KALEWANAIK 24 - Bukuit Ne Tilil

-19-

¹ Amat koamjin ng'etkong' piik che yaacheen, anan imach otebi ak icheek;

² amu ineetegei mugulwekwak usiisyet, ak mwaei kutusweekwak che yaacheen.

-20-

³ Kiteege koot utaatyet, ak ki kimite kaguiyet;

⁴ ak eng' naet kinyiiti kooriik che po oriit che po koyooto eng' mogornatosyek tugul che po kamanuutyet ne oo ak ko myachen.

-21-

⁵ Kiim chiito ne utaat kosiir chii ne kiim; ak kiim chiito ne tinye naet kosiir ne tinye kimnateet;

⁶ amu iyae lugeeng'ung' eng' kandoet ne po utaatyet, ak piitu saruunet eng' chaang'indap kirwoogik.

-22-

⁷ Toroor utaatyet eng' ne perber; eng' kurgat koma yaatei kutinnyi.

-23-

⁸ Ineendet ne chobei koyai yaityet keguure ineendet chii ne ya.

⁹ Tengekto kabwaatutigap ne perber; ak wechei `piik chotindet.

-24-

¹⁰ Ngot itanui eng' peetuutap nyalilda ko ming'in kimnateng'ung'.

-25-

¹¹ Saru icheek che kimuti koba meet, ak iet che kimachei kebar.

¹² Ngot imwa ile, “Keero, ma ki nai niito!” Tos ma ibwaati niito ineendet ne keerei mugulelwek eng' karagendoet? Tos ma naei ng'olyoondoniito ineendet ne riibei saboondang'ung'? Ak tos ma igeerchin chii age tugul ko uu poisyennyi?

-26-

¹³ Weeriinnyu, am kumyat, amu myach; kobooto masamek, amu anyiny ye ichamchami.

¹⁴ Inae anyun ile anyiny utaatyet eng' saboondang'ung'; ngot inyooru nooto, kobiitu anyun melekto, ama ki istoi kamang'uneng'ung'.

-27-

¹⁵ Amesapchi ko uu kiptengekyot meng'ootetap chiito ne po iman; ameluul ole imuung'ee ineendet;

¹⁶ Amu ibuti chiito ne po iman konyil tisap, ak kong'eet kogeny; ago igabui nyalilda kiptengeginik.

-28-

¹⁷ Amat ibaibaitu ye ibut punyondeng'ung', amat kogaskei muguleldang'ung' ye kagiwiirta ineendet,

¹⁸ si ma keer nooto Kamuktaindet ne Toroor, ak konyit, ak koistoe ineendet nereegekyik.

-29-

¹⁹ Amengonyitin che yaei yaityo; anan koamjin ng'etkong' kiptengeginik;

²⁰ amu ma nyooru melekto chiito ne ya; kimisi tait ne po kiptengeginik.

-30-

²¹ Weeriinnyu, konyit Kamuktaindet ne Toroor ak laitoryat, amonamge ak icheeget che walaksei;

²² amu piitu nyalildanywa kochogu. Ak ng'oo ne ingen ng'emisyetap icheeget tuwai?

Kalewenaik alak

²³ Chuuto ak icheek ko ng'aleegap che utaatiin. ma myee ketiytiy piik eng' kirwooget.

²⁴ Ineendet ne mwachin kiptengekyot, koleenjin, “Ii po iman,” kochubei `piik ineendet, wechei pororyosyek ineendet.

²⁵ Ago igasegei che kere kong' ineendet, ak nyoonjin icheek kaberuret ne myee.

²⁶ Ng'ututisyei ineendet ne wolu ne po iman.

²⁷ Chop poisyeng'ung' eng' ole po saang', chopchigei kiy age tugul eng' mbar; yeityo iteech koong'ung'.

²⁸ Amat iegu paoryat igirinde chiitap kokweng'ung' puch, amat ing'aalse eng' kuting'ung'.

²⁹ Amat imwa ile, “Ayachini ineendet ko uu ye kagoyaiywo; ageerchini chiichooto ko uu poisyennyi.”

³⁰ Ki abun mbareetap chiito ne choriren, ak ole neegitee mbareetap sabibuk ne po chiichooto ma tinyei naet;

³¹ Ak keero, ki kobitye katook mbareet tugul; ak ki tuch siwek yooto tugul, ak ki kobutok inatunnyi ne po koik.

³² Ki ageer anyun ak abwaat miising'; ki ageer, ak ki anyooru kaneetisyet.

³³ Rwondo kitigin, kanuuget kitigin, arung'et kitigin ne po eunek eng' rwondo,

³⁴ konyonjin anyun panandang'ung' ko uu rebindet, ak konyonjin rubeet ko uu chiito ne tinyei kariik.