KALEWANAIK 11 - Bukuit Ne Tilil

¹ Wechei Kamuktaindet ne Toroor kerutyet ne ma po iman, ago chamei Kamuktaindet ne Toroor kerutyet ne po iman.

² Ye nyo menoteet, konyo agine kalilanet, ago mi utaatyet ak che iming'inegei.

³ Indochin che po iman kagesunatennywa pogei, ago kamaasetap che yaei kaberberisyet ko ng'emei icheek.

⁴ Ma tilei kiy mogornatosyek eng' peetuutap nereegek, ago saruunisyei imanda eng' meet.

⁵ Indochin ne ititaat imandanyi eng' ooreennyi, ago ibuti kiptengekyot eng' tengektanyi.

⁶ Saru che po iman imandanywa, ago kinamei che yaei kaberberisyet eng' ng'aalseennywa.

⁷ Ye mee chiito ne kiptengekyot, kobet kamang'unennyi, ak lusei kamang'unetap piik che po tengek.

⁸ Kisaru ne po iman komong' eng' nyalilda, ak nyoonjin `kiptengekyot nyalilaata.

⁹ Ng'emei eng' kutinnyi, chiito ne ma iywei Kamuktaindet, chiitap kokwennyi, Ago kisaru che po iman eng' naet.

¹⁰ Ye poor che po iman, ko paibaitu nganaseet; ak ye lusyo kiptengeginik, ko piitu kagasetapkei.

¹¹ Kitoroori nganaseet eng' perurtap che po iman: ago igabui `kutusweegap kiptengeginik nganaseet.

¹² Ma tinyei ng'omnateet ne sasei chiitap kokwennyi, ago siisei chiito ne tinyei naet.

¹³ Ng'aanyei ung'ootik ineendet ne chaamsoti, ago riibei ng'olyoot ineendet ne tinyei Kabuuset ne po iman.

¹⁴ Ibutos piik eng' ole ma mi kandoiset ne po ng'omnateet, ago mi saruunet eng' ole mi kirwoogik che chaang'.

¹⁵ Nyooru nyalilda ne tononjin too, ago ineendet ne wechei tononjinet kotebee chametapkei.

¹⁶ Nyooru teegisto kwondo ne myee, teptoi piik che igilegei mogornatosyek.

¹⁷ Chiito ne tinyei rireenetapkei koyachin ne myee saboondanyi, ago chiito ne kolgol konyalili poortanyi.

¹⁸ Nyooru kiptengekyot melektap ng'aalseet, ago ineendet ne koolei imanda kotinyei melekto ne po iman.

¹⁹ Ineendet ne kimitu eng' imanda ko sabei, ak ineendet ne isubi yaityet ko mee ineegei.

²⁰ Wechei `Kamuktaindet ne Toroor icheeget che imaasotin mugulelwek, paibai ineendet eng' che ititaatiin eng' ooreenywa.

²¹ Ma kimetoi iman chiito ne ya ama kibir, ago kisaru iyoteetap che po iman.

²² Kergei peteitap thahabu ne mi serutap tooreet, ak kwondo ne karaaran ne ma tinyei naet.

²³ Magutigap che po iman ko myachen kityo; ago kamang'unetap kiptengeginik ko nereegek.

²⁴ Mi ne igoitoi, ago tesoksei kosiir; ak komi ne etei miising' kosiir ne nyolu, ago ibu nooto pananda.

²⁵ Nerei saboondap ne aiyeep, ak ne inagi chii peek kinagi agine.

²⁶ Chubei `piik che etei peek, ago kiberuuri ne aldoi.

²⁷ Ineendet ne cheeng'ei ne myee eng' kagiiletapkei, ko kacheeng' chameet, ago ineendet ne cheeng'ei yaityet, konyooru.

²⁸ Ineendet ne imang'u mogornatosyekyik, kobuti, ago piitos che po iman ko uu sogoot ne tuon.

²⁹ Ineendet ne inyalili koonnyi konyooru usoonet, ak koegu ne perber otwogindetap ne utaat.

³⁰ Poisyonigap ne po iman ko keetitap saboondo; ago koroomnateet koolusi saboonwegap piik.

³¹ Ngot kigeerchin ne po iman eng' ng'wony, kotam nee anyun chiito ne ya ak ko kiptengekyot!