KOLOSAIK 1 - Bukuit Ne Tilil

Kagateet

¹ Paulo, kayooktoindet ne po Kristo Jeso eng' mageetap Kamuktaindet, ak Timoteo tupchennyo,

² kisirchini che tiliileen che kitupche che iyanotin eng' Kristo, che mi Kolosae: Ingotebi kobootok myeeindo ak kaalyeet che punu Kamuktaindet Kwandanyo.

Kongoi ak saaet

³ Kigoochini kongoi Kamuktaindet Kwandap Kiptaiyandennyo Jeso Kristo, kesaiywok kotugul,

⁴ ye ki ngegas agobo kayaneng'wong' eng' Kristo Jeso, ak chamyet ne oting'e tugul che tiliileen

⁵ amu kamang'unet ne kigegonorwok eng' kipsengwet, ne ki osip ogas eng' ng'olyootap imanit ne po logoiywek che myach,

⁶ ne kigoityok; ko uu ole teptoi agine eng' ng'wony komugul koiyiei logoek ak ko tesoksei, ko uu eng' okweek, kobooch peetuut ne ki ogas ak onai myeeindap Kamuktaindet eng' iman;

⁷ ko uu ye ki oneetkei eng' Epapra chamanennyo ne kiboisyei tugul, ne kiboityot ne iyanaat ne po Kristo agobo acheek,

⁸ ne ki iboorwech chamyeng'wong' ne mi eng' Kabuuset ne Tiliil.

⁹ Amu niito anyun, koma kimete kesaa ak kesoom agobo okweek kobooch peetuut ne ki ngegas, keele konyiiak naetap magennyi eng' utaatyet tugul ak kaguiyet ne punu Kabuuset ne Tiliil,

¹⁰ si obendate ko uu ye nyolu eng' Kiptaiyat, oboiboi ineendet, oitosi logoek eng' poisyet age tugul ne myee, ak otesage eng' naetap Kamuktaindet;

¹¹ kigimitok eng' kamuktaet tugul, ko uu kamugetap toroornatennyi, agoi muitaet tugul ak talasyet eng' poiboiyet,

¹² ogoochini kongoi Kwanda, ne kiyaech keegu che nyoljin keyamde poroteetap che tiliileen eng' lapkeiyet;

¹³ ne kisarwech kemang'une kimnateetap mesundeito, ak kouutech keebe laitornatetap Weeriit ne po chamyennyi;

¹⁴ ne ki tinyei eng' ineendet katyagennyo, nyoetap kaat ne po tengekwogikyok.

Ooindap Kristo

¹⁵ Ineendet itoondap Kamuktaindet ne ma taagu, ineendet ne kisip kesich eng' kiit age tugul ne ki kitoi keyai;

¹⁶ amu ki kitoi keyai tuguuk tugul eng' ineendet, che mi kipsengwet ak che mi ng'wony, tuguuk che taagu ak tuguuk che ma taagu, anan laitornatosyek, anan kiptainatosyek, anan pounatosyek anan kimnatosyek; ki kitoi keyai tuguuk tugul eng' ineendet ak ko po ineendet;

¹⁷ ak po tai ineendet eng' tuguuk tugul, ak namegei tuguuk tugul eng' ineendet.

¹⁸ Ak ineendet metitap poorto, nooto kaniset: ineendet taunet, taunindetap che ki mong' eng' che ki pek; si kobiit koek ne oo eng' tuguuk tugul.

¹⁹ Amu ki chamak komyee keele komeny nyiyet tugul eng' ineendet;

²⁰ si kotuiyechigei tuguuk tugul ineendet, ye kingo kagoyai kaalyeet eng' korotiigap kimurtoiyondennyi; eng' ineendet, ngo tuguuk che mi ng'wony anan tuguuk che mi kipsengwet.

²¹ Ak nganda ki oo kipsagarek eng' peetuusyek che ki kosiirto, ak ki oo puunik eng' kabwaatutikwok eng' poisyonikwok che yaacheen, ko kagotuiyok ineendet nguno,

²² eng' poortanyi ne po panyeek, eng' meet, si kobiit komutak ko oo tiliileen ko motinye tisya, amotinyei kiy ne kirwoogunenok eng' tainnyi:

²³ ngo tebi iman eng' kayaneet, ko oo lumdootin ak ko oo tononiotiin komyee, ama ki istok eng' kamang'unetap logoiywek che myach che ki ogas, che ki kiamda eng' yautyet tugul eng' kurereetap kipsengwet; ki kiyaa anee Paulo amu nooto aek kiboityot.

Poisyetap Paulo agobo kayanik

²⁴ Abaibai anyun nguno eng' nyalilwogikyuk agobo okweek, ak anyiiti eng' komostanyu nooto ne rarunoot agobo nyalilwogigap Kristo eng' poortanyu agobo poortanyi, nooto kaniset;

²⁵ ak, ki kiyaa agobo nooto aek kiboityot, eng' tononjinetap Kamuktaindet ne ki kigoono amu okweek, si ayai ng'olyootap Kamuktaindet kosulda,

²⁶ ung'ootyet ne ki kiuny kobooch kenyiisyek tugul che ki kosiirto ak ibinwek: ago nguno, ko kagiboorchi chechiik che tiliileen,

²⁷ che ki cham Kamuktaindet kong'aang'ji kiit ne uu mogornatosyegap toroornatet ne po ung'ootyoniito eng' Pororyosyek, nooto Kristo eng' okweek, kamang'unetap toroornatet:

²⁸ ineendet ne kimwaitoi, ak kiteechini chii age tugul ak kineeti chii age tugul eng' utaatyet tugul, si kobiit kimut chii age tugul kogesunotkei eng' Kristo;

²⁹ abirtochinigei agine nooto, agiiligei ko uu poisyennyi, ne poisyei eng' anee eng' kamuktaet.