KIRUOGIK 7 - Bukuit Ne Tilil

Kiterteeri Midianik

¹ Ki ng'eet anyun karon miising' Jerubaal, ineendet ko Gideon, kobooto piigap lugeet tugul che ki mi ak ineendet ak koteech ole neegitee kondap peek ne po Harok. Ki mi piigap lugeet che po Midian murot kaataam ne po pichooto, eng' atebweet ole neegitee tulweetap Moreh.

² Ki leenji Kamuktaindet ne Toroor Gideon, “Chaang' piik che mi kobooten ne ma muuchi ande Midianik eunekwak, si ma menjo Israel kole, ‘Kasarwo eunnyu.’

³ Ui anyun nguno, imwaite kogas piik, ileenji, Age tugul ne nyogoor ak kobotani ko ingoweek kwo eng' tulweetap Gilead.” Ak ki week piik eliphuusyek tiptemu ak aeng', ak ki ng'et eliphuusyek tamanu.

⁴ Ago ki leenji `Kamuktaindet ne Toroor Gideon, “Ta ko chaang' piik, Imutu kobwa ole mi peek si atyemun icheek eng' yooto. Si age tugul ne amwaun aleenjinin, ‘Obendi ak ni, obe ak nooto,’ ak age tugul ne amwaun aleenjinin, ‘Mobendi ak ni, koma wendi nooto.’ ”

⁵ Komut anyun piik kobwa ye mi peek. Ak ki leenji `Kamuktaindet ne Toroor Gideon, “Age tugul ne labei peek eng' ng'eleptanyi ko uu ye labei seset, itabaan nooto; ko uu nooto agine age tugul ne kutunyi si koe peek.”

⁶ Ak koitetap icheek che kilabune peek eunekwak kobwa kutit, ko ki piik pogol somok. Ago kigutung'so piik chuun alak koe peek.

⁷ Ki leenji `Kamuktaindet ne Toroor Gideon, “Asarwok eng' pichooto pogol somok che kalap peek, ak ande Midianik euneguk. Ago ingoba piik tugul, ingowo chii tugul oldanyi.”

⁸ Koip anyun piik amitwogik eng' eunekwak ak igondisyekwak. Ki mwachi `ineendet piigap Israel tugul koba, kwo chii tugul emainnyi, ago ki raany piik pogol somok. Ki mi piigap lugeet che po Midian eng' atebweet ng'wony eng' ole ki mi Gideon.

⁹ Ki leenji `Kamuktaindet ne Toroor ineendet kemounooto, “Ng'eet, choortegei nganaseet; amu kaande eung'ung'.

¹⁰ Ago ngot iywei iwe, obe ak otwogindeng'ung' Pura ochoortegei tuwai nganaseet.

¹¹ Ui ak igas kiit ne mwaei icheek; ak ye ibata inyiganitu ak ichoortegei ibookyi nganaseet.” Ki choortagei anyun ak otwogindennyi Pura agoi koit ole pooch piik che ki mi nganaseet che tinyei kariik.

¹² Kiga ruiyo Midianik, Amelegik ak piigap kong'asiis tugul eng' atebweet koigei chereng'enyinik eng' chaang'indo ak ki ma koitoksei, ki tee tambeesikwak ng'aniegap ngeguutap nyanjet eng' chaang'indo.

¹³ Kingo it Gideon yooto, ko ki mi chiito ne ki mwachi chorwennyi karwotitoet koleenji, “Keero, koarwotyi karwotitoet: koibutyi magatyat ne ming'in ne po baale nganaseetap Midian ak kororokyi emait, yeityo kokwer koluul ak kogabui koru eng' ng'wony.”

¹⁴ Ki wolji chorwennyi koleenji, “Niito koma kiit age kobatee rotwetap chok ne po Gideon weeriitap Joash, chiitap Israel. Kagonde Kamuktaindet Midian ak lugeet tugul eunekyik.”

¹⁵ Ye kingo kas Gideon mwaunetap karwotitaonooto ak weegennyi, kong'uruuk kosa; ak ki wo koweektagei nganaseetap Israel ak komwa kole, “Ong'eetyee, amu kagonde Kamuktaindet ne Toroor eunekwok lugeetap Midian.”

¹⁶ Kipchei Gideon anyun pichooto pogol somok koek kweanaik somok. Ki igoochi age tugul eng' icheek igoondit, tereet ne ma mi kiy, kobooto kegengetap maat ne mi tereet age tugul.

¹⁷ Ki leenji icheek, “Ogeera, ak oyai ko uu ye ayae. Ye kaait ye pooch nganaseet, ko uu ye ayae, oyai ak okweek ko uu nooto.

¹⁸ Ye aguut igoondit, anee ak piik tugul che mi kobooto, oguut anyun ak okweek igondisyek eng' komosta age tugul ne po nganaseet tugul ak omwa ole, ‘Po Kamuktaindet ne Toroor ak Gideon.’ ”

¹⁹ Ki it anyun Gideon ak pichooto pogol che ki mi kobooto ineendet, ole pooch nganaseet eng' taunetap riipseet ne po kemoi kween, ye kata kewale riipseet. Ki kuut igondisyek ak kotui tereenik che ki mi eunekwak.

²⁰ Ki kuut kweanaichooto somogu igondisyek, ak kotui tereenik. Kiname eunegap kaataam kegenganigap maat ak konam igondisyek eng' eunekwak che po tai si koguut; ak kiwaach kole, “Rotwetap chok ne po Kamuktaindet ne Toroor ak ne po Gideon.”

²¹ Ak ki tonon chii tugul eng' komostanyi ko kayiem nganaseet. Ak ki rwai lugeet tugul che ki mi nganaseet oriit, ak kowaakyo icheek ye ki mwee.

²² Ye ki kiguute igondisyechooto pogol somok, kogoochi Kamuktaindet ne Toroor kobar chii age tugul chiito ne kaonei eng' nganaseet tugul. Kimwei lugeet kot koit Beth-sita kotokyigei Serera, agoi kiwotetap Abel-meolah ole neegitee Tabat.

²³ Ki iyumgei murenigap Israel kobun Naphtali, Asher ak Manasseh tugul ak koon Midianik.

²⁴ Ki iyookto `Gideon piik koba emet komugul ne po tuloonoogap Ephraim koleenji, “Ochoorugei, kebargei ak Midian, ak onam kebeberwek che mi peek agoi Beth-bara ak Jordan.” Ki iyumgei anyun murenik tugul che po Ephraim ak konam kebeberwek che mi peek tugul kot koit Beth-bara agot Jordan.

²⁵ Ki nam `icheek pounik aeng' che po Midian, Oreb ak Seeb. Ak ki par Oreb eng' rwandetap Oreb, ak kobarchi Seeb ole kitue sabibuk eng' Seeb, ak ko oon Midianik. Ak ki ip `icheek metitap Oreb ak ne po Seeb koipchi Gideon eng' Jordan pitoniin.