KAITOSYEK 32 - Bukuit Ne Tilil

Kepcheei Jordan ne po Kong'asiis

¹ Ki tinyei akwotisyek che chaang' miising' lagogap Reuben ak lagogap Gad. Ye kingo keer emetap Jaser ak emetap Gilead kole emet ne nyoljin akwotisyek,

² kobwa lagogap Gad ak lagogap Reuben kong'alaalji Musa ak Eleazar tisiindet ak pounigap tuiyet, koleenji,

³ “Emotinwegap Ataroth, Dibon, Jaser, Nimra, Hesbon, Eleale, Sebam, Nebo, ak Beon,

⁴ emonooto ki par Kamuktaindet ne Toroor eng' taitap tuiyetap Israel, ko emet ne nyoljin akwotisyek, ak tinyei otwogiguk akwotisyek.

⁵ Ngo koginyooru chameet eng' taing'ung', ko nyolu kigoochi emoniito otwogiguk kobunji; amemutech kelandae Jordan.”

⁶ Ki leenji `Musa lagogap Gad ak lagogap Reuben, “Tos otebi okweek yu ye pendi tupchosyekwok lugeet?

⁷ Amu nee si omu piigap Israel si ma landa koba emet ne ki igoochi Kamuktaindet ne Toroor?

⁸ Ki yai kwanisyekwok ko uu nooto, ye kinga yookte eng' Kadesh-barnea koba kosegei emet.

⁹ Amu ye kingo pa atebweetap Eskol, ak kogeer emet, komu piigap Israel kole si ma pa emet ne kiga kogoochi Kamuktaindet ne Toroor.

¹⁰ Ki nereech kot Kamuktaindet ne Toroor peetuunooto, ak ki iyasyo kole,

¹¹ ‘Amu ma isubwo icheek eng' kagesunatetapkei, koma mi iman eng' piik che ki punu Misiri kobooch che po kenyiisyek tiptem ak kwo tai ne imuuchi kogeer emet ne ki ayosyechi Abraham, Isak ak Jakobo.’

¹² Kobatee Kaleb weeriitap Jepune Kenisindet ak Joshua weeriitap Nun, amu ki isup icheek Kamuktaindet ne Toroor eng' kagesunatetapkei.

¹³ Ki nereech kot Kamuktaindet ne Toroor agobo Israel, ak ki igoochi icheek koombeniot eng' surkwen eng' kenyiisyek artam agoi kowong'kei ibinda tugul ne ki yai yaityet eng' taitap Kamuktaindet ne Toroor.

¹⁴ Ara oyaei nguno ko uu ye ki yai kwanisyekwok, oegu kiptengeginik che tesoksei, otes nereegek che koroomen che po Kamuktaindet ne Toroor eng' Israel.

¹⁵ Amu ngo maste omete ineendet, kobagaaktoi ineendet icheek kogeny eng' surkwen, ak ong'em pichu tugul.”

¹⁶ Ki pwa icheek ole mi ineendet ak kole, “King'ote piusyegap tuukyok eng' olito ak keteekyi lagokyok nganasook.

¹⁷ Ki chobootiin acheek kilaach kariik keebe kindoe piigap Israel agoi kiit icheek oldanywa. Ak komeny lagokyok nganasook che ng'ootaatiin, koriibotin icheek eng' piigap emet.

¹⁸ Ma kiweeksei kebendi kaa agoi konyoor chii tugul eng' piigap Israel porotennyi.

¹⁹ Amu ma kinyabani kobooto icheek eng' pitoniindo po Jordan anan oliin po tai, amu mi porotennyo Jordan pitoni tokyingei kong'asiis.”

²⁰ Ki leenji `Musa icheek, “Ngo yai ko uu niito, olaach kariik obe lugeet eng' taitap Kamuktaindet ne Toroor,

²¹ ak ngwo mureno age tugul ne kagolaach kariik kolandae Jordan eng' taitap Kamuktaindet ne Toroor, koon puunikyik eng' tainnyi,

²² ak kiterteer pichooto eng' taitap Kamuktaindet ne Toroor, oweegei anyun ak oegu che ma tinyei tengek eng' taitap Kamuktaindet ne Toroor anan eng' Israel ak kobunjook emoni eng' taitap Kamuktaindet ne Toroor.

²³ Ago ngot ko moyai ko uu nooto, ko kaoyai tengekto eng' taitap Kamuktaindet ne Toroor, ak onai anyun ole ng'ang'dook tengektong'wong'.

²⁴ Oteekyi nganasook lagokwok ak ong'otyi keechiirekwok piusyek, ak oyai nooto kamang'une kuting'wong'.”

²⁵ Ki mwachi `lagogap Gad ak `lagogap Reuben Musa koleenji, “Yaei otwogiguk ko uu ye keng'atech kiptaiyandennyo.

²⁶ Tebee nganasoogap Gilead lagokyok, osotikyok, tuukyok ak che kiyagi tugul,

²⁷ ago landoi otwogiguk, mureno age tugul ne kagolaach kariik che po lugeet, kobendi pooryeet eng' taitap Kamuktaindet ne Toroor, ko uu ye kamwa kiptaiyandennyo.”

²⁸ Ki iyomis anyun `Musa Eleazar tisiindet, Joshua weeriitap Nun ak kandoigap kooriik che po kwanisyegap ortinwegap piigap Israel, agobo pichooto.

²⁹ Ki leenji `Musa icheek, “Ngo landae tugul Jordan kobooto lagogap Gad ak lagogap Reuben, chii tugul ne kagolaach kariigap lugeet, si kwo pooryeet eng' taitap Kamuktaindet ne Toroor, ak kiterteer emet eng' taing'wong', ogoochi anyun icheek emetap Gilead kobunji.

³⁰ Ago ngo ma cham olande tugul kotinyei kariik, konyooru icheek poroteet kobootok eng' emetap Kanaan.”

³¹ Ki wolji lagogap Gad ak lagogap Reuben koleenji, “Kiyae ko uu ye kamwachi Kamuktaindet ne Toroor otwogikyik.

³² Kilandoi eng' taitap Kamuktaindet ne Toroor, kebendi emetap Kanaan ketinye kariik, ak ng'etu eng' Jordan pitoni, che punjinech che po porotennyo.”

³³ Ki igoochi `Musa icheek, chooto lagogap Gad, lagogap Reuben ak kebebertap ooreetap Manasseh weeriitap Joseph, laitornatetap Sihon laitoryatap Amorik ak laitornatetap Og laitoryatap Bashan, emet ko uu nganasookwak kobooto ole poochin kiwotosyekwak, agot nganasoogap emet che ki yiem.

³⁴ Ki teech kogeny lagogap Gad Dibon, Ataroth, Aroer,

³⁵ Atrot-sopan, Jaser Jogbea,

³⁶ Beth-nimra ak Beth-haran, nganasook che ng'ootaatiin ak piusyek che po keechiirek.

³⁷ Ki teech kogeny lagogap Reuben Hesbon, Eleale ak Kiriataim,

³⁸ Nebo ak Baal-meon (ki kiwal kainaikwak), ak Sibma. Ak kitoochi kainaik alak nganasook che ki teech.

³⁹ Ki pa lagogap Makir weeriitap Manasseh Gilead. Ki nam ak koon komaanda Amorik che ki mi olooto.

⁴⁰ Ki igoochi `Musa Makir weeriitap Manasseh, Gilead ak ki meny olooto.

⁴¹ Ki wo Jair weeriitap Manasseh konam nganasookwak, ak kotoochi kainaik alak koguure Habot-jair.

⁴² Ak ki wo Noba konam Kenat kobooto nganasookyik che mengeechen, ak kiguure yooto Noba, koguurtoe kainennyi.