KIRUOGIK 16 - Bukuit Ne Tilil

Samson ak Delila

¹ Eng' peetuut age kogiwo Samson Gaza, ak kogeer eng' olooto chepkugoniot ak kotuiyogei ak ineendet.

² Ki kimwachi Gasik keleenji, “Kagonyo Samson oli.” Ak kiyiem ineendet ak kiribisyo koriip kemout komugul eng' kurgeetap nganaseet. Kisiisyo kemout komugul koleen, “Ingotebi agoi koeech, si kebar ineendet.”

³ Ki ru Samson agoi kemoi kween, ak king'eet kemoi kween, ak ki nam kurgotigap ormariichetap nganaseet, kobooto tugatugikyik aeng', kotut kobooto temeleiywot ak kotiiny kaat yeityo koip kot koit tulweet parak ne tokyingei Hebron.

Kong'wektoi `Delila Samson

⁴ Kingo pata nooto kocham `Samson kwondo age ne ki mi atebweetap Sorek, ne ki kiguure kainennyi Delila.

⁵ Ki togos kiptainigap Philistiik kobwa ole mi kwonyooto ak koleenji ineendet, “Igaigai ineendet, si inai ole mi kimnatoninyi oo, ak ole kimuuchi kiterterte ineendet, si kobiit kerat ineendet kinyalil; si kogoonin age tugul eng' acheek fedhaisyek pogolusyek taman ak agenge.”

⁶ Ki leenji anyun `Delila Samson, “Asoomin ale mwaiwo ole mi kimnatoning'ung' oo, ak kimuuchi keratenen nee si kinyaliilin.”

⁷ Ki wolji `Samson ineendet kole, “Ngot keratena inoik tisap che ta ko lelach, che tomo koyaamyo, anyaluli anyun ak aigei chii tugul.”

⁸ Ki ipchi anyun `kiptainigap Philistiik osotyondonooto inoik tisap che ta ko leelach, che tomo koyaamyo, ak korate ineendet inoichooto.

⁹ Ki tinyei piik che ki riibei che ki mi koot ne po oriit. Ak ki leenji ineendet, “Kabwonjin Philistiik, Samson!” Ak king'eti ineendet inoichooto, ko uu ye ng'etos katanisyek ye katiiny maat. Ara ki ma naak anyun ung'ootyetap kimnateennyi.

¹⁰ Ki leenji anyun `Delila Samson, “Keero, kaichota ak imwaiwo lembech. Asoomin anyun ale imwaiwo kimuuchi keratenen nee.”

¹¹ Ki leenji ineendet, “Ngot keratena rogoosyek che leelachen che tomo keyae kiy, anyaluli anyun ak aigei chii tugul.”

¹² Konam anyun Delila rogoosyek che leelach, ak korate ak koleenji, “Kabwonjin Philistiik, Samson!” Ak ki mi piik che ki riibei eng' koot ne po oriit. Ago king'eti eng' eunekyik ko uu ye king'etyei ineet.

¹³ Ki leenji `Delila Samson, “Agoi nguno ichota kora ak imwaiwo lembech. Mwaiwo anyun kimuuchi keratenen nee.” Ak ki leenji ineendet, “Ngot ilet kaletutichu tisap po suumeekyuk eng' kiit ne kiletisye.”

¹⁴ Kiratyi sumeechooto tigongyot ak koleenji, “Kabwonjin Philistiik, Samson!” Kisiir anyun eng' rwondanyi, ak ki itut tigongyotap kimurtoiyot kobooto kiit ne kiletisye.

¹⁵ Ki leenji `kwonyooto ineendet, “Imuktoi ano imwa ile, ‘Achamin,’ ama mi muguleldang'ung' kobooto? Koichota konyil chuuto somok, ama imwaiwo ole mi kimnatoning'ung' oo.”

¹⁶ Ak kingo kagoiim peetuusyek che chaang' eng' ng'aleekyik, ak kobirchin, kong'et anyun saboondanyi agoi kome mugulel.

¹⁷ Ara ki mwachi tugul che ki mi muguleldanyi koleenji, “Tomo kicher metinnyu ole kigoi; amu ki aegu Nasaretindetap Kamuktaindet kobooch ami moetap kamennyu. Ngot kicher metinnyu, kowendi anyun kimnateennyu eng' anee, anyaluli ak aigei chii tugul.”

¹⁸ Kingo keer Delila kole kagomwachi ineendet tugul che ki mi muguleldanyi, koyookto keguur kiptainigap Philistiik, koleenji, “Obwa otogosu anyun ra, amu kagomwaiwo tugul che mi muguleldanyi.” Ki togos anyun kiptainigap Philistiik kobwonji kwonyooto koibu fedhaisyek.

¹⁹ Ki igoochi `kwonyooto Samson koru eng' kutung'oikyik, ak kiguur chiito age konyo kocher kaletutichooto tisap po suumeekyik. Ki toi kwonyooto konyaliil ineendet amu kiga kwo kimnateennyi eng' ineendet.

²⁰ Ki le Delila, “Kabwonjin Philistiik, Samson!” Kisiir eng' rwondanyi ak kole, “Amandoi ko uu ye cham ayae kotugul, awo aleileigei.” Ago ki ma nai kole kagometo `Kamuktaindet ne Toroor ineendet.

²¹ Ki nam `Philistiik ineendet ak kobol konyekyik ak ki imut ineendet kwo Gaza. Kirate ineendet sirimwegap sugunonik, ak koyai ineendet kong'aiso eng' korgoreet.

²² Ago ki piityo suumeekyik kogeny ye kingo kagicher.

Meetap Samson

²³ Ki iyumgei `kiptainigap Philistiik koboiboitu ak kogoochi korosyot ne oo Dagon kamuktaindennywa. Amu ki mwa kole, “Kagonde `kamuktaindennyo Samson punyondennyo eunekyok.”

²⁴ Kingo keer `piik ineendet, ko ki ilas kamuktaindennywa, kole, “Kagonde eunekyok `kamuktaindennyo punyondennyo ak ko ng'emindetap emennyo, ne ki kobarenech piik che chaang'.”

²⁵ Ak kingo kaskei mugulelwekwak, kole, “Oguur Samson konyo kourerenwech.” Ak kiguur Samson komong' eng' korgoreet, ak kiureren eng' tainnywa. Ki inde `icheek ineendet kwenutap tolochik.

²⁶ Ki leenji `Samson lakweet ne kinamoti euut, “Metoo asabsap tolochik che tonone koot, si atiegei.”

²⁷ Ki nyiitaat piik koyooto: ki mi yooto kiptainik tugul che po Philistiik, ak ki mi koot parak murenik ak kwonyiik olo po eliphuusyek somok che kigeerei Samson kourereni.

²⁸ Ki kuur `Samson Kamuktaindet ne Toroor koleenji, “Ee Kiptaiyat Kamuktaindet ne Toroor, asaain ale ibwaata ak igimita ra kityo, ee Kamuktaindet, si ayaaktochigei mugetuut eng' Philistiik agobo konyekyuk tuwai.”

²⁹ Ki nam anyun Samson tolochik aeng' che kitonone koot, ak kotiegei, ki name age eutap tai, koname age murot kaataam.

³⁰ Ki le Samson, “Pagaakta ame kobooto Philistiik!” Ki ing'uruuk eng' kimnateennyi tugul, ak kiluulji koyooto kiptainik kobooto piik tugul che ki miitei oriit. Ki par eng' peetuutap meennyi piik che kisiirei che ki par kota kosabei.

³¹ Kingo pata kochoorgei anyun tupchosyekyik ak piik tugul che po kootap kwandanyi ak kosut ineendet. Ki imut ak kola kotupchi ineendet kwenutap Sora ak Estaol eng' ole kitupchin piik, ne po Manoa kwandanyi. Ki irwookyi `ineendet Israel kenyiisyek tiptem.