KALEWANAIK 8 - Bukuit Ne Tilil

Kuursei utaatyet

¹ Tos ma kuursei utaatyet, ak tos ma twegu kaguiyet?

² Tonone paragutap komoswek che torooreen ye neegit ooreet, ole tuiyechin ortinwek;

³ ole neegitee ormariichok ole kibunei kebendi nganaseet, polei miising' eng' kurgotik che kibunei kebendi oriit koleen

⁴ okweek, ee piik, aguurok, ak kuursennyu ko koityi piik tugul.

⁵ Okweek che oo abusotiin, oguiye ng'omnateet; ak okweek che oo perber, oegu che tinyei muguleldo ne po naet.

⁶ Ogas, amu amwae tuguuk che po telunateet; ak mwaei kutinnyu tuguuk che po iman.

⁷ Mwaei kutinnyu imanda, ak wechei kutinnyu tengekto.

⁸ Po imanda ng'aleek tugul che amwae; ma mi kiy ne imaasat anan ko ne po ngelelnateet.

⁹ Kasoksei tugul eng' ineendet ne iguitos, ak po iman eng' icheeget che nyooru naet.

¹⁰ Taach kotigonennyu ne kata fedha; ak itaach naet kosiir thahabu che korooron.

¹¹ Amu karaaran utaatyet kosiir koik che kiguure peninim; ak ma kirogendoi ng'omnateet tuguuk tugul che kimachei.

¹² Anee, utaatyet, ne ki ayai naet koek ole amenye, ak anyooru naet ak ruchiinet.

¹³ Kaiyweisyet ne kiywei Kamuktaindet ne Toroor ko kewech yaityo. Aweche menoteet, kaeetetapkei ak ooreet ne ya, ak kutit ne imaasat.

¹⁴ Nenyu kirwooget ak utaatyet ne ititaat. Atinye naet ak atinye kamuget.

¹⁵ Laitorani laitorinik amu anee, ak irwoochi pounik eng' imanda.

¹⁶ Pounisyei pounik amu anee, ak piik che taagunotiin ko irwoochi komyee.

¹⁷ Achame che chama; ak nyoorwo che cheeng'a eng' kagiiletapkei.

¹⁸ Atinye mogornatosyek ak teegisto, mogornatosyek che tebyei ak imanda.

¹⁹ Korooron logoekyuk kosiir thahabu, ee thahabu che tiliileen, ak siirei kelunetap tuguukyuk fedha che korooron.

²⁰ Awendotee ooreetap imanda, asubi ortinwegap imanda.

²¹ Agoochini konyoor poroteet icheeget che chama, ak anyiit chogenikwak.

²² Ki ami kobooto Kamuktaindet ne Toroor kobooch taunetap poisyennyi, kotom kobiit poisyonikyik che po keny.

²³ Ki kiyaa abiit kobooch keny, kobooch taunet, kotom kobiit ng'wony.

²⁴ Ki kisicha ye ki tomo kobiit rirosyek; ye ki tomo kobiit kondametusyek che rootune peek che chaang'.

²⁵ Ye ki tomo kelumda tuloonook, ki kisicha ye ki tomo kobiit tuloonook che mengeechen,

²⁶ Ye ki tomo koyai `ineendet ng'wony anan emotinwek, anan taunetap ng'ung'unyegap ng'wony.

²⁷ Ki ami ye ki igimiti `ineendet kipsengwet, ye ki inde yiemutyet ole pooch rireet,

²⁸ ye ki igimiti poolik eng' parak, ye kingo kimegitu kondametusyegap rireet,

²⁹ ye ki inde nyanjet kiwotennyi, si ma siir peek ng'atuutyennyi. Ye ki ng'at lumeiywegap ng'wony,

³⁰ ki kimi tuwai ko uu kiboityot ne ingen poisyet. Ak ki aboiboi ineendet peetuut age tugul, ki abaibai kotugul eng' tainnyi,

³¹ abaibaitune emennyi ne menyei piik, ak kimi poiboiyennyu eng' weeriigap piik.

³² “Ogasa anyun, werchu: amu iberuurotin icheek che riibei ortinwekyuk.

³³ Ogas katigonet ak oegu che utaatiin, amoeesye.

³⁴ Iberuurot chiito ne kasa, ne riipsei peetuut age tugul eng' kurgotikyuk, koogenisyei eng' tugatugigap kurgotikyuk.

³⁵ Amu ineendet ne nyoorwo ko kanyoor saboondo, ak konyoor chameet eng' Kamuktaindet ne Toroor.

³⁶ Ago ineendet ne ma nyoorwo kong'emei saboondanyi; chamei meet tugul che wecho.”