KAITOSYEK 3 - Bukuit Ne Tilil

Koitet ak poisyonigap Lawiik

¹ Chu ortinwegap Aron ak Musa eng' peetuut ne ki ng'alaalji `Kamuktaindet ne Toroor Musa eng' tulweetap Sinai.

² Chu ko kainaigap weeriigap Aron: Nadap ne po tai, Abiu, Eleazar ak Ithamar.

³ Chooto ko kainaigap weeriigap Aron, tisiik che ki kiil ak kitabaan si koyai tisiisyet.

⁴ Ago ki pek Nadap ak Abiu koma tinyei lagok eng' taitap Kamuktaindet ne Toroor eng' surkwen ne po Sinai, ye kingo koito maat ne teer eng' taitap Kamuktaindet ne Toroor. Ki yai anyun Eleazar ak Ithamar tisiisyet eng' taitap kwandanywa Aron.

⁵ Ki mwachi `Kamuktaindet ne Toroor Musa koleenji,

⁶ “Imutu ooreetap Lawiik kobwa icheek taitap Aron tisiindet, si kotoret ineendet eng' poisyet.

⁷ Ingoyai icheek poisyetap Aron, ak poisyetap tuiyet komugul eng' taitap emait ne kituiyechin ye yaei poisyet ne po koot.

⁸ Ingoriip icheek tuguuk tugul che po emait ne kituiyechin oriit; ak ye yaei poisyet ne po koot koyaei poisyet ne kata yaei piigap Israel.

⁹ Igoochi `Aron ak `weeriikyik Lawiik si kotoret poisyet; Lawiik ko piigap Israel che ki kigoochi Aron iman.

¹⁰ Inde Aron ak weeriikyik si koriip tisiisyet, ak chii age tugul ne kipsagariin ne riikyin, kebarei.”

¹¹ Ki mwachi `Kamuktaindet ne Toroor Musa koleenji,

¹² “Keero! Aneendet ne ki anam Lawiik eng' kwenutap piigap Israel si ageere weeriik che po tai che yaatei iyoteet eng' piigap Israel. Punjino Lawiik,

¹³ amu chechuuk weeriik tugul che po tai. Eng' peetuut ne ki abar weeriik tugul che po tai eng' emetap Misiri, ko ki atabaanjigei tugul che po tai eng' Israel, eng' piik ak eng' che twatei kiyagiik; egu chechuuk chooto. Aa Kamuktaindet ne Toroor.”

¹⁴ Ki mwachi `Kamuktaindet ne Toroor Musa eng' surkwen ne po Sinai koleenji,

¹⁵ “Iit lagogap Lawiik ko uu kooriigap kwanisyekwak ak ko uu ortinwekwak. Iit weeriik tugul kobooch che po arawet agenge ak kwo tai.”

¹⁶ Ki iit Musa anyun icheek ko uu ng'olyootap Kamuktaindet ne Toroor ne ki ng'at ineendet.

¹⁷ Chu ko kainaigap weeriigap Lawi: Gerson, Kohat ak Merari.

¹⁸ Chu ko kainaigap weeriigap Gerson ko uu kooriikwak: Libni ak Shimei.

¹⁹ Weeriigap Kohat ko uu ortinwekwak ko ki: Amram, Ishar, Hebron ak Uzziel.

²⁰ Weeriigap Merari ko uu ortinwekwak ko ki: Mali ak Musi. Chuuto ortinwegap Lawiik ko uu kooriigap kwanisyekwak.

²¹ Koorigap Libnik ak Simeik ko iyoteetap Gerson; chuuto ko ki kooriigap Gershonik.

²² Ki ek tugul che ki kiit, kobooch che po arawet agenge ak kwo tai murenik eliphuusyek tisap ak pogol muut.

²³ Ingoteech che po kooriigap Gershonik kootap tuiyet patai eng' komostap cherongo,

²⁴ ak koek Eliasap weeriitap Lael pounindetap Gershonik eng' kootap kwanisyekwak.

²⁵ Ingoriip weeriigap Gerson eng' emait ne kituiyechin, koot, emait ak tuguukyik che kituge, ak angeet ne kigeree kurgeetap emait ne kituiyechin,

²⁶ angook che king'ote seremut, angeet ne kigeree kurgeetap seremut ne neegitee koot ak kaptisisyet, ak poroonikyik che po poisyennywa tugul.

²⁷ Koorigap Amramik, Isarik, Hebronik ak Usyelik, ko iyoteetap Kohat; icheeget ko kooriigap Kohatik.

²⁸ Ki ek tugul kobooch che po arawet agenge ak kwo tai murenik eliphuusyek sisiit ak pogol lo; chuuto che ki riibei poisyetap ole-tiliil.

²⁹ Ingoteech weeriigap Kohat murot tai ne po koot,

³⁰ ak koek Elizaphan weeriitap Uzziel pounindetap kooriigap Kohatik eng' kootap kwandanywa.

³¹ Ingoriip icheek moinget, meset, keldap tait, kapkorosusyek, tuguuk che poisyee icheek eng' ole-tiliil, angeet ne kioiye koot ak poisyennyi tugul.

³² Ingoek Eleazar weeriitap Aron tisiindet ne oo eng' pounigap Lawiik, ak koriip icheeget che riibei poisyetap ole-tiliil.

³³ Koorigap Malik ak Musik ko iyoteetap Merari; icheeget kooriigap Merari.

³⁴ Ki ek tugul kobooch che po arawet agenge ak kwo tai murenik eliphuusyek lo ak pogol aeng'.

³⁵ Ingoboi Suriel weeriitap Abiail koot ne po kwanisyegap kooriigap Merari. Ingoteech icheek komostap murot kaataam ne po koot.

³⁶ Ki kigoochi weeriigap Merari koriip poisyetap pagoinik che po koot, rateiywek, lumeiywek ak kelongonikyik che tononie ak kiy age tugul ne namegei ak poisyonikyik tugul,

³⁷ ak lumeiywek che yiemei seremut, kelongonikwak che tononie, tigongenikwak ak poroonikwak.

³⁸ Musa ak Aron ak weeriikyik che teechei komostap kong'asiis ne po koot, ole charunee asiista eng' taitap emait ne kituiyechin. Riibei icheek poisyetap ole-tiliil agobo poisyetap piigap Israel; ak chii age tugul ne kipsagariin ne riikyin kebarei.

³⁹ Ki ek tugul murenik che ki iit Musa ak Aron che po Lawiik eliphuusyek tiptem ak aeng'. Ki kiit che po kong'etee arawet agenge ak kwo tai, ko uu kooriikwak ak ko uu eng' ng'atuutyetap Kamuktaindet ne Toroor.

⁴⁰ Ki leenji kogeny `Kamuktaindet ne Toroor Musa, “Iit weeriik tugul eng' piigap Israel che po tai eng' sigeet, che po arawet agenge ak kwo tai, ak itet kainaikwak.

⁴¹ Itabaanwo Lawiik kobunjo, kewale tugul che po tai eng' piigap Israel, ak che twatei kiyagiik che po Lawiik kewale che twatei kiyagiik che po piigap Israel; aa Kamuktaindet ne Toroor.”

⁴² Ki iit anyun Musa weeriik tugul che po tai eng' piigap Israel ko uu ye ki ng'at `Kamuktaindet ne Toroor ineendet.

⁴³ Ki ek weeriik tugul che po tai che ki kiit, kong'etee che po arawet agenge ak kwo tai, murenik eliphuusyek tiptem ak aeng' ak pogol aeng' ak tamanwogik tisap ak somok ko uu koitetap kainaik.

⁴⁴ Ki mwachi `Kamuktaindet ne Toroor Musa koleenji,

⁴⁵ “Nam Lawiik ak iwalee weeriik tugul che po tai eng' piigap Israel ak inam kiyagigap Lawiik iwalee kiyagigap piigap Israel ak punjino Lawiik. Aa Kamuktaindet ne Toroor.

⁴⁶ Eng' katyagetap weeriik che po tai che po piigap Israel chooto pogol aeng' ak tamanwogik tisap ak somok che siirei Lawiik,

⁴⁷ iitoche eng' chii tugul shekelisyek muut, ko uu koitetap ole-tiliil.

⁴⁸ Igoochini Aron ak weeriikyik shekelisyek che po chooto siirtootiin che kityage pichooto.”

⁴⁹ Kitaach anyun Musa shekelisyek che po katyaget kobun icheek che ki chaang' kosiir che ki ityaach Lawiik.

⁵⁰ Kitaach eng' kiboretogap piigap Israel shekelisyechooto eliphuut agenge ak pogol somok ak tamanwogik lo ak muut, ko uu shekel ne po ole-tiliil.

⁵¹ Ki igoochi anyun Musa shekelisyechooto po katyaget Aron ak weeriikyik, ko uu ye ki kang'at ng'olyootap Kamuktaindet ne Toroor.