KALEWANAIK 15 - Bukuit Ne Tilil

¹ Istoi waluunet ne tala nereegek, ago ing'eeti ng'olyoot ne ng'waan nereegek.

² Mwaei ng'elyeptap ne utaat naet ne litit, ago rong'u kutusweegap che perber perberyo.

³ Miitei konyegap Kamuktaindet ne Toroor komosta age tugul, kogeerei che yaacheen ak che myachen.

⁴ Keetitap saboondo ng'elyepta ne isoobisyei, ago ng'emei ngelelnateet saboondo.

⁵ Sasei ne perber katigonetap kwandanyi, ago nyooru ng'omnateet ineendet ne epchin iit kereetap kong'.

⁶ Miitei konoraik che chaang' kootap ne po iman, ago miitei nyalilda kelunaigap kiptengekyot.

⁷ Iyestoi naet kutusweegap che utaatyet, ago ma yaei ko uu nooto mugulelwegap che perber.

⁸ Wechei `Kamuktaindet ne Toroor tiseiywotap kiptengeginik, ago poiboenji saaetap che po iman.

⁹ Wechei `Kamuktaindet ne Toroor ooreetap kiptengekyot, ago chamei ne isubi imanda.

¹⁰ Mi kergong'yet ne ng'waan eng' ineendet ne metoi ooreet, ak meei ineendet ne wechei kereetap kong'.

¹¹ Mi taitap Kamuktaindet ne Toroor ye mi che ki kobek ak ng'emisyet, siirei ne tya anyun mugulelwegap piik!

¹² Ma chamei chotindet keger kong', ma wendi ole mi che utaatiin.

¹³ Igoochin muguleldo ne igasegei togeet kobaibait, ago tanui `ine eng' arageneetap muguleldo.

¹⁴ Cheeng'ei naet muguleldap ineendet ne tinyei kaguiyet, ago kutusweegap che perber ko paegei perberyo.

¹⁵ Yaacheen peetuusyek tugul che po che kinyaliili, ago muguleldo ne igasegei ko igoorto ne po kotugul.

¹⁶ Kaigai tuguuk che matya kobooto kaiyweisyet ne kiywei Kamuktaindet ne Toroor, kosiir konoraik che chaang' kobooto nyalilda.

¹⁷ Kaigai keam ingweek eng' ole mi chamyet, kosiir eito ne akwai kobooto wegeet.

¹⁸ Ing'eeti chiito ne kipnereegia pooryeet, ago tisei pooryeet ineendet ne masartae nereek.

¹⁹ Uu ooreetap chiito ne choriren ng'ootweetap katook, ago paraitu ooreetap che po iman.

²⁰ Iboiboi kwanda `weeriit ne utaat, ago sasei kamet chiito ne perber.

²¹ Perperyo ko poiboiyetap ne ma utaat, ago ilititi ortinwekyik chiito ne tinyei kaguiyet.

²² Ma isuldoi chobutik eng' ole ma mi kirwooget, ago ki kimiti chobutichooto eng' ole mi kirwoogik che chaang'.

²³ Paibaitu chii eng' waluunetap kutinnyi, ago ng'olyoot ne kimwaei eng' sait ne nyolu, ko karaaran ne tya!

²⁴ Wendi parak ooreetap saboondo eng' ne utaat, si kobiit koistoegei ye mi che ki kobek, eng' ng'wony oriit.

²⁵ Itutu `Kamuktaindet ne Toroor kootap menotik, ago igimiti kiwotetap mosoget.

²⁶ Chobutik che yaacheen ko tuguuk che kiwechei eng' Kamuktaindet ne Toroor, ago tiliileen ng'aleek che iboiboi piich.

²⁷ Inyalili koonnyi `ineendet ne kipkeiyat agobo kelunaik, ago sabei ineendet ne wechei asoya.

²⁸ Ruchin muguleldap ne po iman kiit ne wolu, ago rong'u kutusweegap kiptengeginik tuguuk che yaacheen.

²⁹ Looe `Kamuktaindet ne Toroor kiptengeginik, ago kasei saautigap che po iman.

³⁰ Iboiboi `lapkeiyetap koonyek muguleldo, igimiti kawek `ng'aleek che myach.

³¹ Itit ne kasei kereetap kong' ne po saboondo ko tebee kwenutap che utaatiin.

³² Ineendet ne eesyoi katigonet ko kasas saboondanyi, ago ineendet ne epchin iit kereetap kong' konyooru kaguiyet.

³³ Katigonetap utaatyet ko kaiyweisyet ne kiywei Kamuktaindet ne Toroor; ak indoi kaming'inetapkei eng' teegisto.