KAITOSYEK 4 - Bukuit Ne Tilil

Poisyonik che po piigap ooreetap Kohat

¹ Ki mwachi anyun `Kamuktaindet ne Toroor Musa ak Aron koleenji,

² “Iit weeriigap Kohat icheegei eng' lagogap Lawiik ko uu ortinwekwak ak ko uu kooriigap kwanisyekwak.

³ Iit piik tugul kobooch che po kenyiisyek sosom agoi che po kenyiisyek konom; tugul che imuuchi poisyet, si kobiit koyai poisyet eng' emait ne kituiyechin.

⁴ Poisyetap weeriigap Kohat eng' emait ne kituiyechin ko koriip tuguuk che tiliileen kosiir.

⁵ “Ye katoi piik panda, koba ko Aron ak weeriikyik kocher anyun angeet ne kioiye koot konyo ng'wony ak kotuge anganooto moingetap paornateet,

⁶ ak kooliige magatogap mengichigap-pei, ak kotuge angeet ne buluu, yeityo korooch keetiikyik che ki ibe.

⁷ “Ingoitoe pichooto angeet ne buluu meset ne po magatiinik che po kabartaet ak konde paragunnyi taabook, kechigosyek, tageiywek ak kigombok che kiroong'jine tuguuk ak tebee paragunnyi magatinigap kotugul.

⁸ Yeityo kotuge tuguuchooto angeet ne piriir ak koliige magatogap mengichigap-pei, ak korooch keetiikyik che ki ibe.

⁹ “Ingonam icheek angeet ne buluu ak kotuge keldap tait ak taisyekyik, kanameiywonnyi ak taabookyik che mengeechen, tuguukyik tugul che po mwanik, che kindae mwanik.

¹⁰ Ara ingonde tuguuchooto magateet oriit ne po mengitap-pei, ak konde keetiik che ki ibe.

¹¹ “Ne isubi koitoe angeet ne buluu kapkorosuut ne po thahabu ak koliige magatogap mengichigap peek, yeityo korooch keetiikyik che ki ibe.

¹² Ingonam icheek tuguuk tugul che po poisyet che kiboisyee eng' ole-tiliil ak koliige angeet ne buluu, kotuge tuguuchooto magatogap mengichigap peek ak konde keetiik che ki ibe.

¹³ Ingoram anyun oreek eng' kaptisisyet ak kotumda ak koitoe paragunnyi angeet ne aruus ne piriir.

¹⁴ Yeityo konde paragunnyi tuguukyik tugul che kiboisyee eng' kaptisisyonooto, tereenik, kariik che sogotiin, kechigosyek che eecheen ak taabook che mengeechen. Ingotuge tuguuchooto tugul magatogap mengichigap peek ak korooch keetiikyik che ki ibe.

¹⁵ Ye kagogees Aron ak weeriikyik poisyet ne po tuugeetap ole-tiliil ak tuguuk tugul che po ole-tiliil, ak ye kotoi nganaseet panda, ko ingobwa anyun weeriigap Kohat koip; ago amat kotwa kiy eng' tuguuk che tiliileen si ma pek icheek. Tuguuchuuto che laei anyun weeriigap Kohat eng' emait ne kituiyechin.

¹⁶ Poisyetap Eleazar weeriitap Aron tisiindet ko koriip mwaitap tait, nyamdutik che kibeelei, kagoochinetap peek che po kotugul ak mwanik che kiilse. Yaei riipseet tugul ne po koot ak tuguuk tugul che mi oriit kobooto ole-tiliil ak tuguukyik.”

¹⁷ Ki mwachi `Kamuktaindet ne Toroor Musa ak Aron koleenji,

¹⁸ “Among' kobet koniinda ooreetap kooriigap Kohatik eng' Lawiik.

¹⁹ Ara oyachi ko uu ni si kosapcho amabek icheek ye riikyin tuguuk che tiliileen miising' kosiir: pendi ko Aron ak weeriikyik ak koboorchi chii age tugul eng' icheek poisyennyi ak tuguuk che laei.

²⁰ Ago amat ochamji Kohatik koba ko kogeer ole-tiliil agot kitigin, si ma pek icheek.”

Poisyetap Gershonik

²¹ Ak ki mwachi `Kamuktaindet ne Toroor Musa koleenji,

²² “Iit weeriigap Gerson ak icheek ko uu kooriigap kwanisyekwak ak ko uu ortinwekwak.

²³ Iiti murenik tugul kobooch che po kenyiisyek sosom agoi konom che pendi ko koboisyei eng' emait ne kituiyechin.

²⁴ Ni poisyet ne po kooriigap Gershonik ye poisyei ak ye laisei:

²⁵ ibei icheek angook che po koot, emait ne kituiyechin, kobooto kitambaok che kituge, angoogap mengichigap peek che tabanu paragunnyi ak kitambaok che kigeree kurgeetap emait ne kituiyechin.

²⁶ Ibei angook che uu emait che kiyieme seremut, angeet ne po ye kibunei eng' ormariichetap seremut ne yiemei koot ak kaptisisyet, poroonikwak ak tuguuk tugul che po poisyennywa. Nyolu koyai pichooto kiy age tugul ne po poisyetap tuguuchooto.

²⁷ Pou Aron ak weeriikyik poisyonik tugul che yaei weeriigap Gershonik, ngo eng' laisennywa anan ko eng' poisyennywa tugul. Ooboorchi ak ong'at anyun icheek eng' tuguuk tugul ole iptoi laisennywa.

²⁸ Niito poisyet ne po kooriigap weeriigap Gershonik eng' emait ne kituiyechin. Pou poisyennywa Ithamar weeriitap Aron tisiindet.

Poisyetap Weeriigap Merari

²⁹ “Iit weeriigap Merari ko uu ortinwekwak ak ko uu kooriigap kwanisyekwak.

³⁰ Iiti murenik tugul kobooch che po kenyiisyek sosom agoi konom, chii age tugul ne imuuchi koyai poisyetap eng' emait ne kituiyechin.

³¹ Ni ng'atuutyetap laisennywa ko uu poisyennywa tugul eng' emait ne kituiyechin. Laei icheek pagoinik che po koot, rateiywekyik, lumeiywekyik ak kelongonikyik che tononie,

³² ak lumeiywek che yiemei seremut kotuiyo, kelongonikwak, tigongenikwak, poroonikwak kobooto tuguukwak tugul ak poisyennywa. Ooboorchi chii age tugul kainetap kiit ne laei.

³³ Niito poisyet ne po kooriigap weeriigap Merari ko uu poisyennywa tugul eng' emait ne kituiyechin ak pou icheek Ithamar weeriitap Aron tisiindet.”

³⁴ Ki iit anyun Musa ak Aron ak pounigap tuiyet weeriigap Kohatik ko uu ortinwekwak ak kooriigap kwanisyekwak.

³⁵ Tugul kobooch che po kenyiisyek sosom agoi che po kenyiisyek konom, ak age tugul ne ki imuuchi koyai poisyet eng' emait ne kituiyechin,

³⁶ ko ki ek eliphuusyek aeng' ak pogol tisap ak konom.

³⁷ Chu che ki kiit eng' kooriigap Kohatik, tugul che kiboisyei eng' emait ne kituiyechin, che ki iit Musa ak Aron, ko uu ng'atuutyetap Kamuktaindet ne Toroor eng' Musa.

³⁸ Ki kiit che po weeriigap Gerson ko uu ortinwekwak ak ko uu kooriigap kwanisyekwak.

³⁹ Piik tugul kobooch che po kenyiisyek sosom agoi che po kenyiisyek konom che ki pwa kobois eng' emait ne kituiyechin,

⁴⁰ kaitennywa ko uu ortinwekwak ak ko uu kooriigap kwanisyekwak ko ki eliphuusyek aeng' pogol lo ak sosom.

⁴¹ Chu koitetap kooriigap weeriigap Gerson, che kiboisyei eng' emait ne kituiyechin. Ki iit Musa ak Aron ko uu ng'atuutyetap Kamuktaindet ne Toroor.

⁴² Ki kiit che po ortinwegap weeriigap Merari ko uu ortinwekwak ak ko uu kooriigap kwanisyekwak.

⁴³ Tugul kobooch che po kenyiisyek sosom agoi konom, che pendi si kobois eng' emait ne kituiyechin,

⁴⁴ ko uu kooriikwak, ko ki ek eliphuusyek somok ak pogol aeng'.

⁴⁵ Chuuto icheek che ki kiit che po kooriigap weeriigap Merari. Ki iit Musa ak Aron icheek ko uu ng'atuutyetap Kamuktaindet ne Toroor eng' Musa.

⁴⁶ Chooto Lawiik tugul che ki iit Musa ak Aron ak pounigap Israel ko uu ortinwekwak ak ko uu kooriigap kwanisyekwak.

⁴⁷ Tugul kobooch che po kenyiisyek sosom agoi che po kenyiisyek konom, chii age tugul ne imuuchi kobois ak kola tuguuk agobo emait ne kituiyechin,

⁴⁸ ko ki ek eliphuusyek sisiit ak pogol muut ak tamanwogik sisiit.

⁴⁹ Ki kiit chii tugul ko uu poisyennyi ak ko uu laisennyi konamgei ak ng'atuutyetap Kamuktaindet ne Toroor eng' Musa. Ki kiit anyun icheek ko uu nooto, ko uu ye ki ng'at `Kamuktaindet ne Toroor Musa.