KOMONG'U 10 - Bukuit Ne Tilil

Koroitap tisap: chereng'endet

¹ Koleenji `Kamuktaindet ne Toroor Musa, “Ui kap Pharaoh. Amu kaauit anee muguleldanyi, ak mugulelwegap otwogikyik, si kobiit abarta kaboorunoichu eng' kwenunnywa.

² Si kobiit omwa kogas lagokwak ak mochogorenikwok ole ki aite Misiriik koek che perber, ak kaboorunoikyuk che ki ayai eng' kwenunnywa, si onai ole aa Kamuktaindet ne Toroor.”

³ Ki pa anyun Musa ak Aron kap Pharaoh, ak koleenji; “Kamwa ko uu ni Kamuktaindet ne Toroor, Kamuktaindet ne po Yahudik, ‘Ieesyoi agoi au si iming'inigei eng' tainnyu? Mete piikyuk koba, koba koboisyeiwo.

⁴ Keero, ngieesye imete piikyuk koba, ayookyini mutai chereng'endet emeng'ung'.

⁵ Tuchei emet, kot ko mata komuuch chii kogeer ng'wonyut. Amei tuguuk tugul che ng'etunotiin, che kong'etune koigap ropta, ak koam keet age tugul agot chooto katoi ko piityo kogeny eng' emet.

⁶ Nyiei kooriguk, kooriigap otwogiguk ak che po Misiriik tugul. Chaang'itu ne ki tomo kogeerei kwanisyeguk anan aguiywogiguk, kobooch peetuut ye kingo piit agoi ra.’ ” Ak kiwelelgei kwo eng' ole mi Pharaoh.

⁷ koteebee otwogikyik Pharaoh koleenji, “Egu mesteet chiichi eng' acheek kot kotyanit? Igoochi piik koba, koba koboisyechi Kamuktaindet ne Toroor Kamuktaindennywa. Tos tomo inai ile kogome Misiri?”

⁸ Eng' nooto anyun, ko ki kimutyi Musa ak Aron Pharaoh kogeny, ak ki leenji `ineendet icheek, “Oba, oboisyechi Kamuktaindet ne Toroor Kamuktaindeng'wong'. Ago anyun ngorcho che pendi?”

⁹ Kowolji Musa koleenji, “Kibendi kobooto neranikyok, ak poisyekyok, ak weeriikyok, ak tiibiikyok. Kikwerye neekyok ak tuukyok amu kanyool keyachi Kamuktaindet ne Toroor igoorto.”

¹⁰ Ak ki `leenji ineendet icheek, “Ingotep iman Kamuktaindet ne Toroor kobootok ngot achamwok obe kobooto lagokwok. Tagunoot keele otinye mageet ne ya.

¹¹ Ma uu nooto. Ma chamwok omut lagokwak. Oba okweegei murenik, obe oboisyechi Kamuktaindet ne Toroor; amu nooto ne omache.” Ak ki kioon Musa ak Aron komong' eng' ole mi Pharaoh.

¹² Koleenji `Kamuktaindet ne Toroor Musa, “Chuul tokyi eung'ung' emetap Misiri si kobwa chereng'enyinik kotogos emetap Misiri, kotogos koam keet age tugul ne tuon ne po emet. Koam agot tugul che kong'etune koigap ropta.”

¹³ Kochuul anyun Musa eunnyi ak kotokyi kiroktonyi emetap Misiri. Kogoon Kamuktaindet ne Toroor usoonet ne punu kong'asiis kousyi emet peetuunooto komugul, ak kemout komugul, ak kingo eech, koip usoonetap kong'asiis chereng'endet.

¹⁴ Ki togos chereng'endet kobookyi emet komugul ne po Misiri, ak ki ru eng' ng'wonyutap emet tugul ne po Misiri. Ki koroomen kot ak ki tomo kobiitu chereng'endet ne uu nooto, ama kobiitu kogeny ne uu nooto.

¹⁵ Amu ki tuch emet komugul, kot koimenit. Ki am keet age tugul ne tuon ne mi emet, ak logoek tugul che po keetiik che ki ng'etune koigap ropta. Ki ma ng'et keet age tugul ne nyaliil, anan keet age tugul ne tuon ne mi timiin, eng' emet komugul ne po Misiri.

¹⁶ Ki iyookto anyun Pharaoh keguur Musa ak Aron eng' chokyinet, ak koleenji, “Kaayachi tengekto Kamuktaindet ne Toroor Kamuktaindeng'wong', ak kaayaiywok okweek.

¹⁷ Nooto anyun, asaain ale nyoiywo kaat amu tengektonyu niito ineegei, ak osaa Kamuktaindet ne Toroor Kamuktaindeng'wong', koistoena meoni kityo.”

¹⁸ Ki wo eng' ole mi Pharaoh, kwo kosa Kamuktaindet ne Toroor.

¹⁹ Ki wol Kamuktaindet ne Toroor usoonet ne kiim miising' kousune cherongo, ne ki ip chereng'endet, ak koon kwo Araraita ne Piriir ak ki ma ng'et chereng'endet agot agenge eng' emet komugul ne po Misiri.

²⁰ Ago ki iuit `Kamuktaindet ne Toroor muguleldo ne po Pharaoh, kouiit si ma meto piigap Israel koba.

Koroitap sogool: Tuindo ne kitui miising'

²¹ Yeityo koleenji `Kamuktaindet ne Toroor Musa, “Chuul eung'ung' tokyi kipsengwet, si kobiit mesundeito eng' emetap Misiri, mesundeito ne kitung'dung'yoti.”

²² Ki chuul anyun Musa eunnyi kotokyi kipsengwet, ak ki piit mesundeito ne oo miising' eng' emet komugul ne po Misiri eng' peetuusyek somok.

²³ Ki ma imuuch chii kogeer chii eng' Misirik, ak ki ma ng'eet chii eng' ye tebee eng' peetuusyechooto somok. Ago kilapkeen meng'otosyek tugul che po piigap Israel.

²⁴ Ki kuur `Pharaoh Musa yeityo koleenji, “Oba, oboisyechi Kamuktaindet ne Toroor. Omut lagokwok kobootok ago omete neekwok ak tuukwok kotebi.”

²⁵ Ago ki leenji Musa, “Kanyool kora ichamwech che kienyei ak kagoochinoik che kibeelei, si kobiit keeng'ji tiseiywot Kamuktaindet ne Toroor, Kamuktaindennyo.

²⁶ Kikwerye akwotisyekyok ak icheek. Ma ng'etu agot agenge. Amu chooto che kekwerye si keboisyechine Kamuktaindet ne Toroor, Kamuktaindennyo amu ma kingen kiit ne kanyool keboisyechine Kamuktaindet ne Toroor, agoi tuun keit olooto.”

²⁷ Ago ki iuit `Kamuktaindet ne Toroor muguleldap Pharaoh, ak ki ma chamji inee Pharaoh icheek koba.

²⁸ Ki leenji Pharaoh Musa, “Pet eng' ole ami, ak iriipkei, ama ta igeera togoch kogeny, amu imee eng' peetuut ne igeere togeennyu.”

²⁹ Kowolji Musa agine koleenji, “Kaimwa komyee; ma ageerin togoch kogeny.”