KAITOSYEK 8 - Bukuit Ne Tilil

Ng'atuutik agobo ole kinamdoi taisyek

¹ Ki ng'alaalji `Kamuktaindet ne Toroor Musa koleenji,

² “Mwachi Aron ileenji, ‘Ye iinam taisyek tisap, ko ingokweng'so anyun taisyechooto eng' taitap keldap kiit ne ikweng'sei.’ ”

³ Ki yai anyun Aron ko uu nooto; ki inaam taisyekyik si kobiit kokweng'so eng' taitap keldap tait, ko uu ye ki ng'at `Kamuktaindet ne Toroor Musa.

⁴ Ki uu ni yaetap keldap tainooto: ki kiyae thahabu che ki kitaany, kobooch keel agoi taaptokyik. Ki kiyai keldap tait ko uu itoondo nooto ne kiga koboorchi `Kamuktaindet ne Toroor Musa.

Kaanyinyetap Lawiik

⁵ Ki mwachi anyun `Kamuktaindet ne Toroor Musa koleenji,

⁶ “Iste Lawiik eng' kwenutap piigap Israel ak ianyiny icheek.

⁷ Yachi ko uu ni ye ianyinyi icheek: ise peek che po kagaigaet, ingocher koroorik che mi poorwekwak tugul ak ingomwet ngoroikwak, ak koek icheek anyun che kagoanyinygei.

⁸ Yeityo koget icheek kirgit ne neran ak kagoochinennyi ne po peek che ng'ootiin che tambuluul che ki kiburukto mwaita, ak igetu kirgit age ne neran kobunji kagoochinetap tengekto.

⁹ Imutu Lawiik kobwa taitap emait ne kituiyechin ak iyum tuiyet komugul ne po piigap Israel.

¹⁰ Imutu Lawiik kobwa taitap Kamuktaindet ne Toroor ak kogonoor `piigap Israel eunekwak icheek.

¹¹ Yeityo kogoito Aron Lawiik eng' taitap Kamuktaindet ne Toroor koek kagoochinet ne kiongoi agobo piigap Israel, si kobiit kochobok icheek koyai poisyet ne po Kamuktaindet ne Toroor.

¹² Ye ibata, kogonoor `Lawiik eunekwak metowegap kirugichooto, igoite inyee age kobunji kagoochinetap tengekto ak kobunji age kagoochinet ne kibeelei si koyai kagaigaet agobo Lawiik.

¹³ “Ye imut Lawiik koba taitap Aron ak taitap weeriikyik, igoochi `icheek Kamuktaindet ne Toroor koek kagoochinet ne kiongoi.

¹⁴ Ko uu nooto anyun, iibesye Lawiik eng' kwenutap piigap Israel, ak kobunjo icheek.

¹⁵ Ye kaianyiny icheek ak igoite koek kagoochinet ne kiongoi, koba anyun ko ak koyai poisyet eng' emait ne kituiyechin.

¹⁶ Amu ki kigoono icheek inne eng' piigap Israel, ko ki anam chooto kobunjo kewale tugul che yaatei iyoteet, chooto ko weeriik che po tai eng' piigap Israel tugul.

¹⁷ Amu chechuuk tugul che po tai eng' piigap Israel, ngo chii anan che twatei che kiyagi. Ki atabaan icheek eng' peetuut ne ki abar weeriik tugul che po tai eng' emetap Misiri.

¹⁸ Ak ki anam Lawiik kobunjo awale weeriik tugul che po tai eng' piigap Israel.

¹⁹ Eng' piigap Israel, ko ki agoite Lawiik kobunji Aron ak weeriikyik, koek che itabaanatiin si koyai poisyet eng' emait ne kituiyechin ne kata piigap Israel, ak koyai kagaigaet agobo icheek, si ma piit koroito eng' piigap Israel ye riikyin ole-tiliil.”

²⁰ Ki yai ko uu nooto anyun Musa, Aron ak tuiyet komugul ne po piigap Israel, kotabaan Lawiik; ko uu tugul che ki ng'at `Kamuktaindet ne Toroor Musa.

²¹ Ki ianyinygei anyun Lawiik ak kimwet ngoroikwak. Ki igoito anyun Aron icheek eng' taitap Kamuktaindet ne Toroor koek kagoochinet ne kiongoi ak ki yai kagaigaet agobo icheek koanyiny.

²² Ye kingo pata nooto, koba ko Lawiik koyai poisyennywa eng' emait ne kituiyechin eng' taitap Aron ak weeriikyik. Ki yachi icheek anyun Lawiik ko uu ye kiga ng'at `Kamuktaindet ne Toroor Musa.

²³ Ki mwachi anyun `Kamuktaindet ne Toroor Musa koleenji,

²⁴ “Po arorutichu Lawiik: kobooch che po kenyiisyek tiptem ak muut ak kwo tai kobendi ko koyai poisyet ne po emait ne kituiyechin,

²⁵ ago ye kagoit kenyiisyekwak konom kobagaakta poisyonooto ak ma koboisyee agoi.

²⁶ Ago toreti kotononjin riipseet kobooto che tupcho eng' emait ne kituiyechin, nganda ma kotinyei icheek poisyo. Iyachini anyun Lawiik ko uu nooto agobo poisyetap riipsosyekwak.”