KIRUOGIK 14 - Bukuit Ne Tilil

Katunisyetap Samson

¹ Ki choortagei Samson eng' peetuut age kwo Timnah ak ki keer eng' olooto chepto agenge eng' tiibiigap Philistiik.

² Ak ki togos ineendet, konyo komwachi kwanda ak kamet, koleenji, “Kaageer chepto eng' Timnah eng' tiibiigap Philistiik. Ara anyun omutwaa atun.”

³ Ki leenji `kwandanyi ak `kamennyi ineendet, “Tos ma mi chepto eng' tiibiigap tupchosyeguk, anan ko eng' piikyok tugul, kot iwe itun ne po Philistiik che ma kimuratan?” Ago ki leenji Samson kwandanyi, “Omutwaa, amu achame kot.”

⁴ Ki ma nai kwandanyi ak kamennyi kole punu Kamuktaindet ne Toroor ng'olyoondonooto; amu ki cheeng'ei poroindo ne yachine lugeet Philistiik. Ki pou Philistiik Israel eng' peetuusyechooto.

⁵ Ki choortagei anyun Samson, kobooto kwandanyi ak kamennyi, koba Timnah, ak kiit mbareenigap sabibuk che po Timnah, ki keer ineendet ng'etundo ne neran ne kiborisenjin ineendet.

⁶ Ki nyoonji ineendet `Kabuusetap Kamuktaindet ne Toroor eng' kimnateet, ak ki kereer ng'etunyooto ko uu ye imuuchi kogereer aarwetap ng'oroor koma tinyei kiy eng' euut. Ago ma mwachi kwanda anan ko kamet kiit ne kayai.

⁷ Ki choortagei anyun kwo kong'alaalji kwonyooto, ak ki ibaibai kwonyooto Samson kot.

⁸ Ak ye matyanit kogiweek kwo komut kotun. Ki wo taban kogeer poortap ng'etunyooto ki kabar ak ki mi segemik kebomborwetap ng'etunyooto, ak kumyat.

⁹ Ki inem eng' eunekyik ak kwo koamat ye kitese tai kowendi. Ki it ole mi kwandanyi ak kamennyi ak ki igoochi ak ki am ak icheek. Ago ma mwachi koleenji kaanemune kumyat kebomborwetap ng'etundo.

¹⁰ Ki choortagei kwandanyi kwo ole mi kwonyooto, ak ki yai Samson igoorto eng' olooto ko uu ye ki cham koyaei murenik ko uu nooto.

¹¹ Ak ye kingo keer `Philistiik ineendet komut choronok sosom kotep kobooto ineendet.

¹² Ki mwachi `Samson icheek koleenji, “Ogany amwaiwok tangochet. Ngot omuuchi omwaiwo eng' peetuusyek tisap che po igoorto, ak onai kiit ne ibooru, agoonok anyun ngoroik sosom che po katanit ak ngoroik sosom che kiwalawali.

¹³ Ago ngot ko momuuchi omwaiwo, ogoono anyun okweek ngoroik sosom che po katanit, ak ngoroik sosom che kiwalwali.” Ak ki leenji `icheek ineendet, “Mwa tangocheng'ung', si kegas.”

¹⁴ Ara ki leenji `ineendet icheek, “Ki mang'une amindet amitwogik, ak ki mang'une ne kiim anyinyindo.” Ago ki ma imuuch icheek koboor tangochonooto eng' peetuusyek somok.

¹⁵ Eng' peetuutap tisap, koleenji `icheek kwondap Samson, “Igaigai manong'otyondeng'ung' si kobiit komwaiwech tangochet, si ma kibeelin ak kootap kwandang'ung'. Kooguurech si ogoonech pananda? Ma uu nooto?”

¹⁶ Ki riir ne po Samson eng' tainnyi, koleenji, “Iwecha kityo, ak mechama. Ki imwachi tangochet lagogap piikyuk, ama imwaiwo.” Ak ki leenji ineendet, “Keero, tomo amwachi kwandanyu anan ko kamennyu. Amu nee anyun si amwaun inyee?”

¹⁷ Ki riir eng' tainnyi peetuusyek tisap eng' peetuusyechooto po igoortanywa. Amu kiim Samson, kot ko eng' peetuut ne po tisap ko ki mwachi waluunet ineendet, yeityo komwachi `ineendet tangochonooto lagogap piikyik.

¹⁸ Ki mwachi piigap nganaseet ineendet eng' peetuutap tisap kotom kororokto asiista koleenji: “Mi nee ne anyiny kosiir kumyat? Ak nee ne kiim kosiir ng'etundo?” Ak ki leenji `ineendet icheek, “Nda ki ma obatisye rooryandennyu, ta monai kiit ne ibooru tangochennyu.”

¹⁹ Ki nyoonji ineendet `Kabuusetap Kamuktaindet ne Toroor eng' kimnateet, ak kichoortagei kwo Askelon, ki par piik sosom che po pichooto ak koip parunenikwak ak ki igoochi ngoroik che kiwalawali, icheek che ki iboor tangochonooto. Ak kinereech kot ineendet ak kitogosta kwo kootap kwandanyi.

²⁰ Ago ki kigoito ne po Samson kigoochi chiito ne ki cham kobendoti tuwai, ne kiga koyai koek chorwennyi.