng'oroorek.

⁶ Yeityo otabaan agoi koit peetuutap taman ak ang'wan ne po arawaniito, si koeny anyun piigap Israel aarekwak eng' koskoleng'utap peetuunooto.

⁷ Ingonam icheek anyun korotiik ak koilee tugatugik tuwai ak rateiywotap tugatuk eng' koot age tugul ne ki ame arwanooto.

⁸ Amei kemounooto panyechooto kagibeel eng' ma, koamdoi magatiinik che ma kinde mermereek kobooto ingweek che ng'woneen.

⁹ Amoam ko tuonen, amat oyo agot kitigin eng' peek, ago obeele eng' ma metit, keelyek ak tuguugap ke.

¹⁰ Ne siirei nooto ko mat kong'et agot kitigin kot koeekyi. Ago ne kang'et agoi koeech obeel eng' ma.

¹¹ Oame anyun ko kaoratkei, ko kaolaach kweonikwok, oting'e eunekwok kirokweek ak oam ochokyini. Niito ko paska ne po Kamuktaindet ne Toroor.

¹² Amu eng' kemounooto, abunoti kwenutap emetap Misiri, ak abar kiboretook tugul eng' emonooto, che po piik ak che po tai tyong'ik ak arwookyi kamuktaik tugul che po Misiri. Aa Kamuktaindet ne Toroor.

¹³ Egu anyun korotichooto ko oile tugatugik kaboorunet eng' okweek eng' kooriikwok ole omi. Ye ageer korotiik asiirtoenok ak ma ityinok koroato konyo kong'emak ye abare emetap Misiri,

¹⁴ Egu peetuuniito peetuutap kabwaatet eng' okweek. Oriip kobunji igoorto ne po Kamuktaindet ne Toroor ak oyai igoorito koek ng'atuutyet eng' ibinwekwok tugul agoi koigeny.

¹⁵ Oam magatiinik che ma kinde mermereek peetuusyek tisap. Oistoi eng' peetuut ne tai mermereek eng' kooriikwok. Amu king'etoi age tugul eng' Israel ne kaam magatiinik che mi mermereek eng' kong'etee peetuut ne po tai agoi ne po tisap.

¹⁶ Peetuut ne po tai ak ne po tisap ko egu eng' okweek peetuutap kayumetapkei ne itabaanat ne tiliil. Ma kiyaei poisyo age tugul eng' peetuusyechooto, kobatee kochop chii age tugul amitwogik che amei.

¹⁷ Oriip igoori po magatiinik che ma kinde mermereek amu ki eng' peetuuni ne ki among'u lugosyekwok komang'une emetap Misiri. Amu nooto anyun oriip ak oyai igoori eng' peetuuniito eng' ibinwekwok tugul ak koek ng'atuutyet ne po koigeny.

¹⁸ Oame anyun magatiinik che ma kinde mermereek eng' arawet ne po tai eng' koskoleng'utap peetuutap taman ak ang'wan agoi koskoleng'utap peetuutap tiptem ak agenge.

¹⁹ Ma kinyoorchin kooriikwok mermereek eng' peetuusyechooto tisap: King'etoi eng' Israel age tugul ne amei ne kaginde mermereek, ngo ne kiprutoiyo anan ko ne ki kisikyin emoniito.

²⁰ Moame kiy age tugul ne kaginde mermereek. Oame magatiinik che ma kinde mermereek eng' meng'otosyekwok tugul.”

Paska ne tai.

²¹ Ki kuur anyun `Musa poisyek tugul che po Israel ak koleenji, “Oba olewenote eng' akweetap keechiirek kobeate kapchii ak oeeny koek tiseiywotap paska.

²² Onam ratuutyetap keetiik che kiguure husop, ak orooch korotiik che mi taabeet ak oise korotichooto rateiywotap tugatuk ak tugatugik tuwai. Amat komanda chii saang' agoi koeech.

²³ Amu nyoo kosiirtoi Kamuktaindet ne Toroor kowendi kobarei taiywegap Misiriik. Ye keer korotiik eng' rateiywotap tugatuk ak eng' tugatugik tuwai eng' kooriikwok, kosiirto ineendet eng' kurganooto ak ma chamjin ng'emindet komong' nyoo kobaraak.

²⁴ Oriibe anyun ng'olyoondoni koek ng'atuutyet ne po koigeny eng' inyee ak weeriiguk.

²⁵ Ak ye tuun oit emet ne koonok Kamuktaindet ne Toroor ko uu ye ki koaror oriip anyun igoorito.

²⁶ Ye tuun teebenak lagokwok, kole, ‘Po nee igoorito?’

²⁷ Oleenji anyun icheek, ‘Tiseiywot ni ne po paska ne kigonyite Kamuktaindet ne Toroor ne kisiirtoe kooriigap piigap Israel ak kosar eng' Misiri ye kingo parei Misiriik.’ ” Ak ki ing'uruukso piik kolas Kamuktaindet ne Toroor.

²⁸ Ki pa anyun piigap Israel koyai ko uu ye kiga ng'at `Kamuktaindet ne Toroor Musa ak Aron.

Pareetap taiywegap tugul eng' Misiriik.

²⁹ Kingo it kemoi kween, kobar Kamuktaindet ne Toroor kiboretook tugul eng' emetap Misiri kobooch taita ne po Pharaoh agoi taita ne po luulenet ne ki rataat eng' korgoreet ak tugul che kitwatei tyong'ik.

³⁰ Ki ng'eet anyun Pharaoh kemoi kobooto otwogikyik tugul ak Misiriik tugul. Ki piit kateiyet ne oo eng' Misiri amu ki ma ng'et koot agot agenge ne ki ma mee chii.

³¹ Eng' kemounooto, ko ki iyookto Pharaoh keguur Musa ak Aron koleenji, “Ong'eetyee ak obe eng' oldap piikyuk okweek kobooto piigap Israel. Oba, oboisyechi Kamuktaindet ne Toroor ko uu ye ki omwa.

³² Okweri keechiirekwok ak tuukwok ak obe, ak oberuura agane.”

³³ Ki ichirchir `Misiriik piik kochaakta komanda eng' emet, amu ki le, “Ngo mobe kebegu tugul.”

³⁴ Ki nam anyun piik magatiinik che tuonen che tomo kinde mermereek ak tereenikwak che kikwang'e ak ye kingo kagorate ngoroikwak, konde tigigoikwak kola.

³⁵ Ki yai piigap Israel ko uu ng'olyootap Musa, ki soom Misiriik tuguugap fedha ak thahabu ak ngoroik.

³⁶ Ki igoochi `Kamuktaindet ne Toroor Misiriik kocham Yahudik, ak ki igoochi kiy age tugul ne ki soom. Amu nooto, ko ki nyaban anyun Yahudik tuguugap Misiriik.

Komondoi piigap Israel eng' Misiri.

³⁷ Ki pa anyun piigap Israel kong'eetyee Rameses agoi koit Sukoth. Ki neegit murenik eliphuusyek pogol lo che ki pendi eng' keelyek, koma ki itito kwonyiik ak lagok.

³⁸ Ki pa kobooto icheeget tuiyet ne oo ne po piik alak tugul che teerchiin; kobooto keechiirek ak tuuga che chaang'.

³⁹ Ki peel magatiinik che tuonen che mengeechen che ki ma kinde mermereek che ki ibune Misiri. Ki ma kinde mermereek amu ki kioon eng' Misiri ak ki mata komuuch konyoor poroindo ne chopchinegei amitwogik alak tugul.

⁴⁰ Kiga kotebi anyun piigap Israel eng' Misiri kenyiisyek pogol ang'wan ak sosom.

⁴¹ Kingo pata kenyisyechooto pogol ang'wan ak sosom, komanda eng' peetuunooto lugoosyek tugul che po Kamuktaindet ne Toroor eng' emetap Misiri.

⁴² Kemounooto ki riip Kamuktaindet ne Toroor ak kosar piigap Israel, ko egu kemout ne kanyool kibwaate Kamuktaindet ne Toroor amu ki imut icheek komong' eng' emetap Misiri. Niito ko kemoutap Kamuktaindet ne Toroor ne ibwaati piigap Israel tugul eng' ibinwekwak tugul.

Ng'atuutyet agobo paska.

⁴³ Ki leenji `Kamuktaindet ne Toroor Musa ak Aron, “Che isubu ko ng'atuutik che po paska: Ma amei too ne ma agenge eng' piigap Israel,

⁴⁴ ago otwogindet ne po chii age tugul ne ki kiale silingisyek ne kigeyatita, kechamji koam.

⁴⁵ Ma amei punootyot anan otwogindet ne nyooru melekto.

⁴⁶ Kiame koot agenge; amat oip peeny komanda saang' agot kitigin. Amat oiri kawet age tugul.

⁴⁷ Kanyool anyun koyai ko uu nooto Israel komugul.

⁴⁸ Ago ngo rutochin kiprutoiyot ne machei koboiboenji paska ne po Kamuktaindet ne Toroor, ko kanyool kimuratan muren age tugul ne mi kobooto ineendet. Yeityo koriikyi anyun eng' yooto ak koriip, ak kogergeit ak ne ki kisikyi emeng'wong'. Ago among' koam chii age tugul ne ma kiyatita.

⁴⁹ Ng'atuutyet niito ko agenge ak kogergei eng' ne ki kisikyin emeng'wong' ak eng' ne toondet ne rutochinok.”

⁵⁰ Ki yai piigap Israel tugul ko uu ye ki ng'at `Kamuktaindet ne Toroor Musa ak Aron.

⁵¹ Ak ki imaanda Kamuktaindet ne Toroor peetuunooto piigap Israel eng' emetap Misiri eng' lugosyekwak.