KIRUOGIK 4 - Bukuit Ne Tilil

Debora ak Barak

¹ Ki yai piigap Israel yaityet kogeny eng' taitap Kamuktaindet ne Toroor ye kingo kagome Ehud.

² Ki alda `Kamuktaindet ne Toroor icheek koba eunegap Jabin laitoryatap Kanaan, ne ki laitorani eng' Hasor. Ki indochin lugeennyi Sisera, ne ki menyei Haroset ne po Pororyosyek.

³ Ki riirchi anyun `piigap Israel Kamuktaindet ne Toroor amu ki tinyei kariisyegap kariik pogol sogool, ak kiga konyaliil piigap Israel eng' kimnateet eng' kenyiisyek tiptem.

⁴ Eng' peetuusyechooto, ko kirwoogindetap Israel Debora maotyot, kwondap Lapidot.

⁵ Ki tebee tiiretap Debora keel eng' kwenutap Ramah ak Bethel eng' emetap tuloonook ne po Ephraim. Ki cham kotogosu piigap Israel ole mi ineendet kobwanei kirwooget.

⁶ Ki iyookto ineendet kole keguur Barak weeriitap Abinoam eng' Kedes-naptali ak koleenji, “Tos ma ng'at Kamuktaindet ne Toroor, Kamuktaindetap Israel kole, ‘Ui iriikyi tulweetap Tabor, ak imutu eliphuusyek taman kobun piigap Naphtali ak che po Zebulun?

⁷ Amutun Sisera kandoindet ne po lugeetap Jabin, konyo si otuye eng' aineetap Kison kobooto karisyekyik ak piikyik che chaang'; andoi ineendet euneguk.’ ”

⁸ Kowolji Barak kole, “Ngot kebendi tuwai, awendi. Ago ngot koma kibendi tuwai, koma wendi.”

⁹ Kole, “Kibendi tuwai iman. Ago panda ne iwendi, koma siinyoorchigei inyee teegisto amu indoi Kamuktaindet ne Toroor Sisera eunegap kwony.” Ki ng'eet Debora koba Kedesh ak Barak.

¹⁰ Ki kuur `Barak Zebulun ak Naphtali kobwa Kedesh. Ki togosta koba kiplugotinik eliphuusyek tamanu koosup ineendet, ak ki wo Debora agine kobooto ineendet.

¹¹ Kiga kotabaanegei Heber Kenindet, Kenik chuun alak, che echegeet ko lagogap Hobap kabyugoitap Musa, ak kwo koteech emainnyi eng' ole mi keetit eng' Saananim, ye neegitee Kedesh.

¹² Ye ki ngemwachi Sisera keleenji kowa Barak weeriitap Abinoam kotogosta tulweetap Tabor,

¹³ koyum kariisyekyik tugul, kariisyegap kariik pogol sogool ak piik tugul che ki mi ak ineendet, kong'etee Haroset, agoi aineetap Kison.

¹⁴ Koleenji Debora Barak, “Ng'eet! Ni peetuut ne indoi Kamuktaindet ne Toroor Sisera eung'ung'. Mi Kamuktaindet ne Toroor kondoun.” Ki wo anyun Barak kochoortagei eng' tulweetap Tabor, kobooto kiplugotinik eliphuusyek taman kosubi ineendet.

¹⁵ Ki iseer `Kamuktaindet ne Toroor Sisera kobooto kariisyekyik tugul ak lugeennyi tugul eng' rotwetap chok eng' taitap Barak. Ki choorgei Sisera eng' chepkichutinnyi ak komwei eng' keeldo.

¹⁶ Ki oon Barak kariisyek kobooto lugeet kot koit Haroset. Ki pek lugeet komugul ne po Sisera eng' rotwetap chok kot koma ng'et chii.

¹⁷ Ki mwei Sisera kobun keeldo, agoi koit emaitap Jael osotyotap Heber Kenindet amu ki ting'egei kaalyeet Jabin laitoryatap Hasor ak kootap Heber Kenindet.

¹⁸ Ki manda Jael kotorookto Sisera ak koleenji ineendet, “Nyoo ko, kiptaiyandennyu. Nyoo ole ami, ameiywei!” Ki wo ole mi eng' emait, ak kituge ngoryeet.

¹⁹ Yeityo koleenji, “Asoomin ale inaga peek tutigin aee, amu ama melel.” Ki yaat soteetap cheego ak konaga kolu yeityo kotuch.

²⁰ Ki leenji chiichooto ineendet, “Tonon eng' kurgeetap emait si ye nyo chii age tugul ak koteebenen kole, ‘Mi chii yu?’ Ileenji, ‘Achicha.’ ”

²¹ Ki inem Jael osotyotap Heber tigongyotap emait ak kiriswet ak kwo kosapchi yeityo kotoree tigongyondonooto mwaitap kondanyi kot komanda kwo kotoor ng'wonyut; ki ruei ineendet miising' amu ki kang'et, ak kime.

²² Ye kingo ta koonei `Barak Sisera, komong' Jael kotorook ineendet ak koleenji, “Nyoo aboorun chiito ne icheeng'e.” Ki nyo ye ki mi ineendet ak konyoor koruei Sisera ko kagome, ak ki mi tigongyot mwaitap kondanyi.

²³ Eng' peetuunooto anyun, ko ki iterteer `Kamuktaindet Jabin laitoryatap Kanaan eng' taitap piigap Israel.

²⁴ Kong'eete peetuunooto, ko ki kimiit eutap `piigap Israel koterteer Jabin laitoryatap Kanaan, kot kobar kowong' ineendet.