KOLOSAIK 3 - Bukuit Ne Tilil

Sabeet ne leel eng' Kristo

¹ Ko uu ye king'eetyee anyun kobooto Kristo, ocheeng' tuguuk che mi parak, ole mi Kristo kotebyei eng' eutap tai ne po Kamuktaindet.

² Obwaat tuguuk che mi parak, ma tuguuk che miitei ng'wony.

³ Amu ki obegu, ak ki kiuny saboonwekwok kobooto Kristo eng' Kamuktaindet.

⁴ Ye tuun took Kristo, ne ineendet saboondanyo, otaagu anyun ak okweek kobooto ineendet eng' toroornatet.

Sabeet ne po keny ak ne po nguno

⁵ Obar anyun kebeberwekwok che miitei ng'wony; sokseet, simdo, maguutik che samisen, mageet ne ya, ak kasetap myat, nooto saaetap kanamonik;

⁶ nyoonjin nereeknatetap Kamuktaindet weeriitap ngelelnateet amu tuguuchooto;

⁷ eng' tuguuchooto che ki obendote ak okweek eng' tai, ye kita omenye eng' tuguuchuuto.

⁸ Ago nguno olakte ak okweek tuguuchuuto tugul; nereegek, nyitatet, yaityet, chubisyet, ak ng'alaalet ne po teweernateet eng' kutusweekwok:

⁹ amomwachigei lembech, amu ki oregu chiito ne po keny kobooto poisyonikyik,

¹⁰ ak koolaach chiito ne leel, ne kiwalei koleelit agoi naet kogergeit ak itoondap ineendet ne ki yai ineendet:

¹¹ ole ma ting'e poroindo Yunanindet ak Yahudyot, ne imuratanat ak ne ma imuratanat, punootyo, Sitiaindet, ne otwogin, ne ityagat: ago Kristo ko tugul ak eng' tugul.

¹² Nooto anyun, amu oo lewenaigap Kamuktaindet che tiliileen ak ko oo chamanik, olaach muguleldo ne po rireenetapkei, talasyet, kaming'inetapkei, mutyonet, ak muitaet;

¹³ omuitochinigei, ak onyochinigei kaat okweegei, ngo tinyei chii age tugul ng'olyoo eng' age: agot ko uu ye kinyoiywok kaat Kiptaiyat, oyai ko uu nooto ak okweek:

¹⁴ ak otes eng' tuguuchuuto tugul chamyet, nooto ratuutyet ne po kagesunetapkei.

¹⁵ Ak ingoboi kaalyeetap Kristo mugulelwekwok, nooto ne ki kiguurchok eng' poorto agenge; ak oegu che tinyei kongoi.

¹⁶ Ingomenyok ng'olyootap Kristo eng' mogornateet, eng' utaatyet tugul oneetige ak oteechinigei eng' tyenwogigap kalasunet ak tyenwogik che ki kisir ak tyenwogigap saboon otyenjini Kamuktaindet eng' myeeindo eng' mugulelwekwok.

¹⁷ Ak kiit age tugul ne oyae, eng' ng'olyoot anan eng' poisyet, oyai tugul eng' kainetap Kiptaiyat Jeso, omwachini Kamuktaindet Kwanda kongoi eng' ineendet.

Sabeetap kap chii

¹⁸ Osotichu, ogas iit manong'otaikwok, ko uu ye nyolu eng' Kiptaiyat.

¹⁹ Manong'otaichu, ocham osotikwok, amogoochi ng'wanindo.

²⁰ Lagochu, ogas iit sigiikwok eng' tuguuk tugul, amu iboiboi niito miising' Kiptaiyat.

²¹ Kwanisyechu, amotachatachi lagokwok, si ma iluuk mugulelwekwak.

²² Otwogichu, ogas iit eng' tuguuk tugul icheek che kiptainikwok eng' poorwek; ama eng' otwoknateet ne kigeerei, ko uu che iboiboi piik, ago eng' muguleldo tugul, oiywei Kiptaiyat:

²³ kiit age tugul ne oyae, oyai kobunu muguleldo, ko uu eng' Kiptaiyat, ama ko uu eng' piik;

²⁴ ongen ole otaache eng' Kiptaiyat melekto ne po poroteet; oote Kiptaiyat Kristo.

²⁵ Amu ineendet ne yaei ne ya, ko tuun taachei agine ne po yaityonooto ki yai: ama mi tiytiyet.