KALEWANAIK 6 - Bukuit Ne Tilil

Kateechinosyek agobo sabeet

¹ Weeriinnyu, ngot iegu ne itononjini chiitap kokweng'ung', ngot ko kooyosye onamge eunek ak kipsagarin,

² ye kagoriichin anyun ng'aleek che imwae, kagoratin ng'aleek che imwae,

³ Yai anyun niito, weeriinnyu, si isaruge, amu kagonamin eutap chiitap kokweng'ung'; ui iming'ingei, ak igaigai chiitap kokweng'ung'.

⁴ Megoochi konyeguk koru, anan konuuch kamismiseng'ung' po kong'.

⁵ Sarugei ko uu ye sarugei kenyeleet eng' kiplogotyot, ko uu toriityon ne sarugei eng' eutap namindetap toriitik.

⁶ Ui ye mi pirechet, inyee ne ii choriren; ibwaat ortinwekyik si iegu ne utaat.

⁷ Ma tinyei kirwoogindet, anan ne iyagi, anan pounindet,

⁸ ago konorchingei amitwogik eng' kemei, ak koyumi amitwogikyik eng' kesiisyo.

⁹ Ee chorirenoni, irue kot kotyanit? Ing'eete au eng' rwondong'ung'?

¹⁰ Rwondo kitigin, kanuuget kitigin, namet kitigin ne po eunek si kinuuch,

¹¹ eng' let konyonjin pananda ko uu rebindet, ak konyo rartaet ko uu chiito ne tinyei kariik.

¹² Wendoti chii ne ma tilei kiy, chii ne ya, koibooti ng'aleek che po kamaaset,

¹³ ng'wegisye konyekyik, ak kong'alaale keelyekyik, ng'alaale moriikyik.

¹⁴ Mi mastaet muguleldanyi, chobei yaityet kotugul, koolei toiyet.

¹⁵ Cheei anyun ineendet nyalildanyi; ng'emaksei eng' chokyinet ama mi kiy ne kinyae.

¹⁶ Miitei tuguuk lo che wechei Kamuktaindet ne Toroor; ee, tuguuk tisap che wechei ineendet:

¹⁷ konyegap menoteet, ng'elyepta ne mwaei lembech, ak eunek che tumdoi korotiik che ma tinyei tengek,

¹⁸ muguleldo ne chobei kabwaatutik che yaach, keelyek che chepchep korwochin yaityet,

¹⁹ paoryat ne ma po iman ne mwaei lembech, ak ineendet ne koolei toiyet eng' kwenutap tupchosyek.

Kateunet agobo ibeetapkei

²⁰ Weeriinnyu, riip kayomisutyetap kwandang'ung', amemete kaneetisyetap kamenng'ung'.

²¹ Ratyi chooto muguleldang'ung' kotugul, ak iratyi kaating'ung'.

²² Si ye iwendoti, kondoun; ye irue, koriibin, ak ye ing'eete, kong'alaalun.

²³ Amu kayomisutyet ko tait, ak ng'atuutyet ko lapkeiyet, ak kereetap kong' ne po katigonet ko ooreetap saboondo.

²⁴ Riibin eng' kwondo ne ya, ee riibin eng' chemwaigutnatetap chepkugoniot.

²⁵ Amegase myat eng' muguleldang'ung' karaaranindanyi, amengoriigenen konyekyik.

²⁶ Amu ibeeti chepkugoniot chiito agoi kong'etyi kererutyet, ak cheeng'oti chepkugoniot koriich saboondo ne karaaran.

²⁷ Tos imuuchi chii konamji maat tegeennyi, ama lalyo ngoroikyik?

²⁸ Tos imuuchi chii kotyegaat ng'etetyot, ama lalyo keelyekyik?

²⁹ Uu nooto chiito ne ibegei ak osotyotap chiitap kokwennyi; age tugul ne twaei ineendet koma kibagaaktoi puch.

³⁰ Masasei piik choriindet, ngo choorso si kobiyo ye amei rubeet,

³¹ Ago ngot kenyoor, kogeeri konyil tisap, igoitoi tuguuk tugul che po koonnyi.

³² Ma tinyei naet chiito ne ibegei ak kwony; ineendet ne yaei nooto kong'emei saboondanyi.

³³ Nyooru mook ak teweernateet; ama ki istoi kalilanennyi.

³⁴ Amu ng'etkonda nereeknatetap manong'otyo, ama riiree ye yaaktai mugetuut.

³⁵ Ma mage kiy kiit ne kityage; ma kigoigoi, agot ngigoochi tuguuk che chaang' che po kagaigaet.