KALEWANAIK 4 - Bukuit Ne Tilil

Lewenetap ng'omnateet

¹ Ogas werchu katigonetap kwanda, ak oep iit si kobiit onai kaguiyet.

² Amu agoonok kaneetisyet ne myee, amobagaakte ng'atuutyennyu.

³ Amu ye ki aa ming'in eng' kootap abba, ki aa tala ak ki aa chamat eng' taitap kamennyu,

⁴ ko ki ineeta abba, koleenjo, “Ingotebee muguleldang'ung' ng'aleekyuk; riip ng'atuutikyuk, si isap.

⁵ Cheeng'jigei utaatyet, cheeng'jingei kaguiyet; ameutyee anan istoegei ng'aleekyuk che amwae.

⁶ Amemete, si koriibin; cham, si koriibin.

⁷ Taunetap utaatyet ko icheeng'jigei utaatyet; ee, kobooto tuguuk tugul che itinye, icheeng'jigei naet.

⁸ Itoroor, si kolanden; imutyinin teegisto ye onamge ak ineendet.

⁹ Indoi meting'ung' sonoegap myeeindo; koonin naaryeetap telunateet.”

¹⁰ Weeriinnyu, kas ak itaach tuguuk che amwae, si kochang'a kenyiisyegap sabeeng'ung'.

¹¹ Ki aneetiin eng' ooreetap utaatyet; ki andoun eng' ortinwegap lititindo.

¹² Ye iwendi koma igiichi kiy kakwautiguk; ak ngot ilabati, koma riichin kiy.

¹³ Nam miising' kaneetisyet; matichamji kwo; riip, amu ineendet ko saboondang'ung'.

¹⁴ Mechut ooreetap kiptengeginik, amewendotee ooreetap piik che yaacheen.

¹⁵ Istoegei nooto, mebun ole neegitee, iweeige eng' ole mi ak isiirte.

¹⁶ Amu ma inuuktos kobatee ko kagoyai yaityet; istoegei icheek kanuuget, agoi konach chiito age.

¹⁷ Amu amei amitwogigap yaityet, ak koeei divaigap koroomnateet.

¹⁸ Ago ooreetap che po iman ko uu lapkeiyet ne iluu, ne iluu ko tesoksei agoi peetuut ne ititaat.

¹⁹ Ooreetap kiptengeginik ko uu mesundeito; ma naei kiit ne riichei icheek.

²⁰ Weeriinnyu, kas ng'aleekyuk; epchi iit ng'aleek che amwae.

²¹ Amat ingoistoegei taing'ung'; riip kotebee muguleldang'ung' oriit.

²² Amu saboondo eng' icheeget che nyooru, ak chametapkei ne po poorwekwak.

²³ Riip muguleldang'ung' eng' kagiiletapkei tugul, amu yooto ko punu kong'igap peegap saboon.

²⁴ Istoegei kutit ne ngelelyo, ak iistoegei kutit ne mwaei ng'aleek che po kamaaset.

²⁵ Keer tai, ak ingogeer konyeguk tai.

²⁶ Ruchi komyee ole punei keelyeguk, ak ingogimegitu ortinweguk tugul.

²⁷ Amemaste iwe eutap tai anan ne po kaataam; istoe keeldong'ung' yaityet.