KIRUOGIK 5 - Bukuit Ne Tilil

Tyendap Debora

¹ Eng' peetuunooto, ko kityenso anyun Debora ak Barak weeriitap Abinoam koleen,

² “Amu ki indo kandoik eng' Israel, amu ki igoitogei piik ak icheek eng' chamyet. Olasu Kamuktaindet ne Toroor!

³ Ogas, okweek laitorinik! Oep iit, okweek pounik! Atyenjini anee Kamuktaindet ne Toroor. Atyenjini kalasunet Kamuktaindet ne Toroor, Kamuktaindetap Israel.

⁴ Ee Kamuktaindet ne Toroor, ye ki imande eng' Seir, ye ki imande eng' kooretap Edom, kobotan ng'wony ak koroobon kipsengwet, ee, kosooi poolik peek.

⁵ Ki root tuloonook kotendeen eng' taitap Kamuktaindet ne Toroor, nooto po Tulweetap Sinai, eng' taitap Kamuktaindet ne Toroor, Kamuktaindetap Israel.

⁶ Eng' peetuusyegap Shamgar weeriitap Anat, eng' peetuusyegap Jael, ko ki ma kobunei chii ortinwek che eecheen, ak kibunoti kiprutoinik ortinwegap taban.

⁷ Kimatagomi pounik eng' Israel, ki igeskei kot ang'eet anee Debora, ang'eet anee kamet eng' Israel!

⁸ Ki lewen kamuktaik alak, kobiit lugeet eng' kurgotik. Tos kige keerei long'eet anan ko ng'otit eng' piik eliphuusyek artam eng' Israel?

⁹ Tokyingei muguleldanyu pounigap Israel, che ki igoitogei eng' chamyet eng' kwenutap piik. Olasu Kamuktaindet ne Toroor!

¹⁰ Omwaite okweek che obune sigiroik che leelach, che otebee ngoroik che ki itoi che po kamanuutyet ne oo, ak okweek che obendoti eng' ooreet.

¹¹ Eng' cheetap putiik, eng' komoswek che kirame peek, yooto ye mwaitoe poisyonigap imanda che po Kamuktaindet ne Toroor, poisyonigap imanda che po pounatennyi eng' Israel. Yeityo korekto piigap Kamuktaindet ne Toroor koba kot koit ormariichok.

¹² Ng'eet, ng'eet, Debora! Ng'eet, ng'eet, tyen! Ng'eet, ee Barak, imut luuleniguk che ki iluul, inyee weeriitap Abinoam.

¹³ Yeityo kochoorgei che ki ng'et che po piik che taagunotiin, ki choorgei piigap Kamuktaindet ne Toroor agobo ineendet, si kobargei ak che nyigoonen.

¹⁴ Kimang'une Ephraim che salu Amelek; kosubun, inyee Benjamin, che otupche. Ki pun Makir pounik, ak ki pun Zebulun icheek che tindoi kirokto ne po kandoindet ne oo ne po lugeet.

¹⁵ Ki mi pounigap Issakar kobooto Debora; kiit ne ki uu Issakar, ko ki yai nooto Barak agine; kirwoochi atebweet koosubi keelyekyik. Eng' ortinwegap Reuben ko ki mi kasiagutik che eecheen che po muguleldo.

¹⁶ Ki lya si itebee kwenutap piusyegap keechiirek, si igas kuutetap ndurerusyek che kiguutyin akwotisyek? Eng' ortinwegap Reuben ko ki mi kasiagutik che eecheen che po muguleldo.

¹⁷ Ki meny Gilead Jordan pitoniin, ak Dan, ko kilya si kotebee melisyek? Ki tep Asher kosisyigei eng' ngeguutap nyanjet, komeny ole neegitee luukwegap peekyik.

¹⁸ Zebulun ko ki piik che ki inde saboonwekwak ng'oiyonditap meet, ak ki yai Naphtali agine eng' oldinwek che torooreen che po emet.

¹⁹ Ki pwa laitorinik, koyai lugeet; ki pargei ak laitorinigap Kanaan; eng' Taanak ole neegitee peegap Megiddo, ma ip kelunoi alak tugul che po fedha.

²⁰ Ki yai kecheik lugeet kong'etee kipsengwet, eng' ortinwekwak che torooreen ko ki pargei ak Sisera.

²¹ Kila icheek aineetap Kison, ainonooto po keny, aineetap Kison. Ee saboondanyun, ui tai eng' kimnateet!

²² Ak kityech ng'wony keelyegap paraisisyek; kobooto toroombenet, toroombenetap keelyegap che kiimeen.

²³ Ochup Meros, mwaei malaikaiyatap Kamuktaindet ne Toroor, ochup eng' chubeet ne ng'waan piik che menyei olooto, amu ma pwa kotoret Kamuktaindet ne Toroor, kotoret Kamuktaindet ne Toroor agobo che kiimeen.

²⁴ Egu Jael ne iberuuroti eng' kwonyiik, osotyotap Heber Kenindet, eng' kwonyiik che menyei emait ko egu ne iberuurot.

²⁵ Ki soom peek, ago ki inage cheego; ki ipchi mwaitap cheego eng' taabeet ne po teegisto.

²⁶ Ki inem tigongyot, ak kiname eunnyi ne po tai kiriswetap musogindet; ak kokwere Sisera kiriswonooto, kikwer kotui metinnyi, kitoor ak konyarnyar mwaitap kondanyi.

²⁷ Eng' keelyekyik kogiluul, koru kochulak; eng' keelyekyik kogiluul, koru kosiis; ole kiluuljigei, ko ki ru anyun kome.

²⁸ Ki itito eng' tirisia, kotabendo, ak ki riir kametap Sisera eng' tirisyetap segengeisyek kole, ‘Amu nee si kogagei chepkichutinnyi ma sip konyo? Amu nee si kogagei cheetap keelyegap kariisyekyik?’

²⁹ Ki wolji kwonyiikyik che ng'oomen kole iman, kawoljigei ineendet teebutyet,

³⁰ Tos tomo konyoor ak kopchei parunenik? Chepto agenge anan tiibiik aeng' ko punjin chii agenge; punjin Sisera, parunenigap saleiywek che teer. Parunenigap saleiywek che teer che po nabutigap lelesta, che po saleiywek aeng' che teer che po nabutigap lelesta eng' kaatwegap luulenik kobunjo.

³¹ Ingobek kowong'kei puuniguk tugul, ee Kamuktaindet ne Toroor! Ago ingoigei che chamei ineendet asiista, ye charu eng' kimnateennyi!” Ki piit kaalyeet anyun eng' emet kenyiisyek artam.