KIRUOGIK 6 - Bukuit Ne Tilil

Gideon ak Midianik

¹ Ki yai piigap Israel yaityet eng' taitap Kamuktaindet ne Toroor; ak ki inde `Kamuktaindet ne Toroor icheek eunegap Midian kenyiisyek tisap.

² Ak ki iterteer eutap `Midian Israel. Ki paljigei piigap Israel keriingonik eng' tuloonook, kebenonik ak kiyachigei irimoik amu Midian.

³ Ye kingo kagogolso Israel, kotogos anyun Midianik, ak Amelegik ak piigap kong'asiis, kobwa kobargei ak icheek.

⁴ Kibwane konyo koteech emennywa ak kong'em ruroteetap emet, agoi koit Gaza, ama ituuch amitwogik eng' Israel, keechiir, anan ko tany anan ko sigiryo.

⁵ Amu ki pwa kotogos ak tuukwak ak emaisyekwak, ak ki mong' ko uu chereng'enyinik eng' chaang'indo; ki ma ko iitoksei icheek ak tambeesikwak; ak ki pwa kong'em emet.

⁶ Ara kinyoor Israel nyalilda ne oo amu Midianik, ak ki riirchi piigap Israel Kamuktaindet ne Toroor.

⁷ Ak ye kingo riirchi piigap Israel Kamuktaindet ne Toroor amu Midianik,

⁸ koyookyi `Kamuktaindet ne Toroor icheek maotyot. Ki mwachi koleenji, “Kamwa ko uu ni Kamuktaindet ne Toroor, Kamuktaindetap Israel kole, ‘Ki amutwak otogosu eng' Misiri ak amutwak omang'une kootap otwoknateet.

⁹ Ki atyachak eng' eutap Misiriik, ak eng' eutap tugul che ki inyaliilak, ak ki aoon icheek koba eng' taing'wong', ak agoonok emennywa.’

¹⁰ Ki aleenjok, ‘Aa Kamuktaindet ne Toroor Kamuktaindeng'wong'; moiywei kamuktaigap Amorik, che omenye emennywa.’ Ago ma ogas iit kutinnyu.”

Kuursetap Gideon

¹¹ Ki nyo malaikaiyatap Kamuktaindet ne Toroor ak kotebee keetitap alayet keel ne ki mi Ophrah, ne ki po Joash Abiesrindet. Kituei weeriinnyi Gideon nganuuk eng' ole kitue sabibuk, si kobiit kouny nganuchooto eng' Midianik.

¹² Ak ki mong'ji ineendet malaikaiyatap Kamuktaindet ne Toroor ak koleenji, “Mi Kamuktaindet ne Toroor kobooten, inyee chiito ne ii kiim ak ko ii nyigan!”

¹³ Ak ki leenji `Gideon ineendet, “Ee, Kiptaiyandennyu, ngot komi Kamuktaindet ne Toroor kobootech, ko amu nee si kobwanjech tuguuchu tugul? Mi ano poisyonikyik tugul che po kwong'eet che kimwaiwech kwanisyekyok, koleenjech, ‘Tos ki ma imutwech Kamuktaindet ne Toroor ketogosu eng' Misiri?’ Ago ki kobagaktech Kamuktaindet ne Toroor ak kondaech eunegap Midianik.”

¹⁴ Ak kigusyi kong' `Kamuktaindet ne Toroor ineendet ak koleenji, “Ui eng' kimnatoning'ung', ak isaru Israel eng' eutap Midianik. Tos ma ayookten?”

¹⁵ Koleenji Gideon, “Ee, Kiptaiyat, asaruunee nee Israel? Keero, ooreennyo ko ponoon kosiir tugul che po Manasseh ak ko aa ne ming'in eng' tugul eng' kootap kwandanyu.”

¹⁶ Ak ki leenji Kamuktaindet ne Toroor, “Ami kobooten iman ak ibare Midianik ko uu yo chiito agenge icheek.”

¹⁷ Ki leenji Gideon, “Ngot ko kaanyooru chameet eng' taing'ung', iboorwo anyun kaboorunet ile inyee ne ing'alaalwo.

¹⁸ Asaain ale amat iwe eng' yu agoi anyo ole imi, ak aibu kagoochinennyu ak ande taing'ung'.” Ak ki le, “Atebye kot iitu kogeny.”

¹⁹ Ki wo anyun Gideon koonnyi, ak kochop aarwetap ng'oroor, ak magatiinik che ma kinde mermereek che po peek che ng'ootiin keruutik tiptem. Ki inde panyeek kerebet, ak ki inde suuteek tereet ak koipchi ineendet eng' keetitap alayet keel, kwo kogoochi.

²⁰ Ki leenji malaikaiyatap `Kamuktaindet ineendet, “Inemu panyeek ak magatiinik che ma kinde mermereek, ak igonoor kooi ak irong'u suuteek.” Ak ki yai ko uu nooto.

²¹ Ki iyogoito malaikaiyatap Kamuktaindet ne Toroor walitap kirokto ne ki tinyei eng' eunnyi ak kotwae panyechooto ak magatinichooto ma kinde mermereek. Ki togosta maat eng' koyata ak kobeel panyeek ak magatinichooto ma kinde mermereek. Yeityo kobetito kwo malaikaiyatap Kamuktaindet ne Toroor eng' tainnyi ne mata kogeer.

²² Ak ki keer Gideon kole kaagaa ineendet ko malaikaiyatap Kamuktaindet ne Toroor, ak ki le ineendet, “Pwo! Ee Kiptaiyat Kamuktaindet ne Toroor! Kaageer malaikaiyatap Kamuktaindet ne Toroor kimni.”

²³ Ki leenji `Kamuktaindet ne Toroor ineendet, “Ingotep kaalyeet kobooten! Meiywei, memee.”

²⁴ Koteekyi Gideon anyun Kamuktaindet ne Toroor kaptisisyet eng' yooto, ak koguure “Kamuktaindet ne Toroor ko kaalyeet.” Miitei agoi kora eng' Ophrah ne po Abiesrik.

Kobute Gideon kanamwetap Baal

²⁵ Ki leenji `Kamuktaindet ne Toroor ineendet kemounooto, “Kweri kirgitap kwandang'ung', kirgitap aeng' ne po kenyiisyek tisap, ak ibut kapkorosutap Baal ne tinyei kwandang'ung' ak iluul Asera ne neegitee kapkorosunooto.

²⁶ Yeityo iteekyi Kamuktaindet ne Toroor Kamuktaindeng'ung' kaptisisyet eng' paragutap irimoniito, kotetak komyee, ak ikweri kirgit ne po aeng' ak igoite kagoochinet ne kibeelei kobooto kweenigap Asera che iebe.”

²⁷ Ki imut anyun Gideon piik taman eng' otwogikyik ak koyai ko uu ye kamwachi Kamuktaindet ne Toroor. Amu ki iywei piigap kootap kwandanyi ak piigap nganaseet, koma imuuch anyun koyai peet, koyai kemoi.

²⁸ Ye kingo ng'eetyo piigap nganaseet kota ko karon inne, ogeero, ko kiga kebut kapkorosutap Baal, ak kiga kiluul Asera ne kineegite kapkorosuut ak kiga kigoito kirgit ne po aeng' eng' kaptisisyet ne kiga kiteech.

²⁹ Koleenjigei, “Ng'oo ne koyaei kii?” Ak ye kingo kin ak koteebat, konai kole, koyaei kiito Gideon weeriitap Joash.

³⁰ Koleenji piigap nganaseet Joash, “Imutu weeriing'ung' komong', kebar; amu kabut kapkorosutap Baal ak koep Asera ne komi yooto.”

³¹ Ago ki leenji Joash piik tugul che ki ibeligei ak ineendet, “Ong'alaali otoreti Baal? Anan osaru ineendet? Ne ng'alaali agobo ineendet ko myee kebar kota ko karon. Ngot ko kamuktain ineendet, ko ingong'alaal kotoretkei, amu kogoluul chiito kapkorosunnyi.”

³² Koguure anyun ineendet eng' peetuunooto Jerubaal, kole, “Ingong'alaal Baal korwookyi ineendet,” amu kobut kapkorosunnyi.

³³ Ki iyumgei anyun Midianik tugul ak Amelegik ak piigap kong'asiis, ak kolong' koteech atebweetap Jezreel.

³⁴ Ago ki nyoonji Kabuusetap Kamuktaindet ne Toroor Gideon; ak ki kuut igoondit ak ki iyumgei Abiesrik koosup ineendet.

³⁵ Ki iyookto piik koba Manasseh komugul, ak ki iyumgei ak icheek koosup ineendet. Ki iyookto piik alak koba Asher, Zebulun ak Naphtali, ak ki togos kotorook icheek.

³⁶ Ki leenji `Gideon Kamuktaindet, “Ngot isaru Israel eng' eunnyu ko uu ye ki imwa,

³⁷ keero, andoi koroorigap keechiirek rwanyut ne kiboorsee. Ngot konam rewoot koroorik icheegei ak ko yaamaat ng'wonyut tugul anai anyun ale isaru Israel eng' eunnyu, ko uu ye ki imwa.”

³⁸ Ak ki ek ko uu nooto. Eng' peetuut ne po aeng' koging'eet kota ko karon miising', ak koruruny koroorik, ak koiiny komong' peegap rewoot kot konyi taabeet.

³⁹ Ki leenji `Gideon Kamuktaindet, “Amat kolalyo nereegeguk agobo anee, kota amwa ni kityo. Asaain ale chamwo atyem koroorik konyil agenge kogeny. Ingosaiyo koroorik icheegei ak ingobiit rewoot eng' ng'wonyut tugul.”

⁴⁰ Ara ki yai Kamuktaindet ko uu nooto kemounooto. Ki saiyo koroorik icheegei ak ki piit rewoot eng' ng'wonyut tugul.