KALEWANAIK 14 - Bukuit Ne Tilil

¹ Teechei koonnyi kwondo age tugul ne utaat, ago putei ne perber eng' eunekyik.

² Iywei Kamuktaindet ne Toroor `ineendet ne wendote imanda, ago sasei Kamuktaindet ne Toroor `ineendet ne imaasat eng' ortinwekyik.

³ Miitei kutitap ne perber kirokto ne po menoteet, ago riibei kutusweekwak che utaatiin.

⁴ Tiliil piut ole ma mi tuuga, ago ibu chaang'indap rurutik `kimnateetap eeik.

⁵ Ma mwaei lembech paoryat ne kiyani, ago mwaei lembech paoryat ne ma po iman.

⁶ Cheeng'ei chotindet utaatyet ago ma nyooru, ago nyumnyum naet eng' ineendet ne tinyei kaguiyet.

⁷ Ui ole mi chiito ne perber, amenyoorchini ineendet ng'olyootap naet.

⁸ Utaatyetap chiito ne ng'oom ko koguiyo ooreennyi, ago ng'aalseet perberindap che perber.

⁹ Chotei che perber ng'oogisto, ago mi myeeindo eng' kwenutap che po iman.

¹⁰ Ingen muguleldo ng'wanindanyi, ak ma tinyei toondet yamdao ak poiboiyennyi.

¹¹ Kigabui kootap kiptengeginik, ago kiberuuri emaitap ne po iman.

¹² Mi ooreet ne leen chiito litit, ago kagesunennyi ko ooreet ne tokyingei meet.

¹³ Riirei muguleldo agot ngo roryei, ak kagesunetap poiboiyet ko nyigiisindo.

¹⁴ Ineendet ne ichuchuchegei eng' imanda kobiyonyi ortinwekyik, ak che myach eng' muguleldo ko nyooru che nyoljin.

¹⁵ Ne abusat koyani ng'olyoo age tugul, ago ne ng'oom ko keerei komyee ole wendi.

¹⁶ Iyweisyei chiito ne utaat ak koistoegei yaityet, ago nereechi ne perber ak komeenei.

¹⁷ Ineendet ne sip konereechi koyaei tuguuk eng' perberyo, ak kiwechei chiito ne tinyei chobutik che yaacheen.

¹⁸ Perperyo ko poroteetap che abusotiin, ago ki laakyin che ng'oomen chepkuletap naet.

¹⁹ Ing'uruuksei che yaacheen eng' taitap che myachen, kong'uruuksei kiptengeginik eng' ormariichogap che po iman.

²⁰ Kiwechei kibananiat, wechei agot chiitap kokwennyi, ago tinyei mogoryot choronok che chaang'.

²¹ Yaei tengekto chiito ne sasei chiitap kokwennyi, ago paibai ne riiree kibananook.

²² Tos ma yaei chalwok piik che chobei yaityet? Ago nyooru rireenet ak imanda che chobei myeeindo.

²³ Tinyei kelunet poisyet age tugul, ago ibu pananda ng'aleek icheegei.

²⁴ Chepkuletap che utaatiin ko mogornatosyekwak, ago perberindap che perber ko perberyo kityo.

²⁵ Saru saboonwek paoryat ne po iman, ago ineendet ne mwaei lembech ko ng'wektoindet.

²⁶ Mi kamang'unet ne kiim eng' kaiyweisyet ne kiywei Kamuktaindet ne Toroor, ak nyooru lagokyik ole mwechin.

²⁷ Kaiyweisyet ne kiywei Kamuktaindet ne Toroor ko kondametutap peegap saboon, si keistoegei mestonogap meet.

²⁸ Toroornatetap laitoryat ko chaang'indap piikyik, ago ng'emisyetap pounindet ko ng'ering'indap piik.

²⁹ Tinyei kaguiyet ne oo ineendet ne masartae nereek, ago tesei perberyo ineendet ne sip konereechi.

³⁰ Saboondap poorto muguleldo ne tinyei chametapkei, ago nunatetap kawek ng'etkonda.

³¹ Iteweeri Yaindennyi ne usei kibananiat, ago konyiti Yaindennyi `ineendet ne riiree ne ma tinyei kiy.

³² Ki wiirchin ng'wony kiptengekyot amu poisyonikyik che yaach, ago tinyei kamang'unet ne po iman eng' meennyi.

³³ Tebee utaatyet muguleldap ineendet ne tinyei kaguiyet, ago king'aanyei che mi mugulelwegap che perber.

³⁴ Itoroori imanda poror, ago iteweeri tengekto poror age tugul.

³⁵ Chamei laitoryat otwogindet ne poisyei eng' ng'omnateet, ago nereekyik ko ityin ineendet ne ibu kalilanet.