KAITOSYEK 7 - Bukuit Ne Tilil

Kagoochinoigap Pounik

¹ Kingo kagolumda Musa koot, koiil ak kotabaan kobooto tuguukyik tugul. Ki iil ak kotabaan kora kaptisisyet ak tuguukyik tugul,

² yeityo kogoito kagoochinoik, pounigap Israel, che eecheen eng' kooriigap kwanisyekwak che ki pou ortinwekwak, chuuto che kitononjin icheeget che ki kiiti.

³ Ki ip pounichooto kagoochinoikwak kobwa taitap Kamuktaindet ne Toroor: kariisyek lo che tugootiin, eiik taman ak aeng', kariit agenge koyop pounik aeng' ak kiget pounindet age tugul eito agenge. Ki igoito chooto eng' taitap koot.

⁴ Ki mwachi `Kamuktaindet ne Toroor Musa koleenji,

⁵ “Taach tuguuchooto eng' icheek si kobiit kobunji poisyetap emait ne kituiyechin. Igoochi Lawiik tuguuchooto, ak ipchechi chii age tugul eng' icheek ko uu poisyennyi.”

⁶ Ara kitaach Musa kariisyek ak eiik ak kogoochi Lawiik.

⁷ Ki igoochi weeriigap Gerson kariisyek aeng' ak eiik ang'wan, ko uu poisyennywa.

⁸ Ki igoochi weeriigap Merari kariisyek ang'wan ak eiik sisiit, ko uu poisyennywa, kotononjin icheek Ithamar weeriitap Aron tisiindet.

⁹ Ago ma igoochi kiy weeriigap Kohat amu ki nenywa poisyetap ole-tiliil; ki ibe tuguuchooto tigigoikwak.

¹⁰ Ki igoito pounik kagoochinoik agobo katabaanetap kaptisisyet eng' peetuut ne ki kiile, ki igoito chooto eng' taitap kaptisisyet.

¹¹ Ki leenji `Kamuktaindet ne Toroor Musa, “Ingogoito pounindet age tugul eng' peetuunnyi kagoochinennyi agobo katabaanetap kaptisisyet.”

¹² Eng' peetuut ne po tai, ko ki igoito kagoochinennyi Nason weeriitap Aminadab ne po ooreetap Judah.

¹³ Kagoochinnyi ko ki sanit agenge ne po fedha, ne yamei nyigiisindanyi shekelisyek pogol ak sosom, ak taabeet ne po fedha ne yamei nyigiisindanyi shekelisyek tamanwogik tisap, ko uu shekel ne po ole-tiliil, kinyiitotin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

¹⁴ nyigiisindap gramit agenge ne po thahabu ne yamei shekelisyek taman ne nyiitaat nyamdutik;

¹⁵ kirgit agenge ne neran, mengit agenge, mengit age ne ma siirei kenyiit agenge, kobunji kagoochinet ne kibeelei;

¹⁶ kwesta agenge koek kagoochinetap tengekto;

¹⁷ ak tiseiywot ne po kagoochinetap kaalyeet ko eiik aeng', mengichik muut, kwesik muut, ak mengichik muut che ma siirei kenyiit agenge. Chooto kagoochinoik che ki po Nason weeriitap Aminadab.

¹⁸ Ki igoito eng' peetuut ne po aeng' kagoochinennyi Nethanel weeriitap Suar, pounindetap Issakar ko uu ni:

¹⁹ sanit agenge ne po fedha ne yamei nyigiisindanyi shekelisyek pogol ak sosom, taabeet agenge ne po fedha ne yamei nyigiisindanyi shekelisyek tamanwogik tisap, ko uu shekel ne po ole-tiliil; ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinet ne po peek;

²⁰ nyigiisindap gramit agenge ne po thahabu ne yamei shekelisyek taman ne nyiitaat nyamdutik;

²¹ kirgit agenge ne neran, mengit agenge, ak mengit agenge ne ma siirei kenyiit agenge, kobunji kagoochinet ne kibeelei;

²² kwesta agenge koek kagoochinetap tengekto;

²³ ak tiseiywotap kagoochinetap kaalyeet ko eiik aeng', mengichik muut, kwesik muut, ak mengichik muut che ma siirei kenyiit agenge. Chooto kagoochinoik che ki po Nethanel weeriitap Suar.

²⁴ Eng' peetuut ne po somok, ko ki igoito kagoochinennyi Eliap weeriitap Helon, pounindetap lagogap Zebulun.

²⁵ Kagoochinennyi kogisanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

²⁶ nyigiisindap gramit agenge ne po thahabu ne yamei shekelisyek taman ne nyiitaat nyamdutik;

²⁷ kirgit agenge ne neran, mengit, ak mengit agenge ne ma siirei kenyiit agenge, kobunji kagoochinet ne kibeelei;

²⁸ kwesta agenge koek kagoochinetap tengekto;

²⁹ ak tiseiywotap kagoochinetap kaalyeet, ko ki eiik aeng', mengichik muut, kwesik muut, ak mengichik muut che ma siirei kenyiit agenge. Chooto kagoochinoik che ki po Eliap weeriitap Helon.

³⁰ Eng' peetuut ne po ang'wan, ko ki igoito kagoochinennyi Elisur weeriitap Sedeur, pounindetap lagogap Reuben.

³¹ Kagoochinennyi kogisanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisabu, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

³² nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

³³ kirgit agenge ne neran, mengit agenge, ak mengit agenge ne ma siirei kenyiit agenge kobunji kagoochinet ne kibeelei;

³⁴ kwesta agenge koek kagoochinetap tengekto;

³⁵ ki po tiseiywotap kagoochinetap kaalyeet, eiik aeng'u, mengichik muut, kwesik muut, mengichik muut che ma siirei kenyiit agenge. Chooto kagoochinoik che ki po Elisur weeriitap Sedeur.

³⁶ Eng' peetuut ne po muut, ko ki igoito kagoochinennyi Selumiel weeriitap Surisadai pounindetap lagogap Simion.

³⁷ Kagoochinennyi kogi sanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

³⁸ nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

³⁹ kirgit agenge ne neran, mengit agenge ak mengit agenge ne ma siirei kenyiit agenge kobunji kagoochinet ne kibeelei;

⁴⁰ kwesta agenge koek kagoochinetap tengekto;

⁴¹ ak ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Selumiel weeriitap Surisadai.

⁴² Eng' peetuut ne po lo, ko ki igoito kagoochinennyi Eliasap weeriitap Deuel, pounindetap lagogap Gad.

⁴³ Kagoochinennyi kogi sanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul, che ki kiburukto mwaita koek kagoochinetap peek;

⁴⁴ nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁴⁵ kirgit agenge ne neran, mengit agenge, ak mengit agenge ne ma siirei kenyiit agenge kobunji kagoochinet ne kibeelei;

⁴⁶ kwesta agenge koek kagoochinetap tengekto;

⁴⁷ ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Eliasap weeriitap Deuel.

⁴⁸ Eng' peetuut ne po tisap, ko ki igoito kagoochinennyi Elisama weeriitap Amihud, pounindetap lagogap Ephraim ko uu ni:

⁴⁹ sanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁵⁰ ak nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁵¹ kirgit agenge ne neran, mengit agenge, ak mengit agenge ne ma siirei kenyiit agenge kobunji kagoochinet ne kibeelei;

⁵² kwesta agenge koek kagoochinetap tengekto;

⁵³ ak ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Elisama weeriitap Amihud.

⁵⁴ Eng' peetuut ne po sisiit, ko ki igoito kagoochinennyi Gamaliel weeriitap Pedasur, pounindetap lagogap Manasseh ko uu ni:

⁵⁵ sanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁵⁶ ak nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁵⁷ kirgit agenge ne neran, mengit agenge, ak mengit agenge ne ma siirei kenyiit agenge, kobunji kagoochinet ne kibeelei;

⁵⁸ ak kwesta agenge koek kagoochinetap tengekto;

⁵⁹ ak ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Gamaliel weeriitap Pedasur.

⁶⁰ Eng' peetuut ne po sogool, ko ki igoito kagoochinennyi Abidan weeriitap Gideoni, pounindetap lagogap Benjamin ko uu ni:

⁶¹ sanit agenge ne po fedha ne yamei nyigiisindanyi shekelisyek pogol ak sosom ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁶² nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁶³ kirgit agenge ne neran, mengit agenge, ak mengit agenge ne ma siirei kenyiit agenge, kobunji kagoochinet ne kibeelei;

⁶⁴ kwesta agenge koek kagoochinet ne po tengekto;

⁶⁵ ak ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Abidan weeriitap Gideoni.

⁶⁶ Eng' peetuut ne po taman, ko ki igoito kagoochinennyi Aieser weeriitap Amisadai, pounindetap lagogap Dan ko uu ni:

⁶⁷ sanit agenge ne po fedha ne yamei nyigiisindanyi shekelisyek pogol ak sosom ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁶⁸ nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁶⁹ kirgit agenge ne neran, mengit agenge, ak mengit agenge ne ma siirei kenyiit agenge, kobunji kagoochinet ne kibeelei;

⁷⁰ kwesta agenge koek kagoochinet ne po tengekto;

⁷¹ ak ki po tiseiywotap kagoochinetap kaalyeet, eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Aieser weeriitap Amisadai.

⁷² Eng' peetuut ne po taman ak agenge, ko ki igoito kagoochinennyi Pagiel weeriitap Okran pounindetap lagogap Asher ko uu ni:

⁷³ sanit agenge ne po fedha ne yamei nyigiisindanyi shekelisyek pogol ak sosom, ak taabeet agenge ne po fedha, ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁷⁴ nyigiisindap gramit agenge ne po thahabu ne yamei shekelisyek taman, ne nyiitaat nyamdutik;

⁷⁵ kirgit agenge ne neran, mengit agenge ak mengit ne ma siirei kenyiit agenge, kobunji kagoochinet ne kibeelei;

⁷⁶ kwesta agenge koek kagoochinetap tengekto;

⁷⁷ ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Pagiel weeriitap Okran.

⁷⁸ Eng' peetuut ne po taman ak aeng', ko ki igoito kagoochinennyi Aira weeriitap Enan, pounindetap lagogap Naphtali ko uu ni:

⁷⁹ sanit agenge ne po fedha, ne yamei nyigiisindanyi shekelisyek pogol ak sosom, ak taabeet agenge ne po fedha ne yamei shekelisyek tamanwogik tisap, ko uu shekel ne po ole-tiliil. Ki nyiitootiin tuguuchooto tuwai peek che ng'ootiin che tambuluul che ki kiburukto mwaita koek kagoochinetap peek;

⁸⁰ nyigiisindap gramit agenge ne po thahabu, ne yamei shekelisyek taman, ne nyiitaat nyamdutik;

⁸¹ kirgit agenge ne neran, mengit agenge, ak mengit agenge ne ma siirei kenyiit agenge, kobunji kagoochinet ne kibeelei;

⁸² kwesta agenge koek kagoochinetap tengekto;

⁸³ ak ki po tiseiywotap kagoochinetap kaalyeet eiik aeng'u, mengichik muut, kwesik muut ak mengichik muut che ma siirei kenyiit agenge. Chooto kagoochinoik che ki po Aira weeriitap Enan.

⁸⁴ Chuuto kagoochinoik che po pounigap Israel agobo katabaanet ne po kaptisisyet, niito eng' peetuut ne ki ili: sanisyek taman ak aeng' che po fedha, taabook taman ak aeng' che po fedha ak nyigiisindap gramisyek taman ak aeng' che po thahabu.

⁸⁵ Nyigiisindap sanit age tugul kogi shekelisyek pogol ak sosom ak kiyamei shekelisyek tamanwogik tisap taabeet age tugul. Ki ek tugul shekelisyek eliphuusyek aeng' ak pogol ang'wan, ko uu shekel ne po ole-tiliil.

⁸⁶ Ki ek nyigiisindap gramisyek taman ak aeng' che po thahabu, che nyiitootiin nyamdutik, shekelisyek taman age tugul, ko uu shekel ne po ole-tiliil. Ki po shekelisyek pogol agenge ak tiptem nyigiisindap gramisyek tugul che po thahabu.

⁸⁷ Ki ek tuuga tugul che po kagoochinet ne kibeelei, kiruugik taman ak aeng', mengichik taman ak aeng' ak mengichik taman ak aeng' che ma siirei kenyiit agenge, ak kagoochinennywa ne po peek ak kwesik taman ak aeng' che po kagoochinetap tengekto.

⁸⁸ Ki ek anyun tuuga tugul che po tiseiywotap kagoochinetap kaalyeet kiruugik tiptem ak ang'wan, mengichik tamanwogik lo ak mengichik tamanwogik lo che ma siirei kenyiit agenge. Chooto kagoochinoik agobo katabaanetap kaptisisyet, ye kingo kagiil.

⁸⁹ Ye kingwo Musa emait ne kituiyechin kwo kong'alaal ak Kamuktaindet ne Toroor, kogas anyun kutit kong'alaaljin ineendet komang'une paragutap kerwetap rireenet ne ki miitei moingetap paornateet; ki mang'une kwenutap kerubisyechooto aeng', ak ki ng'alaalji ineendet.