KALEWANAIK 30 - Bukuit Ne Tilil

Katigonutigap Agur

¹ Ng'aleegap Agur weeriitap Jake; maonateet. Ki leenji chiito Itiel, ee Itiel ak Ukal.

² Auu tyony iman asiir chii tugul, ama tinyei kaguiyet ne po chii.

³ Ak tomo aneetkei utaatyet, ama nai Ineendet ne Tiliil.

⁴ Ng'oo ne ki togosta kipsengwet, ak kochoorgei? Ng'oo ne ki koyum usoonet eng' eunekyik? Ng'oo ne ki koratyi peek ngoryennyi? Ng'oo ne ki igimit tabanwek tugul che po ng'wony? Kiguure nee? Kiguure nee weeriinnyi, ngot ingen?

⁵ Tiliil ng'olyootap age tugul ne po Kamuktaindet; inee ko long'eetap icheek che imang'u ineendet.

⁶ Ametesyi ng'olyoo ng'aleekyik, si ma kerin kong', ak iegu kiplembechwa.

⁷ Kasoomin tuguuk aeng'; amat ietena kotom amee:

⁸ Iste kolooegitu eng' anee, tangoita ak lembechek: amegoono pananda anan mogornatosyek; paena amitwogik che yama,

⁹ si ma piye ak aeesyen, ak ale, “Ng'oo Kamuktaindet ne Toroor?” Anan si ma egu kibanania, ak achoorse, si ma mwa kainetap Kamuktaindennyu eng' tangoi.

¹⁰ Ametaam otwogindet eng' taitap kiptaiyandennyi, si ma chubin, ak konamin ng'oogisto.

¹¹ Mi ibinda ne chubei kwanisyekwak, ama iberuuri kametisyekwak.

¹² Miitei ibinda ne iitigei kole tiliil, ago tomo ki uun eng' simdanywa.

¹³ Miitei ibinda, ee, mi katorooretapkei ne tya eng' konyekwak! Sutotin irirenigap konyekwak.

¹⁴ Miitei ibinda che uu keleekwak rotoogap chok, ak ko uu keleekwak che po kipkermet, rotonik, si koame kibananook kogeskei eng' ng'wony, ak koges che ma tinyei kiy eng' piik.

Kaneetutik alak

¹⁵ Tinyei pinyinyet aarek aeng', che leen, “Koonech, koonech.” Mi tuguuk somogu che ma koi piyo, ee, miitei tuguuk ang'wanu che ma mwaei kole, “Kayamech”:

¹⁶ chooto ko kererit, ak ne soon; emet ne ma piyonyi peek; ak maat ne ma mwaei kole, “Kagoyama.”

¹⁷ Kondap chiito ne chotei kwandanyi, ama chamei kogas iit kamet, kobalu chepkuginik che po atebweet, kong'ato, ak koam aaregap kipsichinik.

¹⁸ Miitei tuguuk somogu che po kwong'eet ne oo eng' anee, mi ang'wanu che mangen:

¹⁹ ole tirirendoi kipsiichit eng' soet, ole wetitoi ereneet eng' rwandet, ole wetitoi meeliit eng' nyanjet, ak ole teptoi mureno ak chepto.

²⁰ Uu ni atebeetap kwondo ne tinyei ibeetapkei: amisyei ak kouus kutit, ak komwa kole, “Ma ayai kiy ne ya.”

²¹ Potani ng'wony agobo tuguuk somok, tuguuk ang'wan che ma imuuchi komuitoochi:

²² Chooto ko chu: otwogindet ne kaek laitoryat; Ak chiito ne abusat ye kagobiyo;

²³ Ak kwondo ne kiwechei ye kagitun; Ak chepto ne otwogindet ne tuun punjin tuguugap kwondo ne pou ineendet.

²⁴ Miitei tuguuk ang'wanu ng'wony che mengeechen, ak ko utaatiin miising':

²⁵ tyong'ik che ma kiimeen pirechik, ago iyumjigei amitwogikwak eng' kemei;

²⁶ tyong'ik che nyerootiin kenerok, ago teechei kooriikwak eng' rwandosyek;

²⁷ ma tinyei laitoryat chereng'enyinik, ago iboktoi tugul eng' kweanaik;

²⁸ ki muuchi kenamee cheringisyet euut, ago mi kooriigap laitorinik.

²⁹ Miitei tuguuk somogu che pendoti komyee eng' pandanywa, ee, ang'wan che pendoti komye:

³⁰ ng'etundo, ne kiim kosiir tyong'ik tugul, ama mwee tyony age tugul;

³¹ seset ne chepchep; ak kwesta agine; ak laitoryat ne ma kirindoi chii.

³² Ngot ko kaitoroorge eng' perberyo, anan ngot ko kaibwaat yaityo, iger kuting'ung'.

³³ Amu nyoonei mwaita ye kisach cheego, pwoonei korotiik ngiiny serut, ko uu nooto ibu nereegek che kaging'eet pooryeet.