KALEWANAIK 27 - Bukuit Ne Tilil

¹ Amechaugei agobo mutai; amu mengen kiit ne piitu eng' peetuut age tugul.

² Ingolasun age, amelasuge; ingolasun toondet, amelasuge.

³ Nyigiis koita, nyigiisen ng'aniek; ago siirei chooto tugul nereegegap ne perber.

⁴ Korom nereeknateet, koroomen miising' nereegek; ago ng'oo ne imuuchi kotonon eng' taitap ng'etkonda?

⁵ Kaigai kereetap kong' ne taagu kosiir chamyet ne kiunyei.

⁶ Po iman kaguotenetap chorweet; ago chaang' ng'ututosyegap puunyoot.

⁷ Wechei masamek chiito ne piyong'ot; ago anyiny kiy age tugul ne ng'waan eng' chiito ne amei rubo.

⁸ Uu toriityon ne ng'eete keswennyi koombenoti, chiito ne ng'eete oldanyi koombenot.

⁹ Iboiboi muguleldo mwanik ak nyamdutik; iboiboi ko uu nooto anyinyindap chorweetap chii ye toreti ineendet.

¹⁰ Amemete chorweng'ung', ak chorweetap kwandang'ung'; amewe kootap ng'eetap kamenng'ung' eng' peetuutap nyalildang'ung'. Kaigai chiitap kokweng'ung' ne neegit kosiir ng'eetap kamenng'ung' ne mi ole loo.

¹¹ Weeriinnyu, egu utaat, ak ibaibai muguleldanyu, si amuuch awolji ineendet ne iteweera.

¹² Keerei chiito ne ng'oom yaityet, ak kounygei; ago siirtoi abusanik, ak konyoor nyalilda.

¹³ Nam ngoryeetap ineendet ne tononjin toondet; ak inam ineendet koek kaarorunet ne tononjin toondet.

¹⁴ Ineendet ne iberuuri chorwennyi eng' kutit ne oo, kong'eetei karon miising', ki iti koek chubisyet kaberuronooto eng' ineendet.

¹⁵ Kergei ropta ne inesi eng' peetuutap ropta ak kwondo ne poliin.

¹⁶ Ineendet ne leen kirindoi kwonyooto, kogirindoi usoonet, ak komumute mwaita eunnyi ne po tai.

¹⁷ Litei karnet, karnet; litei ko uu nooto chii togeetap chorwennyi.

¹⁸ Age tugul ne riibei mogoywet koamei logoekyik, ak kitoroori ineendet ne riibei kiptaiyandennyi.

¹⁹ Ko uu ye keerei chii togeennyi eng' peek, ko uu nooto keerei muguleldap chii, ne po chiito age.

²⁰ Ma koi piyo yemi piik che ki kobek ak ng'emisyet; ma koi piyo konyegap chii.

²¹ Kitiliili fedha eng' tereet, kitiliile thahabu `maat ne oo, ak kityeme chii kalasunennyi.

²² Agot ngitui chiito ne perber eng' kenut kobooto peek che kagitartaran, koma istoige perberyennyi kora.

²³ Igiilgei si inai ole teptoi akwotisyegap keechiireguk, riip komyee akwotisyegap tuguuk.

²⁴ Amu ma po koigeny mogornatosyek, ama tebyei naaryeetap pounateet eng' ibinwek tugul.

²⁵ Ki ibei susweek che ki koyaamnyo, ak piitos susweek che ng'orng'or, ak kiyumi sogeek che po tuloonook.

²⁶ Po ngoroiguk aaregap keechiir, ak ng'oroorek ko alyetap mbar;

²⁷ miitei cheegap ng'oroorek che yamei koek amitwogiguk, ak che po piigap koong'ung'; ak amitwogik che yamei tiibiiguk.