KIRUOGIK 2 - Bukuit Ne Tilil

Ngelelnatetap piigap Israel

¹ Ki togos malaikaiyatap Kamuktaindet ne Toroor eng' Gilgal konyo Bochim ak kole, “Ki amutwak otogosu eng' Misiri, obwa emet ne ki ayosyechi kwanisyekwok. Ki amwa ale, ‘Ma koi abut kayomisennyu ne ki kiarorchigei ak okweek.

² Eng' kebebertang'wong' ko mat oyai arorut ak piik che menyei emoni. Obut kapkorosusyekwak.’ Ago ma ogas iit kutinnyu. Nee ni ka oyai?

³ Ki amwa ale ma oone icheek koba eng' taing'wong', ago egu che inyalilok, ak koek kanamonikwak mestonok eng' okweek.”

⁴ Kingo kagomwachi malaikaiyatap Kamuktaindet ne Toroor ng'aleechu lagok tugul che po Israel, kowaakyo ak koriiryo miising'.

⁵ Ak kiguure yooto Bochim, ak eng' yooto koeng'ji Kamuktaindet ne Toroor.

Meetap Joshua

⁶ Kingo kagoleenji `Joshua piik koba, kwo chii tugul eng' piigap Israel ole mi porotennyi ak konam emet.

⁷ Kiboisyechi `piik Kamuktaindet ne Toroor eng' peetuusyek tugul che po Joshua, ak eng' peetuusyek tugul che po poisyek che kita komi ko kagome Joshua, che kiga kogeer poisyet tugul ne oo ne ki yai Kamuktaindet ne Toroor koyachi piigap Israel.

⁸ Kime Joshua weeriitap Nun otwogindetap Kamuktaindet ne Toroor ko po kenyiisyek pogol ak taman.

⁹ Kitup `icheek ineendet eng' kiwotetap emennyi eng' Timnat-heres, eng' emetap tuloonook ne po Ephraim, eng' murot kaataam ne po tulweetap Gaas.

¹⁰ Ki pek ak icheek tugul che po ibinato ak ki kiyumji kapkwanisyekwak. Ki piit ibinda age eng' let ne ki ma kongen Kamuktaindet ne Toroor, anan ko poisyet ne kiga koyai ineendet agobo Israel.

Kometoi kayaneet piigap Israel

¹¹ Ki yai piigap Israel yaityet eng' taitap Kamuktaindet ne Toroor koot Baalik.

¹² Ki meto Kamuktaindet ne Toroor, Kamuktaindetap kwanisyekwak, ne ki imut icheek komong' eng' emetap Misiri, ak koosup kamuktaik alak, che po piik che ki menyei komoswekwak tugul, ak kong'uruukyi kanamonichooto. Kitach Kamuktaindet ne Toroor kot konereech.

¹³ Ki meto Kamuktaindet ne Toroor, ak koot Baal ak Astarot.

¹⁴ Ki nereech kot Kamuktaindet ne Toroor agobo Israel, ak ki inde icheek eunegap piik che kiluul icheek. Ki aldochi eunegap puunik che kiluul icheek kot ko ki mata komuuchi kotononso eng' taitap puunikwak.

¹⁵ Komosta age tugul ole ki pa icheek, ko ki mi eutap Kamuktaindet ne Toroor si kogoochi kiterteer, ko uu ye kiga koyasyechi `ineendet icheek, ak kinyalilso miising'.

¹⁶ Ki ing'eetyi `Kamuktaindet ne Toroor icheek kirwoogik, che ki sar eng' eunegap piik che kiluul icheek.

¹⁷ Nga no, koma kas iit icheek kirwoogikwak kora. Ki isubot kamuktaik alak koibotkei ak kong'uruuk eng' tainnywa. Kimasta kochaakta kobagaakta ooreet ne kibunei kwanisyekwak, che kigase iit ng'atuutigap Kamuktaindet ne Toroor; ma yai icheeget ko uu nooto.

¹⁸ Kingo ng'eetyi `Kamuktaindet ne Toroor kirwoogik, ko ki mi Kamuktaindet ne Toroor kobooto kirwoogindet, ak kosar icheek eng' eunegap puunikwak eng' peetuusyek tugul che po kirwoogindonooto. Ki riiree Kamuktaindet ne Toroor eng' tigenennywa ak eng' icheek che ki inyalili ak koimi.

¹⁹ Ago kingo me kirwoogindet, koweigei let ak koyai tuguuk che yaach kosiir kwanisyekwak, kosubi kamuktaik alak, kootei ak kong'uruukyin. Ma siisyo eng' poisyonikwak anan eng' ooreetap ngelelnatennywa.

²⁰ Ki nereech kot Kamuktaindet ne Toroor agobo Israel ak komwa kole, “Amu ki kobistoe pororyoni kayomisennyu ne ki ang'at kwanisyekwak, ama kas iit kutinnyu,

²¹ koma aoone eng' tainnywa age tugul eng' pororyosyek che ki pagaakta Joshua ye kingo kagome.

²² Aboisyee icheek atyemee Israel si ageer ngot komuuchi koriip kobendatee iman ooreetap Kamuktaindet ne Toroor ko uu ye ki riip kwanisyekwak.”

²³ Ki pagaakta anyun Kamuktaindet ne Toroor pororyosyechooto, ma oon kochaakta, ama inde icheek eutap Joshua.