KALEWANAIK 9 - Bukuit Ne Tilil

Igoortap utaatyet

¹ Kigoteech utaatyet koonnyi, ki kowai tolochikyik tisap.

² Kigoeny tuukyik ak ki koburuch divaikyik; Ki kochop amitwogik eng' mesennyi.

³ Ki koyookto tiibiikyik, kuursei eng' komoswek che torooreen miising' che po nganaseet koleen,

⁴ “Ingonyo yu age tugul ne abusat!” Mwachin chiito ne ma tinyei naet koleenjin,

⁵ “Nyoo, am amitwogikyuk, ak iee divaik che kaaburuch.

⁶ Omete abusnateet ak osapche, ak obendate ooreetap kaguiyet.”

⁷ Nyooru teweernateet ineendet ne itigoni chotindet; nyooru tokisyet ne kerei kong' kiptengekyot.

⁸ Ameger kong' chotindet si ma wechin; kergong' chiito ne utaat si kochamin.

⁹ Ineet ne utaat si ko utaat miising'; ineet chiito ne po iman si kotesak eng' kaneetetapkei.

¹⁰ Kaiyweisyet ne kiywei Kamuktaindet ne Toroor ko taunetap utaatyet; ak naet ne kinae Ineendet ne Tiliil ko kaguiyet.

¹¹ Amu tesoksei peetuusyeguk eng' anee, ak kotesak kenyiisyegap sabeeng'ung'.

¹² Ngot ko ii utaat, ko ii utaat ne neng'ung', ak ngot ichotisyei, igeseni inyegei.

¹³ Polin kwondo ne perber; abusat, ama naei kiy.

¹⁴ Tebee kurgeetap koonnyi, tebee ng'echereet eng' komoswek che torooreen che po nganaseet,

¹⁵ si koguur che siirtoi, che maguseigong' eng' ortinwekwak,

¹⁶ “Ingonyo yu age tugul ne abusat!” Ak mwachin ineendet ne ma tinyei naet koleenjin,

¹⁷ “Anyiny peek che kechorei, ak korooron amitwogik che keamei eng' ung'oot.”

¹⁸ Ago ma naei kole mi olooto che ki kobek; kole, mi toekyik rirosyegap ye mi che ki kobek.