KAITOSYEK 35 - Bukuit Ne Tilil

Nganasoogap Lawiik

¹ Ki mwachi `Kamuktaindet ne Toroor Musa eng' warengetap Moab ole neegitee Jordan eng' ole po Jeriko, koleenji,

² “Ng'at piigap Israel kogoochi Lawiik nganasook eng' porotennywa si komeny, kobooto ole agete tuuga eng' emotinwek che kiyiem nganasook.

³ Ingomeny icheek nganasochooto ak koek olooto ole agete tuukwak, akwotisyek ak tugul che kiyagi.

⁴ Emet olooto agete, che ogoochini Lawiik, chooto yiemei komoswek tugul ko egu mitainik pogol ang'wan ak konom kong'etee irimeetap nganaseet.

⁵ Okwae kogergeitu eng' komoswek tugul koek mitainik pogol sogool, eng' nganaseet ole tokyingei kong'asiis, komostap murot tai, komostap cherongo ak eng' murot kaataam, kokwen nganaseet. Egu eng' icheek ole agete tuuga eng' nganasook.

⁶ Ogoochini Lawiik nganasook lo che kimwechin, egu chooto che ogoitoi si komwechi ne karumis eng' lelset. Ne siire, otesyi icheek nganasook alak artam ak aeng'.

⁷ Nganasook tugul che ogoochini Lawiik, ko egu artam ak sisiit kobooto emotinwekwak chugai iagisyee.

⁸ Ak eng' nganasochooto ogoitoi eng' che po piigap Israel, onemu anyun che chaang' eng' che tinyei che chaang' ak onemu che ng'ering' eng' che tinyei che ng'ering'. Ingogoochi age tugul Lawiik ko uu ole tee porotennyi ne kinyoor.”

Nganasook che kimwechin

⁹ Ki ng'alaalji `Kamuktaindet ne Toroor Musa koleenji,

¹⁰ “Mwachi piigap Israel leenjin: Ye olandoe Jordan obe emetap Kanaan,

¹¹ otabaanjigei nganasook alak eng' chooto koek nganasook che omwechini si kobiit komwechi olooto age tugul ne karumis eng' lelset.

¹² Egu nganasochooto che omwechini si ma nyoorwok ne yaaktoi mugetuut, si ma kibar ne karumis agoi kotonon eng' taitap tuiyet kirwookyi.

¹³ Ak nganasochooto lo ogoitoi, koegu nganasook che kimwechin.

¹⁴ Ogoitoi nganasook somok eng' Jordan pitoniin ak ogoite nganasook somok eng' emetap Kanaan, koek nganasook che kimwechin.

¹⁵ Egu nganasochooto lou ole mwechin piigap Israel, anan ne toondet ak punootyot ne mi kwenunnywa. Ingomwechi olooto age tugul ne parei chii eng' lelset.

¹⁶ “Ago ngo kikwere karnet ak kogoon aseenet ko rumin chiichooto, ak ki parei rumindonooto iman.

¹⁷ Ngo ki wiiree koita ne yamei kobar chii, ak kome nooto kagiwir, ko rumin ineendet. Kibarei rumindonooto iman.

¹⁸ Anan ngo kikwere keetit ne yamei kobar chii, ak kome ne kagikwer, ko rumiindet ineendet. Kibarei rumindonooto iman.

¹⁹ Parei yaaktaindetap mugetuut rumindonooto. Ngo tuiyo ak ineendet, kobar.

²⁰ “Ak ngo toorta amu wegeet anan ngo wiir eng' kiy ak kobar kome,

²¹ anan ngo rabach eng' puunyoondit, ak kobar kome, kebarei iman ineendet ne kerabagisyei; rumin chiichooto. Parei yaaktaindetap mugetuut agobo korotiik rumindonooto ye katuiyo ak ineendet.

²² “Ago ngo toorta eng' yooto ama eng' puunyoondit, anan kowiire kiy age tugul ama sapchi,

²³ anan kowiir eng' koita ne yamei kobar chii ama keer ineendet ak kome, ak kotee ko kamago punyondennyi ak kama komachei koyachi ne ya,

²⁴ korwooch anyun tuiyet agobo parindonooto ak yaaktaindetap mugetuut agobo korotiik ko uu ole teptoi kirwoogutichu.

²⁵ Myee kosar tuiyet rumindonooto eng' eutap yaaktaindetap mugetuut agobo korotiik ak koweekyi icheek ineendet nganasennyi ole kiga mwechi. Ingomeny olooto agoi kome tisiindet ne oo ne ki kiile mwaita ne tiliil.

²⁶ Ago ngot kosiir rumindonooto kiwotetap nganasennyi ne kiga mwechi,

²⁷ ak konyoorchi ineendet yaaktaindetap mugetuut agobo korotiik saang'utap nganasennyi ne kimwechin, ak kobar ineendet parindet, koma namei ineendet ne kayaaktoi mugetuut ng'oogistap korotiik.

²⁸ Amu kata nyoljin kotebee nganasennyi ne kimwechin agoi kome tisiindet ne oo. Ago ye kagome tisiindet ne oo koweekyigei anyun rumiindet emennyi.

²⁹ “Egu tuguuchuuto ng'atuutyetap kirwooget eng' okweek eng' ibinwekwok tugul ak eng' meng'otosyekwok tugul.

³⁰ “Eng' ng'olyoo age tugul agobo ne parei chii, ko ng'aleegap paorinik che koonu kagikyinet ngo kibarei rumindonooto. Ago ma ki parei chii eng' paornateetap chiito agenge.

³¹ “Amotaach kiy ne kityage saboondap rumiindet ne irwookyinot konyoor meet; ki parei ineendet iman.

³² Amotaach kiy ne kityage chii ne kamwechi nganasennyi ne kimwechin, ne mache koweek si kobiit konyo komeng'iis eng' emet kotomo komee tisiindet ne oo.

³³ Amomurwon anyun emet ne omi. Amu imurwoni emet korotiik. Ak ma mi kiy ne ki anyinyee emet amu korotiik che kitumjigei kobatee korotiigap ineendet ne kitumda korotichooto.

³⁴ Ameng'wanit anyun emet ne omenye, ne atebee agane; amu anee, Kamuktaindet ne Toroor, atebee kwenutap piigap Israel.”