KIRUOGIK 1 - Bukuit Ne Tilil

Piigap Israel kingo pata meetap Joshua

¹ Kingo pata meetap Joshua, koteepse `piigap Israel Kamuktaindet ne Toroor kole, “Ng'oo ne tai ne togostoi si kobargei ak Kanaanik agobo acheek?”

² Kole Kamuktaindet ne Toroor, “Judah ne togostoi. Ogeero, kande emonooto eunnyi.”

³ Ki leenji `Judah tupchennyi Simion, “Ngetogoste tuwai si kobiit kebargei ak Kanaanik che menye emet ne ki kigoono; si tuun keebe tuwai agane emeng'ung'.” Koba anyun Simion ak ineendet.

⁴ Ki togosta anyun Judah ak ki inde Kamuktaindet ne Toroor eunekwak Kanaanik ak Perisik. Ki par piik eliphuusyek taman eng' Besek.

⁵ Ki nyoor `icheek Adoni-besek eng' Besek, ak ki ibookyi ineendet ak koterteer Kanaanik ak Perisik.

⁶ Ki mwei Adoni-besek; ago ki oon ineendet ak ki nam ak kotil moriikyik che eecheen che po eunek ak che po keelyek.

⁷ Ki mwa Adoni-besek kole, “Ki iyum amitwogik eng' kurereetap mesennyu laitorinik tamanwogik tisabu che kiga kitil morikwak che eecheen che po eunek ak che po keelyek; ko uu ye ki ayai, ko kayaiywo Kamuktaindet ko uu nooto.” Ki imut `icheek ineendet kwo Jerusalem, ak ki mechi olooto.

⁸ Ki ibookyi `lagogap Judah Jerusalem ak konam. Kibare rotwetap chok ak kobeel nganaseet eng' maat.

⁹ Kingo pata, kochoortagei lagogap Judah kobargei ak Kanaanik che ki menyei emetap tuloonook, murot tai ak eng' warenget.

¹⁰ Kibargei Judah kora ak Kanaanik che ki menyei Hebron, ne ki kiguure eng' tai Kiriath-arba, ak ki par Sesai, Ahiman ak Talmai.

¹¹ Ki wo eng' yooto kobargei ak piik che ki menyei Debir. Kainetap Debir eng' tai ko ki Kiriath-sepher.

¹² Ki mwa Kaleb kole, “Ineendet ne parei Kiriath-sepher ak konam, agoochini Achsah cheptonyu kotun.”

¹³ Ki nam nganaseet Othniel weeriitap Kenas, ng'eetap kamet ne ming'in ne po Kaleb. Ki igoochi anyun `Kaleb Othniel cheptonyi Achsah koek kwondonyi.

¹⁴ Kingo nyo Achsah ole mi Othniel, kogaigai ineendet kosoom kwandanyi kooret. Ye kingo choorugei Achsah eng' sigiryennyi, koteebe `Kaleb ineendet koleenji, “Imache nee?”

¹⁵ Kole ineendet, “Koono kaberuret; amu ki igoono emet ne po Murot Tai, ko koono kora kong'igap peek ak icheek.” Ki igoochi Kaleb ineendet kong'igap peek che mi ole togostaat ak che mi ole rektoot.

¹⁶ Ki togosta lagogap Kenindet, kabyugoitap Musa, komanda eng' nganaseetap sosik kobooto lagogap Judah ak koba surkwen ne po Judah eng' Murot Tai ne po Arad, ak koba komeng'iis ak pichooto.

¹⁷ Ki pa Judah ak Simion ng'eetap kamet, ak koterteer Kanaanik che ki menyei Sepat, ak king'em kogees. Ak ki kiguure kainetap nganasanooto Horma.

¹⁸ Ki nam Judah nganasoogap Gasar, che po Askelon ak che po Ekron kobooto kiwotosyekwak.

¹⁹ Ki mi Kamuktaindet ne Toroor kobooto Judah, ak ki nam emetap tuloonook. Ki ma imuuch koon piik che ki menyei atebweet, amu ki tinyei kariisyegap kariik.

²⁰ Ki kigoochi Kaleb Hebron ko uu ye ki kamwa Musa, ak ki oon eng' olooto weeriik somok che po Anak.

²¹ Ma oon `lagogap Benjamin Jebusik che ki menyei Jerusalem; ko uu nooto, kogimeng'iis Jebusik kobooto lagogap Benjamin eng' Jerusalem agoi ra.

²² Ki pa kotogosta che po kootap Joseph ak icheek kobargei ak Bethel, ak ki mi Kamuktaindet ne Toroor kobooto icheek.

²³ Ki iyookto che po kootap Joseph piik koba kosegei Bethel. Kainetap nganasanooto eng' tai ko ki Luz.

²⁴ Kingo keer segeik chiito ne ki mang'une nganaseet, koleenji, “Kisoomin iboorwech ole kibunei kebendi nganaseet oriit si tuun kerirenen.”

²⁵ Ki iboorchi ole kibunei kechutei nganaseet ak ki par nganaseet eng' rotwetap chok. Ki pagaakta chiichooto ak koonnyi tugul kobechigei.

²⁶ Ki wo chiichooto emetap Hitik ak koteech nganaseet, yeityo koguure kainetap nganasanooto Luz, ne kainennyi agoi ra.

²⁷ Ma oon Manasseh meng'iigap Beth-shean ak nganasookyik, Taanak ak nganasookyik, Dor ak nganasookyik, Ibleam ak nganasookyik anan meng'iigap Megiddo ak nganasookyik, ago ki testai Kanaanik komeny emonooto.

²⁸ Kingo kagogimegitu Israel, konde Kanaanik koyai poisyonigap otwoknateet, ama oon icheek kogestagei.

²⁹ Ma oon Ephraim agine Kanaanik che ki menyei Gezer, ak ki testai Kanaanik komeny kwenunnywa.

³⁰ Ma oon Zebulun piik che ki menyei Kitron anan che ki menyei Naalal. Ki testai Kanaanik komeny kwenunnywa ak koek che yaei poisyetap otwoknateet.

³¹ Ma oon Asher piik che ki menyei Ako, che po Sidon, che po Alap, che po Aksip, che po Helba, che po Aphik anan ko che po Rehob.

³² Ago kimeng'iis Aserik eng' kwenutap Kanaanik che ki menyei emonooto, amu kimaon icheek.

³³ Ma oon Naphtali meng'iigap Beth-shemesh, anan ko che ki menyei Beth-anat, ago ki meny kwenutap Kanaanik che po emonooto. Ki ek piik che ki menyei Beth-shemesh ak che po Beth-anat che yaei poisyonigap otwoknateet.

³⁴ Ki toorta `Amorik lagogap Dan koweekyi emetap tuloonook, ak ma chamji korek kobwa atebweet.

³⁵ Kimach Amorik komeny tulweetap Heres eng' Aijalon, ak eng' Saalbim, ago ki iterteeris kootap Joseph, ak ko konam pichooto koyai poisyonigap otwoknateet.

³⁶ Ki wo kiwotetap Amorik kong'etee ole togosyin Akrabbim kot koit Shelah ak kotogosta.