KALEWANAIK 12 - Bukuit Ne Tilil

¹ Age tugul ne chamei atep ne myee kochamei naet, ago ineendet ne eesyoi kereetap kong' ko uu tyondo.

² Nyooru chameet eng' Kamuktaindet ne Toroor chiito ne myee, ago igikyin `Kamuktaindet ne Toroor chiito ne po chobutik che yaacheen.

³ Ma kimiitu chii eng' yaityo, amagoi kitut tigityotap che po iman.

⁴ Egu kwondo ne myee konditap manong'otyondennyi; ago kwondo ne ibu kalilanet ko uu nunateet eng' kawegap chiichooto.

⁵ Po iman kabwaatutigap che po imanda, ago ng'aalseet kirwoogutigap kiptengeginik.

⁶ Sapchin kotumda korotiik ng'aleegap kiptengeginik, ago saru icheek `ng'aleegap che po iman.

⁷ Kigabui kiptengeginik kot koma komi, ago tononi kootap che po iman.

⁸ Kilasu chii ko uu kiit ne tee ng'omnatennyi, ago kisasei ineendet ne tinyei muguleldo ne imaasat.

⁹ Kaigai ineendet ne kesasei ak kotinyei otwogindet, kosiir ineendet ne ichaugei ama tinyei amitwogik.

¹⁰ Riibei chiito ne po iman sabeetap kiyagikyik, ago kolgoleen rireenosyegap piik che yaach.

¹¹ Nyooru amitwogik che chaang' chiito ne ibati korennyi, ago ineendet ne isubi tangoita koma tinyei naet.

¹² Machei kiptengekyot mesteetap piik che yaach, ago yiei logoek tigityotap che po iman.

¹³ Mi mesteetap chiito ne ya pistoetap kutit, ago mang'une nyalilda chiito ne po iman.

¹⁴ Piyonyi chiito myeeindo eng' logoegap kutinnyi, ak kigeerchin chiito poisyonigap eunekyik.

¹⁵ Litit eng' ne perber ooreennyi ngo keerei, ago epchin iit kirwooget ineendet ne utaat.

¹⁶ Sip konaoksei nereegegap ne perber, ago unyei teweernateet chiito ne ng'oom.

¹⁷ Ineendet ne mwaei iman koboortoi imanda, ago iboortoi ng'aalseet paoryat ne ma po iman.

¹⁸ Ng'aleegap chii ne sartae ng'al ko uu rotwetap chok, ago ng'elyeptap ne utaat koibu chametapkei.

¹⁹ Ki kimiiti koigeny kutit ne po iman; ago po sait ne matya ng'elyepta ne mwaei lembech.

²⁰ Mi ng'aalseet mugulelwegap che chobei yaityet, ago tinyei poiboiyet che mwaitoi kaalyeet.

²¹ Ma nyooru yaityet age tugul chiito ne po iman, ago nyiei yaityet kiptengeginik.

²² Wechei `Kamuktaindet ne Toroor kutit ne mwaei lembech, ago paibai ineendet eng' che poisyee iman.

²³ Unyei naet chiito ne ng'oom, ago mwaitoi mugulelwegap che perber perberyo.

²⁴ Pounisyei eutap ne igiilegei, ago kibirchin chiito ne choriren kobois.

²⁵ Ing'uruuksei muguleldap chiito amu nyigiisindo ne tinyei, ago iboiboi muguleloto ng'olyoot ne myee.

²⁶ Chiitap iman ko kandoindetap chiitap kokwennyi, ago ibeeti kiptengeginik ooreenywa.

²⁷ Mawatani chiito ne choriren kiit ne kanyoor eng' logeet, ago tinyei chiito ne igiilegei tuguuk che po kamanuutyet ne oo.

²⁸ Mi saboondo ooreetap imanda, ama mi meet eng' ooreennyi.