KAITOSYEK 9 - Bukuit Ne Tilil

Paska

¹ Ki mwachi `Kamuktaindet ne Toroor Musa eng' surkwen ne po Sinai eng' kenyiitap aeng' eng' arawet ne po tai kobooch ngap komong' icheek eng' emetap Misiri koleenji,

² “Ingoriip anyun piigap Israel paska eng' peetuut ne ki king'at.

³ Oriibe niito eng' koskoleny ne po peetuutap taman ak ang'wan eng' arawani, oriibe ko uu ng'atuutikyik ak ko uu kirwoogutikyik tugul.”

⁴ Ki mwachi anyun `Musa piigap Israel koriip paska.

⁵ Ara ki riip icheek paska eng' arawet ne po tai, eng' koskoleny ne po peetuutap taman ak ang'wan eng' surkwen ne po Sinai. Ki yai anyun piigap Israel ko uu tugul che ki ng'at `Kamuktaindet ne Toroor Musa.

⁶ Ago ki miitei piik alage che ki ma imuuch koriip paska eng' peetuunooto amu ki ing'wanitkei agobo muustap chiito. Ki pwa anyun taitap Musa ak Aron eng' peetuunooto,

⁷ ak ki leenji `pichooto ineendet, “Ki ng'woneen amu muustap chiito. Amu nee si keetenech kigoite kagoochinetap Kamuktaindet ne Toroor kobooto piigap Israel eng' peetuut ne ki king'at?”

⁸ Ak ki leenji `Musa icheek, “Ogany si kobiit agas kiit ne ng'atei Kamuktaindet ne Toroor agobo okweek.”

⁹ Ki ng'alaalji `Kamuktaindet ne Toroor Musa koleenji,

¹⁰ “Mwachi piigap Israel, ileenji, Ngo ng'wanit chii age tugul eng' okweek anan eng' ibinwekwok agobo muusto anan ngo mi rutoito ole loo komuuchi koboiboiyenji paska ne po Kamuktaindet ne Toroor.

¹¹ Ingoriip icheek paska nooto eng' koskoleny ne po peetuutap taman ak ang'wan eng' arawet ne po aeng'. Amei icheek magatiinik che ma kinde mermereek ak ingweek che ng'woneen.

¹² Amat kotuuch kot koeekyi anan koiri kowet, riibei icheek ko uu ng'atuutyet komugul ne po paska.

¹³ Ago chiito ne tiliil ne ma miitei rutoito ama riip paska, king'etoi eng' piikyik, amu ma igoito kagoochinetap Kamuktaindet ne Toroor eng' peetuunnyi ne ki king'at. Ibei chiichooto ineegei kergong'yet ne nyoljin tengektanyi.

¹⁴ “Ak ngo mi chii ne punootyon ne meng'iisyei eng' kwenung'wong' ak komachei koriip paska ne po Kamuktaindet ne Toroor, ko nyolu koyai ko uu ng'atuutyetap paska ak ko uu ye ki kiaror. Egu ng'atuutyet agenge eng' chii ne punootyot ak eng' ineendet ne po emoniito.”

Komi Poldeet koot parak

¹⁵ Eng' peetuunooto ne ki kilumdae koyooto, nooto emaitap paornateet, ko ki tuch pooldet koot. Kong'eete koskoleny agoi koeech ko ki mi poldanooto paragutap koot ak ki kergeit ak maat poldanooto.

¹⁶ Ki uu nooto kotugul; ki tuch pooldet koyooto ak kitaagu poldanooto ko uu maat kemoi.

¹⁷ Ye ki ngetogosta parak pooldet eng' Emainooto, koba anyun piigap Israel; ak ole katonone pooldet koteech yooto piigap Israel.

¹⁸ Kibendi piigap Israel eng' ng'atuutyetap Kamuktaindet ne Toroor, ak ki meng'iisyei kora eng' ng'atuutyennyi. Ki meng'iisyei icheek peetuusyek tugul kotee kotebee pooldet koyooto.

¹⁹ Ye kingo tebee pooldet koot peetuusyek che chaang', koriip anyun piigap Israel ng'atuutyetap Kamuktaindet ne Toroor, ama pendi.

²⁰ Ak ye katebee pooldet koyooto peetuusyek che ng'ering', komeng'iis anyun pichooto ko uu ng'atuutyetap Kamuktaindet ne Toroor ak ki pa ko uu ng'atuutyennyi.

²¹ Ki peetuusyek alak kotebee pooldet koyooto koskoleny agoi karon. Ak ki ngetogostae pooldet karon, koba anyun. Ye ki ngetogostae poldanooto, ngo peet anan kemoi, koba anyun pichooto.

²² Kingo tebee pooldet paragutap koot, ngo peetuusyek aeng' anan arawa anan kenyiit, komiitei koyooto, kotebi anyun piigap Israel komeng'iis, ama pendi ui; ago ye ki ngetogostae, koba anyun.

²³ Ki meng'iisyei eng' ng'atuutyetap Kamuktaindet ne Toroor ak ko ki pendi eng' ng'atuutyetap Kamuktaindet ne Toroor. Kiriibooti ng'atuutyetap Kamuktaindet ne Toroor ko uu ye ki ng'at `Kamuktaindet ne Toroor eng' Musa.