KIRUOGIK 21 - Bukuit Ne Tilil

Kesaru Benjaminik koma ininda

¹ Kiga koyasyo piigap Israel eng' Mispa, kole, “Ma igoochin chii eng' acheek cheptonyi Benjamin kotun.”

² Ki pwa piik Bethel ak kotep ng'wony eng' yooto eng' taitap Kamuktaindet kot koit koskoleny, ak kowaach, ak koriiryo ne ng'waan.

³ Ak kole, “Ee, Kamuktaindet ne Toroor, Kamuktaindetap Israel, amu nee si kobiit kii eng' Israel, kot koma komi rani ooreet age eng' Israel?”

⁴ Ak ki eng' mutai kong'eetyo piik kota ko karon, ak koteech kaptisisyet eng' yooto, ak kogoito kagoochinoik che kibeelei ak kagoochinoigap kaalyeet.

⁵ Ki le piigap Israel, “Mi ng'oo eng' ortinwek tugul che po Israel ne ma nyo kotogos tuiyet ole mi Kamuktaindet ne Toroor?” Amu kiga yai kayasyoet ne oo agobo ineendet ne ma nyo kotogos ole mi Kamuktaindet ne Toroor eng' Mispa, kole, “Kibarei ineendet iman.”

⁶ Ago ki sich riirge piigap Israel agobo Benjamin tupchennywa, ak ki mwa kole, “Mi ooreet agenge ne kagobet ra eng' Israel.

⁷ Kiyae nee si konyoor osotik icheek che kong'et, amu ki kiyasye eng' Kamuktaindet ne Toroor keele ma kigoochini icheek tiibiikyok kotun?”

⁸ Ak ki le icheek, “Ng'oo ne po ortinwek eng' Israel ne ma nyo kotogos ole mi Kamuktaindet ne Toroor eng' Mispa?” Ak ogeero, Ki ma nyo chii agot agenge nganaseet ne ki punu Jabes-gilead konyo tuiyet.

⁹ Amu ye kingo kagiit piik, ogeero, ki ma komi chii eng' piik che ki menyei Jabes-gilead.

¹⁰ Ara ki iyookto `tuiyet piik eliphuusyek taman ak aeng' che po che nyigoonen eng' tugul, ak kong'at icheek koleenji, “Oba obar eng' rotwetap chok piik che menyei Jabes-gilead, kobooto kwonyiik ak lagok.

¹¹ Kiit ne obendi oyae ko ni; obare ogesu muren age tugul ak kwony age tugul ne ki koruiyo ak muren.”

¹² Ki nyoor eng' piik che ki menyei Jabes-gilead pergeinik pogol ang'wan che neranik, che ki tomo konai muren, ak ki imut icheek kobwa nganaseet eng' Shiloh, ne mi emetap Kanaan.

¹³ Ki iyookto tuiyet komugul piik koba kong'alaalji lagogap Benjamin che ki mi rwandetap Rimon oriit, ak komwachi icheek kaalyeet.

¹⁴ Ki week Benjamin eng' peetuusyechooto; ak ki igoochi icheek kwonyiik che ki sar kosapcho eng' che po kwonyiigap Jabes-gilead; ago ki ma yam icheek.

¹⁵ Ki aragenso piik agobo Benjamin amu ki koyai Kamuktaindet ne Toroor koyaatak oldo age eng' ortinwegap Israel.

¹⁶ Ki le anyun poisyegap tuiyet, “Ki yai nee si konyoor osotik icheek che kong'et, amu ki kibar kwonyiik eng' Benjamin?”

¹⁷ Ak ki le icheek, “Ne matiny konyolu kobiit poroteet eng' icheek che kichililso che po Benjamin, si ma pet ooreet age eng' Israel.

¹⁸ Ago ma kimuuchi kigoochi icheek osotik eng' tiibiikyok.” Amu kiga koyasyo piigap Israel, kole, “Chuboot ne igoochin osotyot Benjamin.”

¹⁹ Ak ki le icheek, “Ogeero, miitei igoortap Kamuktaindet ne Toroor eng' kenyiit age tugul eng' Shiloh, ne miitei murot kaataam ne po Bethel, eng' komostap kong'asiis ne po ooreet ne oo ne togostoi eng' Bethel kowendi Shekem, ak eng' murot tai ne po Lebanon.”

²⁰ Ak ki ng'at lagogap Benjamin, koleenji, “Oba, oribisye eng' mbareenigap sabibuk,

²¹ ak ogeer, ngot komong' tiibiigap Shiloh kobwa kourerenso eng' ureryosyek, omong'u anyun eng' mbareenigap sabibuk, konam chii tugul osotyonnyi eng' tiibiigap Shiloh, kobwa emetap Benjamin.

²² Ak ye pwa kwanisyekwak anan ko tupchosyekwak koboljech, keleenji anyun, ‘Ogoonech icheek eng' myeeindo, amu ma kimutu chii tugul eng' acheek osotyonnyi eng' pooryeet, ama ogoochi okweek icheek. Amu nda ki koyai ko uu nooto, ta otinye tengekto.’ ”

²³ Ki yai ko uu nooto lagogap Benjamin, ak ki imutyigei osotik, che tee koiitennywa, eng' che kiuerendos che ki imut. Ki pa koweektagei ole kimi porotennywa, ak ki teech nganasook ak komeny.

²⁴ Ki pa piigap Israel eng' peetuusyechooto, kwo chii tugul pororyennyi ak ole kimi ooreennyi, kimanda eng' yooto chii tugul kwo ole mi porotennyi.

²⁵ Ki ma komi laitoryat Israel eng' peetuusyechooto. Kiyaei chii tugul ko uu ye kigeerei kole myee.